Hnam ei inpumkhat chun Kohran (Denomination ) chu iem ei inpumkhat naw nasan ding? Hi ngaidan hi a hung suok tlat chu tie. Andik tam andik naw tam, ei thai rang rek nuol phawt ding chu a ni awm hih. A kar chang hin chu Hmar ni kuhi sawl a um maw, lungsenna ding a tam, hadamna a um thei tak tak nawh, Hmar ni khawm kui ei inzak ṭawt chang dam a tam. Anachu, ei Hnam chu ei inzapui ding le ei dem ding a ni sie nawh. Chu nek hmana a sukvultu le a enkawltu dinghai ei lo ni lem bawk sie. Chu lai kara chun ei hang leng chang hin chu lungril hi a van tar thei ngei de aw! Inni tawl ve ka ring chu tie... A chang hin chu harsatna kui ei ta ding bîk am an ta aw tiin ei inngaituo vung vung chang khawm a bo nawh. Iengpo khawm nisien, harsatna, sûmpui pik tak kara var a hung inlang hun chu a um tho tho hlak a nih. La hang nghak fan fan ei ta, ieng chum ṭhang a ta ti hai ngaituo zing pumin.
Hmar hnam sûng a hin pawl/organisation hi iengzam a um ti chu ka hriet naw a, a tam hle ti chu ka hriet nawk thung. Kohran (denomination, inchik zing ei tiu hi ei tiem sûng po, ziek naw ziek nawn pei a um nawh ) chu hril tak loa pawl hi a va zuk tam lawm lawm. Inhma deu kha a ni tah, kum iemani zat chu a liemtah, papui pakhat fiemthaw ka la hrietzing chu Association tam taluo hril ngaina a hriet naw luotin “Nina Neilo Association” indin a rawt hiel annawm. Ei nasa tho maw... Anachu, hang hril tak tak inla, hang ti dek dek inla chu a ṭhat zie le a ṭangkai zie hril insiek ei thaw tawl el ding hriet sa. A ṭhatna khawm chu um ngei bawk a tih. Ana chu, ka ngai thei naw le ka i dit naw bêk bêk el, kawngro a suk tam a suk naw tam ei Hnam ei inthuruolnawna Kohran ei intuma ei khîk chawr el hi chu ka ngai thei naw a pawi khawm ka ti bawk a nih. Amiruokchu, ei ngaidan le ei thil hmu dan hai hi an ang ngai naw lei khawm chu a ni tho. A ieng iengkhawm ni sienla a pawng a puia Kohran ei intum el hin chu ei la phak insang naw de aw ka lo ti lem a nih. Andik khawm ka ring tho a nih. Kristienna la hung lut naw sienla Kohran khawm la um nawng a ta, anleh, Kristienna kha la hung lut lo nisien Kohran khawm la um naw chie sien hieng chen chen le hieng ang hin ei Hnam a pumpui hin ei changkangin ei inṭhang ei ring ngam chie ding am? HYA, HSA, Val - Upa, le a dang dang hai zar ning a ti hieng chen chen ei hnamin ei lo sir phak ve el ta hi? Aw, i ti ngam chie ding am? Kei chu ka ti ngam kan ring rak le. Ei hnam hin In-direct takin Kohran hi ei hnawl zing an tan nawm a ni aw??? Chu chu ei siet pui le ei i tlak hnuoi pui ni thei dingin ringna amanih ngaituona i nei lem am? I la nei naw chun hang ngaituo ve raw, a awm ve kher el. A hnam a telpuiin Kohran ei intum el ta chun a ni theina ding thil a um annawm maw. Kohran inkara nasatakin ei lo buoi taa, anachu a liem an tah. Kei har nawk ei tum nawh. Kohran dang le a thar khawm a tam em em. Chuong hai chun thuring nghet tak neiin Pathien ei biek senga Hnam ta dingin ei \awng\ai seng ti hi i pawm ve am? Hnam suksietna ding thil ngaituo a kohran indin ei um am a nih? Ring a um naw ngei maw.
Ei Hnam ei inthuruol thei naw a, inkhîk-inkalna hai dam, indemna, inthatna, pawl le pawl kara nasatak a tlung a tlung el nasan hi ieng tak am ning a ta aw? Ngaituo um tak chu a nih. Ngaidan hang suk lang khawm ṭi a um thuok thuok annawm ie. Kei ka taptebul lo ngaidan ve mei mei chun Hnamah le Isu Krista a piengtharna indik ei la chang naw nih ti hi ka ngaidan chu a nih. Andik in ti ve dim chu ka hriet naw anachu andik naw hul huol chu ka ring chuong naw nih. Hnamah ei la piengtharnaw a, hnam hmangai tak tak sie lovin hnam hmangai angin ei insal a, hnam hmakhuo ngaituo mang sie lovin mani hmakhuo chau ngaituo. Mani phingpui suklienna ding chaua hnam hmangai ei pung deu deu annawm. |huoitu nekin hotu ei pung hrat a, hotu Pathien ṭi mi hlak ei vang tiel tiel el bawk sie. Fâkrûkna hai a hluor a, hotu ni nuomna haiin a sip zo. Hieng hai kuhi an naw a Hnam inthuruolna ding le inpumkhatna ding daltu lem hai chu??? Sum hlak chu a ni ding bâk bâkin ei ngainaa, chu chun nasatakin indikna a min kengkaw tir thei ta naw a, chu hung ra suok pei chu a ni lem naw ding tuta ei hnam ngirhmun chau tak a mi siemtu chu??? A awm thei kherel maw unauhai, hung ro ngaituo ṭhang ei tiu ie. Mi’n piengtharna indik neiin hnam le kohranah rawng bawl chie sienla chu aw fâkrûkna um naw phawt a ta, Pathien rawn pum zingin rawng bawl a ta. Ama nekin a rawng a i bawl a mipuihai ta dinga thil ṭha chu a ngaituo lem ngei ding a nih. Chuong anga rawngbawltu ei um meu am a nih? Ei tlawm a, kut par tliek a hang tiem ding tak ngiel khawm ei um naw kui annawm ei bau ei ka hul el. Kohran sunga chen hi hrie hi an leng a, hi laka inthawk insie fihlîm hlak chu harsa ei ti tawl ngang el. Ei inzawt seng naw ding a nih. Hieng hi a ni leiin iengtin am hma hang la thar inla ti chu ei i hril nuom deu tak chu a nih.
Ei unau Mizoram hai saw ei en chun ei tluk naw zie ei hmu hlak a thang tlawm khawm a um hlak. Amiruokchu, ei tluknawna hai saw enin ṭhang lak dan ngaituo ve lem ei tiu. YMA hi an lar khawpel a, an iengkim a iengkim a ni el annawm a ni maw an YMA hai tak saw chu. Inza an hlaw a, mipuiin an thlawp a, an invawng ṭha bawk a a nih. Saw sawn a khaikhawm tawl a ni saw tie... Kohranin a khaikhawm an le Mizoram ku sawh. Chu chu ei ni rawi hin ei thei ve naw ding? Ei tum phawt chun ei thei ding a nih. A harsa khawm ring a um nawh. Tuhin ei hnam sûnga pawl inlangsar pawl le ei i hmang tak hai chu HYA le HSA hi an nih. Hieng hai pahni hi hnamah a ṭangkai naw bik an um naw a, an ṭangkai ve ve a, ei Hmar hming put ve ve an ni bawk leiin ei hnamin ei sawrin ei ṭangkaipui em em an ni maw. Hmun dang le ram dang a ding lem chun anni bo hin ei khawsa thei naw a ni tak.
Chuong chu a ni a, hi nek a hrat lem le inthuruol lemin iengtin am thaw inla a ṭha hmel aw? Ngaidan pakhat an lang chu hi hi a nih. HYA-HSA le ei i hrilsa lo Val-Upa, VA hai po po hi um ta lovin pakhatin khaikhawm ve vawng el ta sienla a ṭha ring a um ngei maw. Hi kuhi ei ṭhang dawk ve na ding le ei inthuruolna lampui ding chu a ni el ta dim chu aw...? Hieng hai po pali hi um ta lovin HYA tawpin amanih ( a dang khawm nisien pawl khat kha ni hrim hrim sien ) infûnkhawm vawng el ta inla chu aw ngaidan dang dang hai hung tlawm a ta, chu ei zuk inkawpna ringawt khawm ku chu pumkhat a mi hung siem nghal ni bawk a ta. A Hmar hnam phekin ei zawm a ei thaw thei nghal thil dam a ni chun, chu chu a ni el naw dim a nih inthuruolna, lungruolna hnar hung inṭanna ding hnai tak el chu. Anachu, hi lai chung thua hin a hming bo lem ding le inphahnuoi lem ding hi ei um nuom ring a um naw nghal a chu chu a hung harsat nawk nghal na a ni nawk pei a nih. A buoithlak tho a ni maw. Annawleh, a hming hi a bo bik um ei nuom hmel tawl ring a um sie naw leiin a rengin sukbo vawng inla hming thar phuok el inla a ṭha law law lem el d$m chu.
Hi ngaidan tak el hi chu thil harsa tak pakhat chu a va ni ve de aw ti chu chieng takin ka hriet ve. Anachu aw, Kohran hmunkhat a siem tum nek chun chu hi thil hin ngawr a nei ṭha ka ring lem tlat chu tie. Hienga a hnam phûk Organisation pakhatin a mi hung fûnkhawm ta chun chu hmabak chu a hung ṭha pei ring a um a nih. Anachu, hi thil intlung tir ding hin ei in ring (Ready) tawl chie am? Ei inbuotsai am? Chu chu ei nia an nghat a ni a, tukhawm inthuruolna ti thumal hi a tak a dit tak tak tu hai chun tlawm khawm ei ngam ding a nih, mi dawp a kûn a ṭul le kûn ei ta, inngaitlawm le inthuhnuoirawl a ngai a ni chun hniel nawng ei tiu. Annaw sie chun Hmar hnam inpumkhatna hi ei la dit tak tak naw tina ning a ni thei el awm ie maw... Iengtin Am I Lo Ngai Ve a Unau...?
[ Pâwl, mimal natna ding ka lo hril fûk pal a um a ni chun inhrietthiemna le ngaidamna ka hung ngen nghal. ]
