Kristienhai (ringtuhai) ta dinga hla hring le lâr tak el, ‘Lalpa berâm sâwmkuo le pakuo’ Kristien Hlabu sut thar (tonic solfa) no. 66-na hi, Elizabeth C Clephane phuok ni^wma hriet a nih. Ieng hun lai chiea a phuok am ti ruok chu hriet an nawh.
Thuhriltu hmingthang tak D L Moody-in rawng a bâwl hlak lai khan hla tienga rawngbâwla thlawptu dingin Ira D Sankey ( R Sankey tia ei hriet lâr), hla sak thiem tak el chu a ṭhuoi hlak a. An rawngbâwlna khawm a hring a, mi tam takin thlarau malsâwmna an chang hlak. Kum 1874 kum khan D L Moody le Ira D Sankey chu Edinburg khawpuiah rawng bâwl dingin Glasgow-a inthawk rêlin an inthawk suok a. An rêl chuongnaah Sankey chun chanchinbu an châwk a, a tiem a. A chanchinbu tiem phêk kil khata chun, ei hla thlang suok khi a lo inziek a. Sankey-in a hei tiem chun ṭha a ti hlê’l a; chu hla ziek chu chepthlain a pai tah a. Chu zân chun Edinburg khawpui biek in pakhatah D L Moody chun, “Berâmpu ṭha” ti thupuia hmangin sermon ngainuomum le hring tak el a hril a. A thuhril tâwpa chun a ruolpa le a rawngbâwlpui Sankey chu, a thuhril le inhmê hlê a nei miel am, tiin a hei indawn a. Chuonga thuhriltû’n hlaa rawngbâwlna nei dinga a hei phût/fiel char chun, ‘Rêl chunga hlaziek, i tiem kha sak rawh’ tiin Ira D Sankey lungrilah thu a tlung a.
A thlûk khawm la hre ṭhak si lovin a thova, rimawi bula chun inṭhungin a ṭawngṭai a. A ṭawngṭai zo chun tuta a thlûk ei hriet lâr ang hin a hung sak suok tah a. Thuhriltu, a saktu le ngaithlatuhai lungril nasa takin a tâwk a. A sak zo chun D L Moody chun a kut pharsuoka Lalpa malsâwmna hrilin an inkhâwm chu a suktâwp tah a. Chu zân chun, chu hla ngaithlatu mipuihai chauvin malsâwmna an dawng nawh a, hi hla khawm hin mals^wmna a dawng a nih, an tih. Kristienhai ta dinga hla lâr tak takhai laia pakhat niin, khawvêl um sûng chu sak hlaw takhai laia mi ni pei a tih.
A hla thu, châng bula inthawk a tâwp chen ei tiem chun, phuoktu lungril le ngaituona ding âwm tam tak suongtuo theiin a um a; indawnna tam tak lungrilah a pieng thei bawk âwm. Sawmkuo pakuohai chu tuhai am ? ti le, an laia pakhat inhmang chu tu am ? tihai chu saktu lungrila zâwna pieng thei chu nîng a tih. Hril ding le hril nuom a tam a. Amiruokchu, ei thu a sei taluot nawna dingin a baksamah ṭhamin a thlungpui chau hei hril tum ei tih. An laia pakhat ti chau lo chu Lalpa beramhai chu berâm huongah him takin an um thu ei hmuh a. Anleh. Lalpa beram huonga him taka um, sâwmkuo le pakuohai chu tuhai am ni tâng an ta le ? Hi hla phuoktu lungrila sawmkuo le pakuohai chu vâna mipuihai le vantirko tiemsêng lohai an ni ring a um. Chuonghai chu tam hle hai sien khawm Lalpa chu a lung a awi thei tlat nawh. A san iem ? Anni laia mi pakhat an hmang tlat lei a nih. ‘Chu berâm pakhat, Lalpa huolhimna tlânsan chu zawng dingin tlângram pik le hling lai khawm ni sien kan thawksuok ding a nih’ tiin Lalpa lungril ngei el chu Thlarau inhriettirnain hi hla phuoktu hin a hei khêk suokpui tah a nih.
Anleh, sawmkuo le pakuohai chu vana mipuihai lo nihai sien, an laia pakhat inhmang chu tu am ni tâng a ta ? Hril sei ngai lovin Lalpa huolhimna huonga inthawka tlân hmang chu eini hnuoi mihriemhai hi ei nih ti chu hi hla saktu phawt chun ei hriet ring a um. Adam le Evi tlûkna leiin hnuoi mihriemhai po po chu, Berampu enkawlna le huolhimna huonga inthawka tlân suokin, a min dawntu le mi ṭhuoikîrtu um lo chun, tlângram ṭium le pik lai, makhâta kîr el thei ta lo, thi hmang ngei ngei dinghai chu ei lo ni tah. Hi hla siemtu hin ringna mitthlaa a hang hmu d^n chun, intlanna sin thaw dinga Lalpa Isu hnuoiah hung dinga an siem mêk lai chun, vâna mipuihai chun, “Lalpa, a hin mi tam tak (sawmkuo le pakuo) i nei a; I ta dingin an huntâwk el naw manih ? Hnuoi mihriem tlâwmtehai chu zun tlan kher kher an ngai am a nih ? tiin Lalpa Isu chu, mihriema insiema intlanna sin thaw lo dingin an ngên a, an thlo a nih. Ei ni misuolhai ta dinga Isu hmangaina le lainatna ngaituo zing pumin a châng hnina:
Lalpa, a hin sawmkuo pakuo I nei,
I ta di’n a hun tâwk naw maw ?
‘Ahi ka ta a nih’ Berâmpu’n a tih,
Ka kuoma inthawk tlânhmang a um;
Lam rinum le ṭenbaram ni sienla khawm,
Berâm zawngin thlalêrah fêng ka tih.
ti lai thu ei hang sak tlung hin chu, lâwmin hnuk a ul naw thei nawh.
Chuongchun, ei Lalpa Isu chun, “Ka kuoma inthawka tlân hmang mihriemhai chu zawng dingin, lam rinum le ṭênbaram khawm ni sien, intlanna sin thaw dingin hnuoiah ka fe ding a nih,” a ti ta tlat. Chel ruol an nawh. Mihriema hung insiemin an ngaitlâwm a; hnuoi rinum ṭênbaram lai tlanna sin thaw dingin a hung invâi tah a.
Isu chu hmangaina le lainatna tâwpkhâwk leh hung ni sien khawm, hnuoi mihriemhai chun Ama chu an hriet si nawh. An invâk hla pei. Isu ruok chun thlalêra berâm râwl ri chu a hriet si. A mihriem siemhai chu Ama ngeiin an dawn naw hlak chun thlalêrah châu le phîngṭama thi el ding an ni si. Chuongchun, tlâng insâng tak, ṭêntui inkhawthlâkna kalvari tlâng chenin a mihriem siemhai chu a hnawtzui a. Chu tlânga ngei chun vân tieng nghain, ‘Pa, anni hi ngaidam rawh’ ‘a kin tah’ ‘tlanna sin ka thaw zo tah’ ‘lâwm ro berâm ka hmu (nâwk) tah’ tia Isu khêk râwl ri ngei chu hi hla siemtu’n ringna nakâwr ngeia a chieng êm êma a hriet chu hla’n an sam suok a nih. Intlanna sin chu Lalpa Isu chun a zo tah a, ei Pa ram tieng ringtuhai chu A mi ṭhuoikîr nâwk tah. Lalpa chu inpâkin um sienla.
Chu Kalvari tlânga intlanna sin thaw zova ngaidamna râwl ri chu, ama hringnun ngeiah hi hla siemtû’n a hang hriet meu chun, Lalṭhungpha vêla angel-hai lâwm hla, “Halleluiah Lalp’n a hmu nâwk tah,” tia zai hla an vâwr ri chu ringnain a hang hmuhin a hriet phâk hiel a nih. Châng khatnaa, ‘Rangkachak huong himnaa inthawk le Berampu enkawlna kuta inthawk tlân suok’ kha nang le kei ei nih a. Kalvari tlânga Tlantu le Sandamtu’n “Lâwm ro berâm ka hmu tah” a ti kha nang le kei bawk ei nih ti lo hre thar nâwkin, hi thu hi i tiem zo pha leh; ei hril mêk, “Lalpa beram sawmkuo le pakuo” ti hla hi, an ringin, khuongte leh i sak thei naw a ni khawm a, lungril bêkin lo hei sak nawn nâwk ve hrim hrim ta.
Hieng lâwma hla thu ṭha, a thlûk hlak chu duthusâm ni bawk si hih, hlasak thiem mimal le pâwl, Pathien inpâkna hla Album siemtuhaiin hi hla an sak hi ka la hriet (ngaithlâk) naw tlat hi hlasak thiemhai chunga ka nuorna pakhat chu a ni ve hrim hrim !!
