IMPHAL: Zani zing dar 7 a inthawk khan Manipur Assembly Constituencies 60 haia vote thlak ṭan a ni a, a pumpuia vote tla percentage chu 82 niin PTI chun a hril. Amiruokchu, zantien dar 3 hnung khawm khan Polling Stations tum tum haia vote thlak ding mi an la tam hle a, vote tla percent hi tuta nek hin a la tamlem el thei. Chandel District ti lo Churachandpur, Tamenglong, Ukhrul, Senapati, Thoubal, Bishnupur, Imphal West le Imphal East District haia chun buoina neu neu ti lo chu buoina lien tak a suok nawh.Zani zingkar khan Chandel District a Chakpikarong Sub-Division sunga Thampi Polling Station chu ralthuom ṭha tak tak chawi helpawl ṭhahnemtawk takin an va kap a, mi 7 an thi a, midang 2 an hliem a, Helicopter hmangin Imphal phurtlung nghal an nih. Thina tuokhai lai hin Civil mi 1, CRPF 1 le Polling Personnel 4 an ṭhang. Hliem 2 hai hi Civil mi ve ve an nih. Chun, Chandel Distrit a Moreh-ah nupui ruolin EVM 2 an suksiet leiin nupui 5 man le hieng Polling Station haia hin repoll nei dinga ti ani baka Chandel District-a hmun dang 3 haia EVM suksiet le hieng Polling Station haia hin repoll nei dinga ti a nih.
Zani zantieng dar 3 chena Doordarshan Imphal Kendra le All India Radio (AIR), Imphal Station han report an dawng dan dungzuiin vote tla tamna tak chu Thoubal District a ni a, vote tla zat chu 82.45 percent a ni a, vote tla tlawma tak chu Churachandpur District niin vote tla zat chu 32.94 percent a nih. EVM hai District Headquartershai a tlung ṭan ta a, zani zan le vawisun hin a la hungtlung belsa pei ding a nih. EVM hai hi District Headquarters tinah Central Paramilitary Forces Company khat pei vengna hnuoia sie ning an tih.
~HmasawnnaThar
