JIRIBAM DISTRICT LE INZAWMA MIPUI HRIET DINGA PRSS RELEASE
September 12, 2011
Jiribam Sub-Division Full Fledge Revenue District-a upgrade tumna thua Vangai Biela Hmar khuo ṭhenkhat Jiribam biela laklut ding ni awma thu inthang hi belchieng dawllo, thukêl a nia, sawrkar le mipui tieng khawma rawtna a um nawh ti HNU in a puong.
Manipur Sawrkar-in Central Sawrkar kuoma Jiribam Sub-Division hi Full Fledge Revenue District-a upgrade dinga a remtina Cabinet thutlukna lekha, Revenue Commissioner-in August 2, 2006a a thawn angin tuta administrative unit boundary, hieng District, Sub-Division, Block inṭhena ramri um tasahai reng reng hi sukdanglam lo dinga a ziek a nih.
Hieng lai zing hin, Delimitation Commission of India order, January 23, 2004 khawma District, Sub-Division, Block ramrihai reng reng state a Delimitation siem ṭhat a ni hma chu ieng ang kawng khawma rîn danglam lo dinga thupek (Order) an suo a nih. Chu dungzui chun Imphal East District hnuoia um Jiribam Sub-Division chu ramri sukdanglam lova Full Fledge Revenue District-a upgrade dingin Delimitation Commission of India in November 20, 2006 khan a lo remti pek tah a nih. Pu Ibobi Singh, Chief Minister ngei khawma ramri sukdanglam a ni naw ding zie hi Patpuihmun, Senvawn le Pherzawlah chieng em em in a hril a ni kha. Chu baka chun hieng ang thukhêl vuong vel a tam em leiin bau ngeiin Chief Minister khawm inbiekpui nawk a ni a, thu umsa sukdanglam a ni naw ding zie a vel velin a hril a nih.
Mi ṭhenkhatin Jiribam Sub-Division hi Full Fledge Revenue District-a upgrade dinga nawrna a hin Vangai (Tipaimukh huom sunga) Hmar chengna khuo le ram a huomsa ding anga hrila, ei President Dr. Chaltonlien khawma remtina hming a singned a nih ti thukhêl an hril hi mihai thiltum le thil umzie ningkhawng hre phaklohaiin ama hming suksiet tumna leia an phuokfawm a nih. Hi thu le inzawm hin ei President remtina hming a sign nawh ti ka hrietchieng. Vangai Biel hi Hill District sunga um, Block hran, Pherzawl ADC hnuoia um a ni leiin Phairam (Valley) Jiribam ADC sunga lut ding anga hril hi Vangai Tribal Development Block sunga Hmar khuo ṭhenkhat Jiribam District-a lut ding hin an demand ah a ṭhang sa naw hrim hrim a nih.
Hi thu hrilthanga um hlak hi HNU chun nguntakin a ngaiven a, chuongang thil Evidence/Document hmu le hrie an um a ni chun HNU hotuhai inhriettir vat dinga ngen an nih. A ṭul anga bawzui dingin HNU an pei zing. Chuleiin, Vangai Tribal Dev.Block sunga chêng mipuihai kuomah hieng thuthang belchieng dawllo, phuokfawm lei hin lungril suksawl lo dingin HNU in an hriettir a. Chun thukhêl thedartuhai khawmin Election propaganda anga hmanga mimal sukhmingsie zawng le mipui sukthlaphang zawnga khêl hril le hlemna thu hi khêkpui lo dinga ngen le inhriettir an nih.
Chun, Pherzawl ADC pêka ei um hi thuneitu le pe theitu chu Governor ni lovin Manipur Chief Minister le a Cabinethai an ni lem ti hi hrieng ei tiu a, chuong ang bawkin tuta Manipur Sawrkar kuoma Pherzawl ADC hi District Puitling (Full Fledged District) a upgrade dinga ei ngen mêk hi mi pe theitu an ni bawk.
Sd/-
Mr. Henkhum
General Secretary,
Hmar National Union,Gen.Hqrs
