Hmar Peoples Convention (Democratic) chuan thuchhuah siamin, Lalmalsawma Darngawn leh a thawhpui member ten Sinlung Hills Development Council an bansan ngam chu lawmawm an tih thu an sawi a. Ngaihtuahna dik tak pu-a rorelna kawng dik lo kalsana bang ngamah an ngai tih an puang.
HPC-D thuchhuah chuan, kum 1994 khan Mizoram Peace Accord tum 2-na Mizoram sorkar leh HPC ten an ziak a, he accord hi Hmar political din-hmun siamna leh relfelna niâwm takin lang mah se, vanduaithlak takin SHDC chhunga Hmar chanvo chu tun thlenga rahbehin a awm reng si a ni, an ti.
“Democracy hnuaia fel taka rorel aiin inthendarhna hmanruaah SHDC chu a chang ta zawk a ni,” tiin, SHDC Chairman hna pawh khawvel record khum khawpa Interim period thangkhat lianzet kalpui a ni a, hei hian kawng eng kimah a fuh lo tih sawi ngai lovin a tichiang reng a ni, an ti a. Mahni tanghma ngai chunga, pumpui chauh hmachhuana he dinhmun luah tum an awm leh palh a nih chuan, hnam hmelma lian ber an ni tiin, Hmar mipui zawng zawng zai khata luang turin a chahin a ngen tih H Zosangbera, General Secretary, HPC ‘D’ thuchhuah chuan a tarlang.
~The Zozam Times