Ccpur: Tv. Jacob Malsawmlien (17) S/o Lalnghakzing of Pherzawl chemte in dawt hlum a nih. Chanchin dawng dan'n, Jacob hi Rengkai Road a in hluoa um, Vision Academy a Class XII inchuklai ania, zani zantieng (May20, 2012) dar 8:45 velin a in hluna SA Road a RK Hmar campus ainthawk'n Rengkaia a ruolpa kuoma text book la dinga fe ania. Rengkai thlanmuol ainthawka hlalo Rengkai Govt. School tlang deua lampui kawina culvert bula pasal pakhat'n chem in a dawt a nih. Ama hi lawm pum'n phone a thaw zinga, pasal pakhat le intuok'n, pasal pa chun "Lighter i nei am" tiin an dawna, Jacob hin "dumziel ka hawp ngai nawh, ka nei naw ie" tiin a dawna, chuleinruol chun pasal pa hin a chemte chawiin a phingnem takah a zuk sun el ni awm a nih. Pasal pa vek hin a phone chu a lak pek a a tlansan ngala, chu phing leh Tv. Jacob hin a chemte chu phawi dawkin, Rengkai tlanmuol chen a la hnawt nghe nghe a nih. a thisen a put nasa taluo leiin a hnawt thei ta naw a, a chemte chun a la deng nawk nghe nghe a nih.Churachandpur Dist.Hospital panpui nghal a nia, sienkhawm doctor remchangnaw leiin RIMS Imphal tieng an fe pui nawk nghala, vangduoithlak takin a natna tuor zo naw leiin zing dar 5 vel khan a lo boral ta a nih.
A ruong hi Churachandpur hung phur kir hnung'n District Hospital ah Post-mortem thaw a nia, hienga an buoipui sung hin bieltu MLA Vungzagin Valte le mipui tamk'n an uopa, post mortem thaw zo hnunga Rengkai Community Hall ah a ruong hi sie a nih.
Tv. Jacob thina lei hin mipui boruok chu a sosang hlea, CCpur sunga dawr po po le school hai khawm khar vawng a nih. Mipui lungsen fe khawm hai chun lampui hai an danga, tyre hai an raw. Hi thu le inzawm hin HSA, HYA le CDSU hai inthung khawmna nei nghal a nia, a ruong hi a thattu man ani hma chu laklo ding ti hai chen khawm thu a uma, amiruokchu CCpur DC in hmalaktu hai kuoma ngenna a siem ang'n a ruong hi lak ania, hunser hmang zo hnungah vawizantieng a ruong hi an vengtieng panpui ning a tih. CCpur DC ngei khawm a ruong hung en'n Rs.50000/- in a ral nghe nghe a nih.
CCpur DC hin hmalatu hai kuoma nithum sung hun pe ding'n a ngenna, a thawtu chu man ngei ding'n thu an tiem!
[caption id="attachment_8635" align="aligncenter" width="600" caption="District Hospital tuola mipui pungkhawm"]
[/caption][caption id="attachment_8636" align="aligncenter" width="600" caption="Bieltu MLA , DC le a rawi hai"]
[/caption]
Image Source: Zogam.com
