“Why should we double martyr our martrys’ today?”
Hnam Santu Pawl haiin an huoihawt hlak “Hmar Martyrs’ Trophy” chu kum 1998 a inthawk khan tournament inkhelna a kalo ṭhang ve hlaka, chu zar pei chun final khawm ṭum li lai ka lo khel ta anih. Sienkhawm lengna tlâng indang leiin inkhel thei talo chu hrillo, a hmu khawm hmu phak an ta naw a, amiruokchu suongtuona kheltieng ram annaw leiin hiengang hin kalo ngaituo ve a nih. Kum kha le chen Hmar hnam tadinga Martyrs’ hai hminga Trophy siema um inchu leia fam lo chang tahai ngaituo hman lek lo a ka buoi lai hun dam ka ngaituo chun, a hunlaia ding khan chu alo awm sienkhawm tulaia ding ruok hin chu thiem inchang dan a um ta nawh (Martyr thuhmal hungsuokna le hi thumal ei hmangdan inpelsawl met sienkhawm chu tieng chu hril ka tum an nawh).
Hmar hnam hmangaina lei le hmathlir ṭhatak neia, “Lalpa chun mei (tail) niloa lu (head) ni dingin siem a ti che” (Deut. 28:13) tia Israel nauhai kuoma alo tiem ta changchawia, hmarnau zaleng hai nunkhuo inhawina ding ngaituo leia insûnglum, nuhmei le nauhai khawm thlahlel theilo a, chengrâng chawia ramṭuon an rellai ni hai kha ka ngaituo kir a, “nuhmei naupangtê a sunghai in thuomhnaw thak dinga ṭhenawm hai ina antir, ṭhenawm pa kuta inthawk suollui tuok le a hringna chen a lakpek” Crime Petrol haiin an hung suklang le khan in ang tina lientak ka nei a nih.
Kum 1986 lai vel bawra inthawk Hmar hnam in movement a hung ṭana inthawk khan Churachandpur phairuom mipui 99% chun alo thlawp hmak niin ka hrieta, tleirawlte chau ni lang khawm pasalṭha ramsuok hai hlawtlingna changa an hung lêtnawk hun ding chu ṭhâltui nghâk in kan nghâka, nu le nauhai chun kawtsuoa hnena hlado sam a silai vânvawr zawnga kâp ri ngaiin sakhi nakâwr intung ang el chun kan lo intung fur chu anih. Khang hun lai khan ngaituona lungril hai khawm a thienghlima, “ṭhangruolin lungruolin” Pathien hnam mi pek le ṭawng mipek ngei chu chawisang tum in kalchawi tlang alo ni hlak. “Saikawt incident, Muolvaiphei incident, Rengkai incident kan dit nawh” tia khêk mipui sangtêl in tuornipui senvung hnuoia DC ofis lamsuk lamtung hraw hunlai dawnkirin lungruollai ni umkhawsawt anchang zo tah. Sienkhawm vangduoina pumpel ruollo chun mihrâng pasalṭha mi sawmthum chuong zet chun an hringna hlutak an chan ta hlaua, chuong hai ngaisangna in entirna le hrietzingna lei chun vawisuna “Hmar Martyrs’ Trophy” hi buotsai chu alo nih.
Kumpui an herliema, 1994 hung inhersuok chun zanrillaia berampu hai ang el khan chanchinṭha lawmum bek bek “kan hnam a dam tah, kan ram a pieng tah” tia khekrawl chun zanmu tuorem hnung a hung keithoa, hnena hlado sam chun CCPUR dung le khang kan fangsuok, ramthar lawm chun Sielmat khêlzawla lungruol in chawnbân kan vâwr. Nisienlakhawm tiena Israel hnam hai laia Akan lungril put, hmar nauhai laia kum 1930 laia inthawka kohran pawl rama zung lo kei ta khan hmar hnam pumpui huopa inthuruolna suksie dingin a hung indâwnsuok nawk tah. Mimal hlawkna ding hnawt leia Pawl ram hringnun hung piengsuok chun mani mi le sa hai inthattuona a pung deu deua, original lungrila inthawk duplicate ngaituona a zuolkai ta a nih.
Matthai 5:16-a “In var chu mi mithmua var rawse” tia ziek ang khan, hmar kohran pawl var neisun “inṭhena, mani hmasielna, midang neka mani pawl ṭha intina” hai chun hnam movement a el vara. Chu zar pei chun Hmar helpawl group hieng: Hmar Revolution Front (HRF), Hmar People Convention (Returnee), Hmar Liberation Army/Front (HLA/F), Sinlung Tiger (ST), Hmar National Army (HNA) le Hmar People Convention (President) pawl hai chu an hung piengsuok ta anih. Hmar hnam laia Krista Kohran in puotienga inthawka harsatna a tuok neka kohran pawl le pawl inhmêlmâkna leia harsatna an intluntuo a tamlem ang hrim in Hmar hnam in hnamdang hai kuta inthawka harsatna atuok nekin hieng pawl le pawl inhrietthiem nawna leia harsatna a tuok hi a tam lem anih. Ei hnam kalchawidan tlangpui chu: kumkhat laia ICI pastorpa kha vawisun hin EFCI pastor in a uma, EAC hai missionary chu RPC hai rawngbawltu in a ṭhang ta bawk, chuongang hrim chun HPC hai hotupa chu HRF hai hotu in a ṭhanga, HLA/F hai sipai chu tuhin HNA hai vengtu in a ṭhang mek bawk. Hmar hnam puotienga luongsuok um meu lo chun hnam sunga inchawm kalâng ruok chu ei tam hle.
Hmar hnam movement leia hringna hlutak lo inhlan mi sawmthum chuong hai khan vawisuna ei hnam ngirhmun hi hung hmu ve hai sienla iengtinam ngai an ti aw! Pasalṭha hai chun hnam tadingin an hringna an lo inhlâna, vawisuna la dam hai hin Martyr’s Trophy valruol hai inchu ding chau hi ani inhlân ding ei neisun? Kimte’n laikhum chunga zalhmun rem pumin hang dawnkir ve tam hnam hmangaitu! Nang ngei khawm thiem inchang thei bik reng am? Zamuol liemhnung lenruol ngaium, âihnaphapui tia suonglung chunga thunawi insam khum hai hringnun kha. An lungvar po po, an hratna po po le hringna chen an lo inhlân ani nawm anih. “Tukhawm indo laiin hi damsung khawsakna hin an chawkbuoi ngai nawh” (2 Tim. 2:4) ti kha changchawi nilo am annih! Mizoram Chief Minister kuta inthawka cheng singthum, singhni, singkhat ei dawng hai khan mihrâng hai hmathlir chu a zuiral el ding khawm a hawi ta baka.
Pasalṭha ramsuok in a ruolpa savawm sawna a kâphlum pal anga mani chipui hiengzat kâphluma umhai hi chu thawpal chu ni silo maw! Annawleh, hmar kohran pawl hai anga “hotu inchûna” leia mani unauhai tuithlâr theina hripui khan salṭha hai singmit dawivêtin aum lem tam anih (serâng sunga serâng ma piengnaw nim ti anisi maw). Hmarthlipui Eurokuilo (pawl inlâk hranna) hin iengchenam amila lênhmang pei ding ti chu ngaituo tham tak a nih.
Juda Iskariot chun a ruolṭha le an hotupa ni bawk chu inphatsan in tangka sawmthum in alo zawr tah, chu thisen man chun “inphûmna hmun ding” (Mat. 27:7) chite bek an lan chawk annawm anih. Hnam pasalṭha hai thisen man khan hmun chite bek insuo umloin a thlawnin a luongliem el ding chu anta maw! Mani phiengpui hmangaina leia hnam hmaikawr bun tuhai, inhnung thuoltu mipui haiin sawrkar uichal hai kut thak kan tuorna hai kha a huntawk ta ie. Hmar mipui hai tadinga hamṭhatna intluntu le inhumhimna niloa harsatna chawksuoktu niin iengchenam chengrâng chawiin nunkhuo eila pham pei ding? Krista chun Peter kuoma hienghin alo tih: “Kâwlhnâm inlettu chu kâwlhnâm vêkin thing a tih” (Mat. 26:52).
Chuleiin Hmar zalêng nauhai ṭhanghar ava hunta ngei deh, ei hnam hin hringna inhlân a phût nawh vawisûn hin, “Ngaidan sêdai ṭhiek” a pawimawtak anih. Ei hmaṭhuoitu Isu Krista chun a ngâidan le theina hai po po chu mission accomplish ani theina dinga sieṭha in, kross a chun martyr alo chang ta anih. Krista anga mani pawl hamṭhatna ding aniphawt chun tia mani mimal ngaidan le hamṭhatna hai hnawl ngamtu pasalṭha ei hnam hin a mamaw anih. Chuongang chun, I ngaidan, nina le theina hai po po chu Hmar hnam tadinga Krista hminga martyr inchangtir ngam ve naw dim anih! Hmar pasalṭha fammuol lo liem ta po po hai khan ei hnam pumpui huopa hamṭhatna beisei leia hringna chen lo inhlân annih, mimal le pawl hming lei annawh ti theinghiltu hai eini chun hnam hminga martyr lo chang ta hai kha vawisun hin martyr eilan chang zawmtir zing ning a tih. Chuleiin, ei Hnam Tading hin ei ngâidan, nina le hamṭhatna hai Krista hminga martyr inchangtir ngam dingin huoisen ei tiu, chu chu ei hnam in a mamawtak ani, ei hnam hi ei kohran mizie inlangna darthlalang ani meu sih a.
“Let us all be brave enough to die the death of a martyr, but let no one lust for martyrdom” MK Gandhi.
10-May-14, Gurgoan, Harayana
