Anih,nitin insung khawsakna le taksa khawsakna ding ngaituoin mitamtak mani tawk tawk a buoi le chawl thei lek loa hringnun kal chawi in ei buoi mup mup a.Chuong lai zingin hringnun umzie iengkhawm engtona nei der lo a,thawveng em em a,um khawm ei lo um tho.Mihriem a tunga ngir taphawthai inang vawng anta,ngaituona khawm inang vawng ata,ditzawng chenin ti ziek um chuong lo chu.Ieng lei am?Khawvel a ni tlat!Abikin,harsa le vangduoi bik rieua inhrietna mani ah,a hung tlung phat hin a nih.Mi popo neka vangduoi bika inhrietna a hung um a,hi khawvel hi mani ta dinga ṭawngsephur bik rieua hrietna lientak sungrila a hang in tu tak tak ni hin chu thil iengkim el le,ei hmabaka la hung in hersuok nawh pei dinghai chen hang ngaituo lem hin chuh.Lungaina a tlangpui ni tho tho a tih,ti chang hi hmabak a la hung ni nawk ta rawp hlak a ni.Kei lem hi chu mi neka vangduoi lem le harsa lem,thiemnaw le inhnuoilem ni a in ngaina lientak ka lungril a in tu nghet tlat hi peitlak harsa ka ti em em a.Chuleiin,mani a mang angna a hung tlung changing tuorthiem intak ka ti hlak.Hieng anga ngaituona tawitak le buldeu,innghatna ding iengkhawm um naw a ei in hriet lai tak hin a ni……..Iengtik lai khawma milo tlatlam ngailo tu,ei hrietfuk naw lai khawm a milo hrefu zing a,milo umpui zing hlaktu,mala min umtir ngailo tu “LALPA” kuoma ei hang tlulut hin chu,hrietthiem nawhai khawm hrietthiemna le hadamna ei hmu hlak.Chuong an naw chun,Setan’in remchanga lain,ei ngaituona buoi le harsatna anthawk in,inthim a khawm inthim nawk zuola mi hnuklut a lo tum ve zing hlak chu.Hi hi hringnun khawvel ei ni mihriemhai suksuol lei a ṭawngsephur hmun ei hluo ding a Lalpa’n a mi lo tiem pek nawk chu.Chuleiin,thlarau a sip mihrang lo fe tahai in thlarau inhrietirna ngei a hla ropui tak tak an lo phuok nasanhai chu.Hi thuruk hrethiem tuhai hai le a bel ding tak bel tuhai hai ta dinga hrietthiem dinga ro phumruk chu.Nang,kei a ta dingin inhawi in,inhawinaw bik naw nih.Hi thlaler ram tawl a hin,harsatna le buoina tamtak ei hmabak a hin mi hmuoktu an lo la um zing tho a nih.A tlung ta le la hung tlung ding chenhai khawm.Ei chan dinga ruot,Lalpa’n a mi siem pek chawl hadamna hi thlaler khela I chan ding I ngaituo hun a chu hlimna thuruk nei ve ngei I tih.
Thlalêr ka khêl hma chun,
Buoina tamtak tuok ding ka nih;
Lungaina thar la tlung ding le tuta,
A tlung tasa khawm,
Vân lâwmna chun ṭhal tui angin a suknêm thei.
THINA JORDAN
By:-Rev.Thangngur
