April ni 20,2010 khan SBI a Interview in ka fea, kha hunlai kha NEREFS in AGM a nei lai ani nghe nghe a. Churachandpur Branch aiawa fe ka ni leiin report ka pek a ngaia. Kha AGM Programme dungzui chun chawhnung tieng kha SBI ha’n AGM a thuhrilna an nei ding a nia. Ka Biodata a NEREFS Asst. Manager ka ni ti ka zieklang kuok a. NEREFS chanchin min dawn pal an tih ti le AGM a report pe dingin mi lo ko pal an tih ti inlau tak pum chun Interview chu ka neia.
Kan lau ang ngei chun NEREFS chanchin an min dawn nasa hlea, NEREFS in Bancassurance le Financial Inclusion in thaw dan mi hril rawh, dam an tia. NEREFS in Bancassurance kan neinaw ziet le Micro-Finance fethlenga mi retheihai ngirhmun a dawmsang danhai ka hrila. Board Chairman chun, “Keini Public Sector Bank haiin tu tak hin 9 % p.a in mipui kan peka, nangni’n Public Sector Bank a’nthawk inlak kha Office maintenance na ding, Staffs hai hlaw le profit hnawtin mipui inpek nawk ana, chu chun mi retheihai ngirhmun kan dawmsang I hang ti hi ani thei chie am ani, Money Lenderhai le in danglamna ieng am a um chuong le!” ami ti a.
“Public Sector Bank ha’n Financial Inclusion in thaw dan en hin chu Public Sector ti thlak in ninaw ziet. Mi hausahai Mercedes inchawkna dingin 6% p.a in Loan inpek lai mi rethei/Loneituhai Tractor inchawkna ding ruok chun 15% p.a inlak dam hi! Mi hausahai Mercedes inchawkna dinga Loan inpek ha’n EMI kumkhat anpek naw khawma iengkhawm hrillo cheu, Loneituhai Tractor inchawkna dinga in Loan pekhai ruok chun EMI thla thum an bat chau khawma in Agenthai kut an tuor ana. Chik taka ngaituo chun loneitu mani inthat tam takhai hi Public Sector Bank hai lei ani ti thei hiel lem ani naw maw Sir” ka tia.
Hi hi ka hril nuom tak chu a ni nawa, NEREFS hin staff tam tak kum tinin a lak thara, kum tinin staff suokdawk an um bawk hlaka, a suokhai hmun hloubittu ding hi mithiem tam tak ditsenglo a hmu zing bawk. Sienkhawm kum bul laia Mizorama inthawka staff suokdawk thenkhat ha’n an thei tawka nasa a NEREFS that nawna zawngkhawma a risiet thei dan an hriet ang popoa suk hmingsiet tuma Newspaper a hai an thei tawka an hung ziekrang el kha chu pawi ka ti ngawt el. A hrim hrim thua Media hi Third Eye of Democracy annia, Fourth Estate ti hiela ko anni bawk a. Chuleiin article le news items hai reng reng hi a ziektu mawphurna ani lai zingin thu belchieng dawllo le tangkaipui ding umlo taluo bek bekhai hi chu hre hrang thei dingin Editorhai hi fiemkhur na chang hre mawl hai sien chu nuom a um ngawt el.
NEREFS hi eini North East a inthawka Financial Service puitling ei neive sun, ei u le nauhai ngirhmun nasataka dawmsanngtu le a neitu khawm ei ni mi le sa ngei ngei ani leiin a that nawna a um pal am tia SBI ha’n an min dawn khawma a thatnawna hril ding ka hrietnaw vei le staff suok dawkhai le Mizoram Sawrkar meu khawma mi retheihai hnukhrui a hang khing el hi chu hrietthiem intak ka ti ngawt el. Khovela iengkhawm famkim a umnawa NEREFS khawm hin baksam le thatnawna khawm a lo nei thei, sienkhawm a baksam tak ngaituoa suksiet dan ding ei ngaituo pei a ni chun ei u le nau mi retheihai hnukhrui ei khing a ni ti hi hre hram inla ka nuom.
“Pu, en raw in loan mi pek lei khan ka dawr hi ka sukliena, tu’n chu a hlawk khawm ka hmu rawn met ta a, ka nauhai khawm nangni le Pathien zarin lekhahai khawm an inchuk sunzwm thei ani hi, chu huna chun ka EMI ka pekzo ding an ta a, ka thungzo pha khawm a dang mi pe nawk ro aw…………….” tia Loanee tam takhai lawmna tawngbau ka na a hin a cham zing hlak chu ti. Churachandpur Bazaar chau kawm khi NEREFS leia anthang nasat zie dam khi hmu thei hiel ani khi!Bazaar sunga dawr kai 80% vel khi NEREFS leia inthang dawk an nih. I awi rak naw a ni chun dawr thawhai/NEREFS office a hai khin an File khawm hmu thei ning a tih.
Mi rethei tam tak an damsung thlabi hlaw Rs. 7000/-, 8000/- etc nei dinga an mang khawma mang phaklo hai an thawthei tawk Sweeper, Office Attendant, Loan Recovery Assistant, Field Assistant, etc etc ti hai an hmu tawl hi a ropui ka ti thei ngawt el. Thlabi hlaw an nei thei leiin an nau ha’n uniform hakin sikul an kai ve theia, an nu le pa tar tak tak hai damin sa dam hme phakin thingpui buong dam dawn ding an hmu phak vea. Chu khela Graduate tam tak private a teacher sinthawa harsataka khawsa hai a za telin sin nei na’n an nei pha bawk. Atlangpuiin NEREFS a sinthawhai hi sungkhat hnukhrui an nia, chuleiin NEREFS hi sungkuo za tam tak fakding petu anih. Chukhela Fahra tam tak Sikul le Hostel siemin a enkai zing bawk. Naupang thenkhat lem chu an khat khawma bu khawp tawk la fa theilo, zana khawm zun le ek che hlak dam anla nih.
Manipura Hmar in Minister/MLA ei nei ta popo haiin hnam tadinga kum tam tak sunga an sinthaw le NEREFS in MLA term khat sung vel chaua ei hnam tadinga a sinthawhai hi khaikhin lem chu ka nuomnaw. Ei hnam mipui tam tak taksa mamaw ami phurhruk pek baka thlaraua ei dangcharna hai chen khawm ami chawm ana. Kohran hotuhai hrat dan ding ngaituoin sum le pai tam tak sengin Crusade/Camp hai a buotsaia, Hnam sipaihai inremna dingin silaimu kara remna sinthawin anvak a, hnam le hnam buoina kar chena khawm a hringna hiel dap ngam in unau Dimasahai lutchilin remna thu a khekpui khawma mi tam takin NEREFS thatnawna zawnga ei khek ei khek el hi chu Setan khawm a lawm ka ring nawh.
Mizorama staff thenkhat haiin NEREFS staff hai reng reng Bajaj Allianz a Insurance thaw seng ding ti chungchanga an lungawinaw lei ringawta thu hungin irsuok Mizoram sorkar chenin an so pui el kha chu thawding pawimawtak ani naw ngei. Sorkar a khawm ei nuom le nuom naw thu niloin GPF ringawt Rs. 15,000/- dam tlakhata an hung cut el chu ei lu anhai zak el, kei lem chu application ziek in, “I have a legitimate right of my pay” ka ti hiel anih. A company in a ngaituo leia Insurance thaw dinga a ti ana, thaw ngei ngei ding a ti leia lungsen chu a zie a um sienkhawm a company siet nading zawnga lekha ziek ti dam chu invethai thaw dan anih.
An executive directorin a hril angin NEREFS hi ED le MD hai ta ani nawa, staff hai ta ani bawk nawa, Pathien ta ani a ti rawp angin NEREFS hin sum le pai a mirethei tam takhai ngir hmun a dawmsang khela Pathien hrelo tlarau bohmang tamtakhai kuoma chanchin tha meiser sit vartu niin Pathien Biekin tamtak inngirtu anih. Chulein iengangin NEREFS hi suksie tum inla khawm Pathienin a hum tlat ka ring.
Mihriem damsung hi hratna leiin kum 80 ti ani sie leiin tuta NEREFS elkawltuhai khawm hi mihriem anni leiin a kum telin chau tieng le tar tieng an pan ve pei sie. An rawngbawlna ding hmabak hlak chu ala tam si leiin Siemtu nilang chu tuta NEREFS enkawltuhai hi TAR theiloa siem nuom el ka tih!.
