Pherzawl, December 12: Pherzawl District Development Committee (PDDC) huohawtnain December 11, 2025 khan Pherzawl District kum 10 tling lawmna (1st decade celebration) Pherzawl District Headquarter-ah nei a nih. PDDC in a lo rel ta angin, Pherzawl ADC Hqrs. le district-a hlangkai a hung nina lampuia sin a lo thaw dan enin, Dr. Chaltonlien Amo chu district kum 10 tling lawmna inkhâwm chun lungruol takin “FATHER OF PHERZAWL DISTRICT” an inhlân tiin Department of Information, PDDC a inthawk ei thu dawngna chun a hril.
District kum 10 tling lawmna hi Lalthlamiuong Keivom, Secretary, Organizing Committee in a keiṭhuoi a, Pherzawl district hlapui sak in hun hmang ṭan a ni a. Pastor Lalronghak, ICI in hun hawng ṭawngṭaina a nei a. Lalhmangpui Fimate, Chairman, PDDC in lawmlutna hun a hmang bakah L. Thanzam Pulamte, Secretary, PDDC a inthawk introductory speech ngaiṭhlak a ni bawk.
Hun hmang sungin Chief Host Dr. Chaltonlien Amo, Father of Pherzawl District a inthawk thuhril ngaiṭhlak ni bawk a. HWA Pherzawl chun Pherzawl ADC Hqrs. le district chen hung pieng theina dinga a sinthaw leiin Dr. Amo hi Hmar puon an inbattir.
Hun kar lakah Nk. Lalchawlkim d/o Pastor Lalthangkung, Pherzawl le Nk. Zaizaii, Faiheng Artist, Mizoram ha’n hla in mipui an inawi bawk.
Chun, Hrila, Senior Adviser, PDDC le Timothy Z. Zote, Vice-Chairman, PDDC haia inthawk khawmnin thuhril ngaiṭhlak a ni a. Hun tawpah Ramsangthang Infimate-in lâwmthu hrilna hun a hmang zoin Rev. Imanuel Serto, EFCI-in hun khârna le ruoi inhlânna ṭawngtâina hun hmang zovin ruoi kîl tlâng a nih.
District lawmna ruoi ding hin Siel 2 le Vawkchal lien that a nih. Zan hunah Dawrkawnah zan sawttak chen concert nei a ni bawk a, nupui, papui, ṭhalai le naupang tam tak an ṭhang.
