Kolasib-ah HPC-D cadre pathum man, Sakawrdai-ah pahni an in surrender

Rep.Image

Kolasib/ Sakawrdai,March 20, 2015: Zanihmasak (19.3.2015) zan dar 12:00 khan Kolasib Police hai chun Tuithaveng, Kolasib-ah HPC (D) hel mi pathum bakah pistol le a mu (9mm) 5 an man. Virthli palai a inthawka thu ei dawng dan chun ni 19.3.15 zan khan mithi, Lalremsanga (32) h/o Chawngi, Jeribum khuo mi chu lungphu chawl-in a thi a, a ruong chu Tuithaveng In pakhata laklut niin, khawvarpui a ni a. Hi zan hin Tuithaveng Hebron a inthawka mithi In-a khawvar dinga fe mi pali hai chu HPC (D) hel hai chun lo chawkbuoiin, anni laia pakhat chu a nuom tak phone dingin an ti angin Tuithaveng Branch YMA President, Pu Seingama chu an biek ta a, Pu Ngama chun Kolasib Police hai hrilin HPC (D) hel hai chu YMA hai le thangkawpin an man ta a nih.

Pu Ngama chun HPD (D) hel ha'n an lo chawkbuoi laia mi chu pistol a tinin an hmet puok hman a, amiruokchu a tlawl hlau leiiin hringna em chan an um naw thu a hril. Mithi In fe ding hai an sukbuoi lai hin hel hai chu an inrui niin a hril bawk.

Thu dawng dan chun HPC (D) hel pathum - Paul Laldemloa @ Lala Hmar (35), Commander, S/o LC Hmar (L), Rengkai Manipur; Rualneihlala (25), S/o Tlansiang (L), Lungthulien, PS Parbung Manipur le John Lianhmingthanga @John (27) S/o Vanlalhruaia (L) Rengkai Manipur ( Sakordai, Hmarveng a khawsa mek) hai chu zani chawhnug khan Court-ah thuoi niin, District Jail-ah sielut nghal an nih. HPC (D) hel man hai hi Tuithaveng Hebron a Pu Person (52) S/o Thangliana In-ah thlakhat vel an lo um tah a nih.

Sakawrdai a ei palai a inthawka thu ei dawng dan dungzui chun ni 18.03.2015 khan Sakawrdai Police kuta HPC(D) nia inhril mi pahni - Vanhmunmawi s/o Zokhum le Lalropui s/o Hrangthansiama, Sakawrdai khuo mi ve ve chu anni le anni an inpek (surrender).

Sakawrdai CHC thawktu an indai naw hle

Sakawrdai, March 20, 2015: Sakawrdai Community Health Centre (CHC) chu thawktu pahni transfer an ni leiin, thawktu an indai naw hle thu dawng a nih. Hieng ang CHC hi dan dungzui chun Doctor 4 specialist le khum 30 um ding a ni a, amiruokchu 30 percent chauh implement ala ni a, tuhin Nurse 3 le Doctor pakhat chau an um a nih. Hi le inzawm hin VC hai chun a thei ang anga hma lak an tum baka a khuo kawl vel hai khawm incha khawma procession hai chen khawm nei an tum hiel thu dawng a nih.

Hi thu hi bieltu MLA kuomah khawm an inthlun ta a, a thei ang anga hma la dinga an tiem thu dawng a ni bawk a nih.

Vai pakhat Tinghmun le Zokhawthian inkarah that a nih

Sakawrdai, March 20,2015: Zani (19th March, 2015) dar 1:30 PM vel khan Tinghmun le Zokhawthian (Kani) Mizoram inkarah Vai sumdawng Nassir ti a hriet chu Buala s/o Lalchawimawi, Tinghmun khuo chun thatin a kuta inthawk pawisa Rs. 80,000 lai le Mobile phone iemanizat a lak a, Vai pa hi an hril dan chun Kamatiri le hmunphi la a sumdawng hlak a nih. A sum iemanizat bat intang Kani a a um zu la dinga fe a nih. A thattu pa hi ei thu hriet dan chun, ama (Vaipa) zu thaktu le thuoitu niin an hril. A that hnungin ama hi tlanhmang in Police in hun iemanichen an zawng hnungin man a nih. Vaipa hi a sunghaiin a hung tlung ding a ti huna a hung tlung ta naw leiin, Kani le Tinghmun an hei biek paw hnungin Kani suoksan thu an lo hril a,an ngai a tha ta naw leiin an khuo anthawk hung in an unaupa chu an hung ngaiven ta a nih.

A thattu pa hi Sakawrdai Police lock-up ah tuhin sie mek a nih. Vai pa hi Darlawn Damdawiin ah postmortem thaw a ni zo hnungin vawisun (20th March,2015) khan an veng tieng Mauchar lampui fethlengin an phur phei ta a nih.

Hi tuolthatna lei hin vawisun Saiphai bazar hai khawm khar a nia, chanchin ei dawng pei dan chun vai lungawilo truck iemnizat an inthawk tung mek thu dawng a nih.

Sum harsatna leiin SHDC thawktu iemanizat an ban

Sakawrdai, March 18,2015: Sum harsatna leiin Sinlung Hills Development Council (SHDC) Planning Board Members le Casual Employees (Muster Roll) thenkhathai chu Council’s Meeting Dated: 13 March, 2015 thurel angin Dated: 16/03/2015 anthawk khan a hnuoi a mi hai hi OFFICE ORDER NO.18 OF 2014-2015 dungzuiin Dated Aizawl, The 17 March,2015 ban an nih.

Planning Board Members

1. Pu Lalbieksang Varte
2. Pu K.Ramtana
3. Pu VL Awmpuia
4. Pu Risanga
5. Pu Zolienkung
6. Pu Zothanga
7. Pu Dolianchhunga
8. Pu Thanmawia

Casual Employees (M/R)

1. Tlangthanmawii, LDC, Sakawrdai
2. Lalngilneii, Steno-III, Aizawl
3. Lalremruati, LDC, Sakawrdai
4. Nelson Lalthanpuia LDC, Sakawrdai
5. Israela IV Grade, Sakawrdai
6. Esther Nunparmawii IV Grade, Aizawl
7. Khuptinthang IV Grade, Sakawrdai
8. Campthangzovi IV Grade, Sakawrdai
9. Ngurthanpari IV Grade, Aizawl
10. Lalhmuchhuaka IV Grade, Aizawl
11. Albert Lalhminghlua Rider, Aizawl
12. Lalthlamuong, Plumber
13. Lalhmingthang, Plumber

(JOHN LT SANGA)
Secretary & Development Officer
Sinlung Hills Development Council
Aizawl ; Mizoram

Sakawrdai-ah Legal Awareness Campaign

Sakawrdai, ‎24 August, 2012 (Henry L Hmar):  Sinlung Hills Joint Headquarters le Rural Resource Development Organisation thangkawp chun Sakawrdai-ah Legal Awareness Campaign huoihawt a nih.

Hi hun lawmum tak a hin Sinlung Hills Jt. Hqrs. Adviser Pu Thanglur chun thu hrilna a nei a, school naupang hung thang hai kuomah DAN hriet a pawimaw zie a hril bakah Nu le Pa, Khawtlang thuoitu le Council Member hai chen in an nau, an enkawl inchuklai hai chungah an mitthli a tla ta hlak am ti indawnna a siem el khel ah inchuklai hai chungah an lungril pe dingin ngenna a siem a. Chun, inchuklai hai hin TUMRUNA an nei phawt chun ni thei naw an nei nawh a, an tumna suk hlawtling dingin anni an pawimaw zie a hril sa bawk.

Hi hun a resource person hi Pu Lalngaihmawia Zote (1st class Magistrate) a ni a, naupang hai rights, nuhmei hai rights, Criminal case, RTI chungchang le a dang dang hai ngaithlak a ni khel ah discussion hun le indawnna le sangna hun hawng a ni bawk.

Hi programme mi suk hlawtling pektu Mizoram State Legal Services Authority chungah Sinlung Hills Jt. Hqrs chun lawmthu a hril mawl mawl a, chu laia hma latu Pu Ropuia MSLSA a mi chungah lawmthu a hril nawk zuol.

Hi hun a hin mi 200 chuong an hung thang thei lei khawm in Sinlung Hills Jt. Hqrs chun lawmthu a hril mawl mawl.

~Henry L Hmar