Muolhoi, April 26, 2025, Virthli (ONP): Hmar Students'Association (HSA) chun HSA Complex Muolhoi, Haflong, Assam ah 31st Executive Council an nei. Hi huna hi General Headquarters, Assembly Affairs, Joint Headquarters le Branch haia inthawkin palai an fekhâwm a, special guest pahni an ṭhang bawk a nih.
Hun hmasatakah Pu L. Rothanglien Khawbung, Assembly Speaker-in Palai fekhâwm hai lâwmlûtna neiin Rev. Samuel Lalringum Thiek in ṭawngṭaina in 31st Executive Council chu Pathien kuoma inhlânna neiin council ṭan a nih.
Special Guest Pu Ricky Lalremsanga, Chief Executive Member, Sinlung Hills Council in thuhriltawi hun hmangin thilpêk inhlânna a nei.
Presidential Address Pu Lalrosang-in pein HSA tlângtin muoltin a Assembly palaihai kuomah lawmthu a hril a, Manipur buoina le inzawma H.S.A. hminga hmalâknahai report-na a nei el bakah a ṭul dân ang peia JHQ hai khawma mani hmun senga phûr taka hma an lo dawm hlak leiin lawmthu a hril bawk. Chun Tv. Jerry Lalhratthang Buongpui 2024 UPSC Exam-a hlawtlingna a changna le inzawmin Hmar inchûklaihai popo aiin lawmpuina an hlân. Hmar ṭawng humhal a pawimaw zie uor takin a hrila, abîkin Sinlung Hills Council huomsunga ṭawng humhal a ni theina dingin CEM, SHC le a thawpuihai kuoma ngênna a siem bawk.
Hi Council hun a hin ro tamtak el an rêl a, ṭhenkhat hai chu Pu Lalhmangai Thiek Bilkhawthlir, Mizoram chu nau hau lawmpuina (nau 12) in Rs.12,000/- inhlân ding thu an puonga, Mizoram Sawrkar-ah 5th December Sikpui Ruoi chu chawl (Holiday) a puong dinga ngênna siem ding, Tuiṭhaphai thlûrbîka pawimaw Exam Centre um thei ngeina dinga hma lâk, 60th General Assembly Souvenir Board indin, H.S.A. Inawpdan Bu ennawnna le siemṭhat ti hai a nih.
Hun tâwpna takah Speaker in hmun tin ramtina palai fekhâwmhai kuomah lawmthu hrilna a nei a, HSA ṭhuoituhai chu unau ang taka inlaina a inhmangaituo zing ding, hnam le inchuklaihai ta dinga nasa taka hma lâk zuol a ngai thu hrillin rorêlna a suk tâwp a, Tv. Lalmalsawm Thiek in Pathien kuoma ro hai inkawltirna le fâk le dâwn ding hai inhlânna a nei zoin Council suktâwp a nih.
