Advance Christmas ti hi Hmar Tawng am a ni aw ti ding hielin mitinin ei hriet lar em em el a, eini rawi hi chu thil ei hang hril khawm hin Sap Tawng chite bek ei belsa naw hin chu ei hrilzo thei ta naw’m a ni aw ti ding hielin Sap Tawng hi ei hmang nasa tah a, Pitarhai chen khawma Advance Christmas hi ei Tawng ang elin a umzie hi ei hriet lar ta a. Mi tam takin Pathien Thu an hang hrila, Hmar Tawng hi ka thiemnawa ei hang ti hmasa el tahai dam hi a awm tho a nih. College ka kai laia ka ruolnu pakhat chu Mizoramhai pasalin a nei a, Mizorama thlahni a hang um a, a hung suk nawk chu Hmar Tawng a theinghila, a buoithlak ziet tawpel chu! Ei piengpui Tawng khawm thiem si lova Tawng dang ei hang thiem lem em em el hi chu a mak ka tia, awi intak khawm ka ti nghe nghe hlak. Ei Tawng hi thiem ei ta, chu chun Sap Tawng le Tawng dang danghai khawm hi ei thiem ding chu ni awm tak a nih.
Iengkhawm nisien Advance Christmas ti hi ei Tawng pakhata ei hmang ve hrim hrim chu a ni ta awm a, ei tawng ei suk hausakna pakhat khawm ning a ta, lawm aum reng reng. Sienkhawm Advance Christmas tia Christmas tawm zata ei hmang hlak hi ei ti dik chie am aw ti hi chu ngaituo chieng vang vang inla chu nuom a umin ka hriet a. Mi tam takin Advance Christmas nilovin Advent Christmas ti lem ding a ni ei ti hlak a, Advance am Advent ti ding hi kei khawm ka buoi em em hlaka, a thumal hung suokna dam ka ngaituoa, a ienglem am hmang ding ti hi ka buoi deu deu hlak a. Grammar dan taka, chu chu hmang lem ding a ni ti khawm hi a um biknaw chu ning a ta tuchen hin Pu L. Ruoivel Pangamte khawmin iengkhawm a hung hril ri chuong naw a. Chuleiin ka ngaidan tawite ka hung zieklang ve a nih.
Europe ram le Thlangtieng pang ram a hai khun chu Advance Christmas ti hi an hmang ve ngai naw ni awm tak a nih. Advent Christmas ruok chu an hmang ani ti hriet thei chun a um. ‘Advent’ ti thumal hi Latin Tawnga inthawka laksuok a nia, English Tawnga a umzie chu ‘a coming or arrival’ tina a ni a, ei ni Tawng chun ‘thil hung tlung mek’ ti inla a fie thei dim chu! Advent Christmas hi kumtin Christmas ni a tlung hma Pathienni vawi li (4) a inthawka hmang tannin Dec. 24 zan a tawp hlak a nih. A tlangpuiin Nov. 29 a inthawka Dec. 24 zan chen a hmang hlak a nih. Khawthlang tienga ringtuha’n Advent Christmas an hmang nasan deuva inlang chu Pathienin mihriemhai a hmangai luot leia mihriem anga hung insiema eini lai a hung cheng hi an lawm em leia hmang hlak an nih. An hmang dan tlangpui chu, Good Friday le Easter Sunday tawma ringtuha’n ‘Lent’ an hmang hlak hai ang deu khun Christmas hung tlung ding lo inbuotsai lawkna le lo insukthienghlimna in an hmang tlangpui nisien a hawi. Advent Christmas hi Pope Gregory – I hun lai a inthawk voisunni chen hin Roman Catholic Kohranhai chun ursun takin an la hmang hlak ni awm a nih.
Advance Christmas ti ruok hi chu eini laia ei lo phuok chawpel nisien a hawi, Advent ti khawm hi Thlangtieng pang rama Kristienhaiin tha anti anga anlo hmang el hlak ana, Advance Christmas khawm hienglai Kristienhaiin tha ei tia ei hmang el ana apawina a umin ka hriet nawh. Isu Pieng hun indik tak khawm Biblea hmu ding um chuong lo chu! Sakhuo dang phuntuhai chu an piengni chieng taka hmu theiin a uma, Biblea mi ropui tam takhai khawm an piengni chieng deua hmu theiin a um bawk lai, iengleia Isu pieng hun tak hriet theiloa a um el amani ti hi chu thil mak chu a nih. Chuleiin Christmas ni indik tak hi a hrie ei umnaw leiin Advance Christmas tiin hmang mei mei inla khawm ieng am a pawina um chuong a ta maw!
Amiruokchu Advance ti hi Saptawng a ni tlat leiin ei ngaituo hlak meia ni maw, Sorkar Sinthawtuhai chun Christmas tawm hin chu Advance Festival tiin an hlaw hi advance in anlak thei hlaka, kut sinthawtuhai khawm in an sinthaw hlaw ding advance in anlak thei bawk hlaka, an hlaw ding kha advance a anlak ani tak leiin thla a tawp phat le hlaw anlo lak advance leiin lak ding an nei nawk ta ngainawa, chu ang bawkin Advance in Christmas ei lo hmang tasi ani chun Dec 25 ni hin Christmas hmang taloin um inla chu Advance Christmas ei hmang dan hi andik ding chu nilem sien a hawi ngei. Ringtu hmasahai lo hmang hlak dan le a thu umzie ei ngaituo chet chet chun Advance Christmas ei ti chun Christmas hmang dinga ei lo inpuochana, thuomhnawthar dam, Thawlawm dam le thil dang dang ei thawhai hi inkawktir inla Advent Christmas ti hin tulaia Advance Christmas eilo hmang hlak hai hi inkawktir bawk inla a pawi hle dim maw! Chuleiin einihai rawiin Advance Christmas ei ti hi chu andiknaw deu ani ei ti el dim a ni? An nawleh Advance Christmas ti ta ngailoin Advent Christmas ti hin hmang lem ta hlak inla a pawi bek bek a um chuong dim maw?
India Danpui hnuoia kamzalenna ei nei ti hrezingin ka mimal ngaituona le tha ka ti dan chun Advance Christmas tita ngai lovin Advent Christmas ti nilem tasien tha ka ti a ni chu! Tiemtuhai iem in ngai dan a ni ve leh?
Copyright: VIRTHLI.COM retains full copyright of all published content, unless an excerpt or code snippet is attributed to another website. To republish posts, the best way to do this is with a link to this web page.
