Responsive Ad Slot

HPC (D) mi 60 in January 24, 2012 ah ralthuom an intung ding

Sunday, January 15, 2012

/ Published by Simon L Infimate
GUWAHATI: HPC(D) le Assam sawrkar chun Assam-a Hmar hai Political Demand sukpuitlingna lampui ngaituoa hriltlangna tluong takin an fepui pei a. January 14, 2012 khan Guwahati-ah HPC (D), ṭhuoituhai, Hmar Leaders ṭhahnemtawk tak le Assam sawrkar palaihai chun inbiek ṭan dan ding le hmalak pei dan ding hai hriltlangna an nei nawk. Hi dungzui hin January 24, 2012 khin HPC(D), Assam Region chun Guwahati hmuna silai intung an tih. Hi hunser hmang le hrepui dingin Union Home Minister, Pu P. Chidambaram chun khuollien ni pumin hung ṭhang a tih. Silai intung nia inthawk ni 15 sungin ‘Political Talks’ ṭan a ni ding niin Assam sawrkar chun a hril. “Assam-a Hmar hai Political problem chu silai sie thlak/intung a ni a inthawk kum khat sungin chingfel dingin riruongna kan siem,” tiin Pu K. Sarma, Assam sawrkar palai chun a hril.

HPC(D) chun ‘Charter of Demand’ Assam sawrkar le Centre-a a peklut dungzuiin Assamah Hmar hai ta dingin ‘District’siem dingin an ngena. Hmatienga inbiekna ding chu ‘Tripartite Talks’-Govt of India, Govt. of Assam le HPC(D) a ni ngei ding thu Assam sawrkar palai chun a hril.

January 24, 2012 a silai siethlak huna hin HPC(D), Assam Region chun cadres 60 pesuok an ta, silai dang dang baka Sophisticated silai 30 chuong an intung ding thu Elvis L. Hmar, Vice Chairman, HPC(D) Assam Region chun a hril.

“ Ei ram, ei hnamin hunbi pawimaw tak Pathien zara ei sir mek hi tukhawmin ngaipawimaw a, ṭawngṭainaa lo san dingin Elvis L. Hmar chun tiemtu hai a fiel.

Source: Hmasawnna Thar
Don't Miss
© all rights reserved
made with by Simon L Infimate