A chang chu ieng leia nunghak lungril inhne thei naw am ana / an dit thei naw che am ana / an hmangai thei naw che am ana? Ti hai hi ilo ngaituo ve hlak chu ka ring. Nang a neka hmelsie, zeilo le tawngkam thiemnaw pa khan iengtin am i nunghak dit em em, i thei tawk a i buoipui nu kha awlsam deuiin a zuk hne bik el thei am ana? A nunghak hai ditzawng in naw lei chu ni nawng i tih, pasal dang hai kha an hmel a tha bik lei khawm ring a um nawh. Nuhmei lungril hi pasal nekin an nem lem ti hi hriet ding a nih. Nuhmei/ nunghak lungril hne dan thenkhat ka hung tarlang hai hi i zawmfamkim chun i dittak le i hmangaitak lungril chu i hne thei ngei ka beisei.
Nuhmei pan, hnai le biek tan dan ding: Pasal in nuhmei/nunghak va biek hi thilmak a ngai ding an nawh, hi hi society fe dan reng a nih. I dittak chu huoisen tak’n pan chawt la/bi pap el rawh. Nuhmei hin pasal zuk biek hmasa ti vel hi an inzak hlak leiin, an biek hmasa che in chan ngai naw rawh. Alo dit hle che ni khawm’n mi pangngai alo ni chun pan hmasa ngai naw reng reng a ti che. Chuleiin, a dit le ditnaw ding che a buoi lovin nang’n i pan/biek hmasa a ngai a nih. Nuhmei ei zuk biek hin thil pahni char a um thei a um:- an mi hnawl thei a, an mi pawm thei bawk. Mihriem reng reng chu mi’n an mi hnawl hun hi a um ngei ngei hlak. Chulleiin, hnawl ding ti lova va pan chawt el ding a nih.
I mizie sukdanglam ngai naw rawh: Pasal tam takin an thaw suol rawp hlak chu mani mizie ni lova mizie siemfawm a um hi a nih. Nuhmei hin mi titak, mi indik, thudik tan mi an dik hlak. In ringzo takin i nina ang ang khan um tawp el rawh. Nuhmeiin i nina indiktak kha a nih an hmangai lem ding chu, i mizie siemfawm kha sawt dei ngai naw nih, an hriet dawk hun a la um tho tho hlak. I nina bak bak nuhmei kuoma hril ngai naw rawh.
Incheidan le insukfai ngaipawimaw: Nuhmei hin taksa sukfai le thuomhnaw hi an ngaipawimaw lei hin i fimkhur a tul hle nih. Chapel/pheikhawk/ke bal deua nunghak leng chu a scoring hmel naw hle. I thei ang tawk tawk in i taksa vawng tha hlak rawh. Chun incheidan ah khawm fimkhur a ngai hle, a nunghaknu nal ti zawng le a dit zawng hriet a tha. Pheikhawk bal deu bun pum’n nunghak leng ngai naw rawh, a mak ve khawpel, nuhmei hin mi pheikhawk bun hi anlo en hmasatak hlak an ti chu.
Nuhmei ngaisak, duot dan thiem a pawimaw: Mi duot thiem deu le an beidawng changa mi ngaisak/ thawidam thiem mi hi nuhmei hai hin an ngaina hlak. An thil hril hai hi tha deu’n i ngaituona pe pek hlak la, an beidawngthu an inzawt khum pha che khawm tosan el lovin a thawidam dan ngaituo hlak lem rawh. Nuhmei hi pasal kuoma insek hi an hmang a, hieng hun ahin i lo buoi deu a ni khawma tha deu deua biek a suk lungawi hlak ding an nih.
Buoina dang I nei naw phawt chun a pawimaw hun hun che a in hman pekzie hlak rawh. I hun awl remchang a “I dam tha maw” ti bek phone a inthawkin indawn hlak ding, chuonga i thaw chun i ngaituo zie kha a lo hriet ve hlak a nih. Amiruokchu hun sawttak tak inbiekpui ngai naw la, i dit taluo suklang ngai naw bawk rawh. Nuhmei hi mizie maktak nei an na, remchanga lain anlo kawi nuom in an lo insek nuom hlak ti kha hriet zing a tha. A nuhmeinu lungril hrechieng si lova, hmangai le duot ti leia sex thila hun hmang kawp kher tum ngai naw rawh, chu nek hman chun ngaituona lungrila i hmangai hi a hlu lem a, a dei sawt lem hlak a nih.
Inpak hlak rawh: Mihriem hin inpak ka nuom nawh ei ti hlaka chu a ruk deua inpak lawm vawng ei nih. I hmel a tha de, I fel de, i sam chu a nal de, i mawi chuong ngei, lalthakim, khawvel sukmawitu i nih etc.ti hai dam hi a nep ti inla khawm nuhmei hai lawm zawngtak a nih ti kha hriet zing ding. Thil pakhat hriet ding chu an umdan le an incheidan hai hi inchik tlat hlak la, a dang met i hmu pha inpak ngei ngei hlak rawh.
Venghimna, thlamuongna an mamaw: Nuhmei hin an ngaizawng hai bula an um pha hin an thla a muong em em hlak. Chuleichun, an beiseina kha suk hlawsam pek ngai naw rawh. Nuhmei hin ti ding hi an nei rawn bik ti hi hriet zing ding. Lampuiah an khata an lawn ding nek chun i thei phawt chun fepui/thak hlak rawh. An ti/thlaphang huna duot deu’n enkawl hlak la, a thei lem chun an dara kuo hlak rawh, khanga i thaw khan an thla hi a muong em em hlak a nih. An beidawng hun le an tap huna i dar annawleh i awm innghai tir la, innem deuin thlamuong la, an sam annawleh an darah tuoi pek hlak rawh.
Taksa suk tha rawh: Nuhmei hi a tlangpui’n pasal sa tha deu met le piengnal hin an mit a lak deu a anga, chuleiin i thei ang tawk le i hriselna phaktawk’n i sa suk that tum rawh. A lo tha rak naw ani khawm’n in ngaitlawm chuong naw rawh.
A mizie, nuomzawng le a ditzawng hai hriet tum rawh: Relationship tha dit si chun i ngaizawngnu mizie kha hriet hne tum la, a ditnaw zawng thil reng reng thaw tum ngai naw rawh. A nun a hlim i dit si chun ngaidan alo in ang rak naw khawm'n a lawmzawng thil hai kha thaw rawn tum bawk rawh.
Thil pek ngaipawimaw rawh: Nuhmei lawmna hi chite ani leiin thil pekna kawng hi ngaitha lo ding a nih. A birthday le ni pawimaw thenkhat inchik hlak la, hieng hun ahin thil a tha am, a tha naw am pek ve hlak reng reng ding a nih. Entirna ding’n sum tieng harsatna a tuok chang a phone zuk recharge/top-up pek zo hai dam kha thil thaw chi tak a nih. Ama ta dinga inpekzo zie a suklang ding a nih.
Mani nghirhmun sukdet/siem: Tulai khawvel ei hmang mek a hin chu hmangaitak hai le bahra khur ti policy kha chu a fe bek ta nawh, chu nek hman’n dittak hai le Maruti Car sunga ti hai dam hi a fe ta lem. Chuleiin, mani hmangaitak hai chawmna tawk le insung indin theina khawpa thlatina Gandhiji Lu lakna ding nei kha a pawimaw lem an tah. Nuhmei khawm’n an hmatieng thil ding hi an thlir ve kar ani leiin thang lak nasa a tul takzet. Amiruokchu, i sin nei hma, inriengtaka i um laia lo hmangaitu che kha maksan ngai naw rawh, sin i nei hnunga hmangaitua in sal hai kha ringzo tak tak ding an ni nawh ti hi hriet zing ding a nih.
Thildang hriet ding: Ngaizawng i nei ta si chun, i lungril po po pe tawp el raw, nunghak dang chu mel kai tha ta naw hleng a tih, thil reng reng a titak deua um hi mi ringum hai thawdan a nih.
A thikthu alo sie deu khawm’n ngainawtieng ngai naw la, a hmangai zie che a suklangna a ngai lem rawh. Mi lai i ngaizawngnu inzapui ngai naw rawh, chu nek chun inpak lem hlak rawh. Thil pawimaw pakhat chu, thukhel hril ngai reng reng lo ding, a hnunga sietna intluntu mei mei in an chang hlak!
--------------------------------------------------------------------------------------------------------------
29.03.2013
Hmangaina Run
