Tuta, liem tah, Manipur MLA inthlangna a, kei tlinglo le hratnaw tak, Pathien hminga ṭhahnem mi lo ngai puituhai, kan inzinna khawtinah mi lo buoipuitu, khawtlâng ṭhuoitu- Village Authority, Val-Upa, H.Y.A., H.S.A., H.W.A.-hai, mimal sum le paia mi lo ṭhangpui tuhai le ṭhahnem ngai taka mi lo ṭawngṭai puituhai po po chungah Pathien hmingin lawmthu ka hung hril tak zet anih, Pathienin malsâwmna tam tak a vurin ṭhuoi pei raw se cheu.Pathienin rem ati chun Ruonglevaisuo hmunah hin, eini, Hmarnauhai hin, hi lai hmun hi, ei ram, ei tuolchaina a nih ti hrietzingna di’n, tiena Israelha’n Joshua rawia Jordan an kanna zâwna lung an intieng khawm angkhan, Hmar hnam po po hming chuongna lungdaw tum a nia. Chuleiin, hi tak a dinghin chu pawl, kha pawl ti umlova, ei ram, ei hnam chîmral a ninaw nadinga inthuruol tak a hma ei lak theina di’n Pathien kuomah ṭhahnem ngaitakin in ṭawngṭai pui intuo’ng ei tiu, tiin ei in ngên tak zet anih.
Pathienin damna le hriselna ami pek si hin chu, theitawp suo a, ei pi le pu-hai sulhnung, hieng Lalruong sulhnung, sikpui lung le a dang danghai humhim hi ei thaw ding pawimaw tak anih. Chun, ei tuolchaina khuo ṭhenkhat Vai (Hindi) ṭawngin sawrkara record a ni el hai dam hi!, eini Hmarha’n a hming ei phuok dan ngei a sawrkar record a sie lut ni sien, ti hi ei nuom dan anih. Entirna’n “Tuisen” ti hi sawrkar record dan chun “Lâlpani” ti ani dai anih. Chuleiin, in ṭawngṭai pui intuo ei mamaw tak zet anih.
Pathienin rem a ti chun, thei tawp suoin, kumtin, vawikhat bek biel fang tum ani a. Ei ram, ei hnam, ei kohran, tiena Jerusalem kul ang el a chim ta hnung hi indintharnawkna ding chun Pathien chau naw chu, unauhai, innghatna ding le suong ding ei nei le. Suolna sûmpuiin ei ram a bâwm mêklai hin, nang le kei ahin Vân Saron, Lal Isu hi Nisa anga ahung varna di’n ṭhahnem ngai takin in ṭawngṭai pui mawl mawl ei tiu.
Pathien le A ram ta dinga inṭhahnem ngai pui,
Ngurrivung.
