I hmingiset thup bona ding ani phawt chun, unau le unau kara inthatna, pahnam le pahnam anga kar neina, Hmar nau laia thalai thina intluntu, inrawt chimit khawm pawi ti derlo mihriem chu ieng ang piengthar am i nih a? I tawng theinaw laia lakh sawm tel finance a i demand lai khan Pathien thlarau in am a pawl che setan thlarau?
Kum nga (5) awr eiin kawp sung khan Hmar Political Ideology i mi hril pui nuom der naw kha i chieng kuong naw lei am hril ding I hriet naw lei? Hril pui tlakah i mi ngai naw a ni? Chief le chu ti ti dunna thatak kan nei hlak si a.
Nang le kei leadership a buoi anga chinchinbu a insuo hlak kha ka lo tiem ve a, Manipur MLA election a i buoi angin ka buoi ve ngai bawk nawh. Assam Panchayat inthlangna chen khawm sum hmuna ding ani chun inrawl hlak pa khan council in a rel thak lo (Assama ei hnam inrelbawlna dinga pawimaw derlo) Ind. Candidate in support kha iem a san? I kid indik takin lockup a tlung pha ni lo? A suok nawkna dinga hra puta pu hai kha iengmalova i ngai hai kha an ni lem naw maw? Dawn fel ding i hau taluo.
I khel hrilin an huol khum vawng t ache a. I ta dingin suok nawkna ding a um ta nawh. Sum duna leia Pathien hing i samna po po, beram sun i silna kha danglam ngailo Pathien chun hun tawkah a ngai a ni el ta naw maw? Muolpho dan chikim a i muolpho hun a tlung el dim
Israel lal Suala khawm kha Pathien hrieknal ani ang ngei a Lalpa ti puma mipui rawng a bawl sung chu hmingthatna tinreng an khum tira. I hun a tawp ta ti Council in a hril che khawm pawisa lova kei, Council member laia i zuom tak a sie maw po po i min khumtir tum hi ei biek Pathien hringin a phal ta naw hul huol. Ngaituona fim i nei thei ngai ani chun inngaituo rawh.
Nikhat ni a i rawipa lekha i hung insuo tir kha ka lo hmu ve a, Aizawl-Berawtlanga ei hnam banpui indik tak laia mi chungchuong bik Pu Dr. Lalden naupa Isak a thina chungchang i hung hrila. HPC ‘D’ ka hung zawm va hma a thil a nih a. Iengkhawm mi hril der lo che. Ei commander laia fel chungchuong Oliver i tir ti khawm ka lo hriet ve naw hrim hrima. President i ni angin supreme commander I ni bawk si a, i thu/i phalna lova thil thaw thei an um am? I direction dungzuia thil thaw chau an ni leiin Lusei ha’n “Buichhe laih lo a inpuang” a ti ang kha i hawi bek bek naw maw?
RAWTNA pahni chau ka siem ang hi pawm ngamla, Hmar hnam damna dinga ka rawtna a nih.
Rawtna 1: Nang le kei inremnaw tak anga i suk lang hai hi Hmar hnam inremna ding chun ei pahni’n mipui po po hmuah mi khaihlum hai sien, nang le kei inrem ngailo ei inrem tlat chun, inremna dinga khaikanga ei um tlat chun Hmar nau po po inrem tang an ta. Aw, a van hawi awm ngei de!
Rawtna 2: Nang le kei nina inchu leia buoi a lo ni pal hlau a ni chun- nina inchuna lei a tlangval tam takin hringna an chan nek chun President i tlin nawna anga Council in impeach a thawna che pawm la, kei khawm ka nina po po hlipin Hmar hai inremna ding lampui kawt chu ei hawng a tha naw maw? Thangthar thalai fel lem le thiem, ram le hnam tadinga in pe hai lampui daltu ei ni pal el am? Nang le keiin ei nina hlip ngam ve ve dingin Hmar hmingin ka ngen che.
-H.Zosangbera, Chairman, HPC ‘D’
Dated 02, March, 2012.
Source: Hmasawnna Thar
