Tulai hnai deua Pu Ramthienghlim Varte thusep, KAN ZINNA –VI (Sakawrdai Vrs HSA khawmpui) ti thupui hnuoia thupui tenau nawk ‘HSA Khawmpui’ hnuoia ama ngaidan iemani tawk a hung phawrlang le inzawmin a selna zawng ni kher lovin ka mimal ngaidan tlawmte hang thurdawk ve met ka nuom.
Ka hril tumtak ka hril hma’n HSA Inkhawmpui rorelnaa thulut laia pakhat, ‘HSA kumpuong’ dinga INDINTHAR NAWK EITIU ti Shillong Joint Headquarters a inthawka hunglut le inzawma ‘A THA IE’ ti hnung khawma ‘CEC rel ding bawkin an sukthluk’ ti kha ‘CEC BAWZUI DING’ ti a ni lem. ‘Rel’ le ‘bawzui’ thumal hi an angnaw met a nih.
HSA hi Hmar hnam hming chawia organisation indin hmasa pawl tak le tu chena tluong taka la fe pei a nih a; kum 2014 hi kum 75 hmel a hmuna ding ‘Platinum Jubilee’ a ni der tah a nih. Sakawrdai Inkhawmpui khan hi Jubilee hi puithu taka lawm le inser nisien tia rel ve a nih a; Celebration Committee Convenor ding lai kei khawm ruot ka ni nghe nghe.
Tuithaphai hi Hmarhai bubitna ve, sawrkar le kohran pawl hnuoia kamdingna nei tamna, fak le dawn zawngna le khawsak relna kaawng hran hrana ei hnienghnarna ve a ni zie chu inphat ruol a ni nawh. Hilai biel hi hnam tukver anthawka hmasiel deu meta enin a hnam anga ei damkhawsuok theina ding a ni le ninaw ruok chu hmathlir neia ngaituona seng ei tam ring a um nawh.
Hmar hnam hminga kohran le pawl tamlem chun Tuithaphai hi General Headquarters in ei hmang deu fur a. Hmar hai khawsak le chengna state dang - Mizoram, Assam, Meghalaya le a dang dang haia member le unit nei kherlo khawma hilai biela pawl ei indin a ni phawt chun hnam pumpui aiawa ngir ni awm fahranin ngampa takin ‘General Headquarters’ ei in ti a. General Headquarters-a thuoitu lutak khawm, ‘President’ tia dittawk lovin ‘General President’ tiin ei inkoa; huoisen-invet tieng a kawk hman hman niin ka hriet.
Kum 2005-a Hmarkhawlien-a HSA inkhawmpui tum khan palai hai laia campaign le infuina hran um khawm ni der lovin General Headquarters thuoitu dinghai chu state dang dang le biel dang danga mihai thlang kan nita dei el a; iemani kong zawngtak chun a mi barahkhaih a, a hamhai thlak fut. Sienkhom, tu tieng tieng hin a that lem zie biel tina HSA thuoituhaiin an hriet suok pei lei mani ding a hnunga inthlang a khawm a hma neka indarin General Headquarters thoituhai chu keizar an ni ta pei a nih.
Tuithaphai lai hin General Headquarters ei inthut a; Region/Joint Headquarters nei a tulna a um nawk ang reng si. Biel dang popo hai inangrawnga enkaitu dinga General Headquarters ni siin ei hmadawm le activities hai hilai biela chauh hin an bur nuom hle a. Chuelchauh chu ni lovin, General Headquarters le Joint Headquarters thuoitu hai kara ‘clash of interest’ am eiti ding ‘sin inbattuo, inringtuo, etc’ a um hlak zie chu a tak ngeia tonhretu (experience) ka nih. Hieng ang ‘minor problem’ hi HSA chun a pumpel/fekhel thei tah el bakah, hienga biel dang danga General Headquarters thuoitu umhai hin an umna biel seng tuk le zan an ngaivenin an enkai pui theia, Joint Headquarters/Branch thuoituhai le inlaichinna le coordination tha lem a um pha niin anlang bawk.
HSA Inawp Dan (Constitution), ama Pu Ramthienghlim thanga kum 2007-a siemthat a khan HSA chu, “thuoitu pawl 3 (pathum) - General Assembly, Executive Council le Central Executive Committee inthuoa awp ning a tih” ti a nih bawh; “Kumkhata a tlawmtaka vawithum bek Central Executive Committee thurawn angin Assembly Speaker-in ‘Executive Council’ ko a tih” ti a ni bawk. Hi lei hin General Headquarters Office Bearers le CEC Member danghai inzing uta an inhmukhawma rorel chuong taluo chun a tulna a um ta naw bawk a nih.
Tulai chu technology tienga khawvel hmasawn pei zarin chanchin inhrietpawna le inbiektuona a awlsam ta hle a; thirhrui (telegram), post card, air mail, Money Order, etc, hai lem hi chu ‘tienlai thil’ anchang el chu a ni tah. Hmaisana inbiek le inrawnkhawma, chipchier taka hritlang trul thukhir le pawimaw chu um ngei sienkhom, inpaw le inringzotawn taka thuoituhai an um chun pawl thlut tamlemhai chu telephone le e-mail hmanga chingfel thei a tam lem tah. Committee ti leia rem le remnawa mi 2/3 chauh khawm ni inla; chair-in Bible tiema tawngtainaa hun hawnga,secretary in agenda ngir puma tiemdawka; mani ngaidan hril nuomhai khawma ngirpum ngeia hril zoa, member pakhatin tawngtainaa hun suktawp kher kher hun kha tha tulai thangtharhai hin an ngaina ta kher naw khawm nisien a hawi.
April 21-a HSA Executive Council thurel pakhat lem chu – “Tuta inthawk chu HSA General Headquarters levela information inpeksawng na dingin electronic mail (e-mail) le SMS hmang ni ta hlak sien ti ania; Churachandpur (Manipur) Post Office-a HSA Post Box (No. 52) ruok chu a ‘fee’ khawm a tam chuong naw leiin la sukhring nisien ti a ni bawk.
Khawvel le a sunga chenghai ngaidan le khawsakdan hi an thlak danglam pei a na; chu chu zawm vea ei hnam le pawl ei inthlakdanglam met met hi a ni ding reng niin kei chun ka ngai.
HSA Inkhawmpui le prokram danghaia khuollien le mi pawimaw danghai an hung mumal ngai nawa; prokram phuisui taka siem nisiea buoinuoia a um vet thu hi chu keikhawm ka beidawng pui tho: Thuoitu thar pei haiin an la hung hmasuon ding chu ni tah phawt el naw ni’m.
HSA member za peia sawm (10%) vel chauh-in website le internet umzie hrie ni anga hril hi chu ka pawm naw bawk.
I ditsak,
Dr. John Pulamte
Former President, HSA, Gen. Hqrs.
Imphal; September 5, 2012
