Rengkai, October 18, 2025, Virthli (ONP): Independent Church of India, Rengkai Gilgal Kohran chun October 18, 2025 khan Kum 10 a tlingna, TIN JUBILEE (2015-2025) chu hlim le lâwm takin an hmang. Tin Jubilee lâwmna hunser hun khatna hi dâr 11:00 AM in Biek In Compound ah hmang a ni a, Pu Lalthlawnpek Tusing, Secretary, Tin Jubilee Celebration Committee (TJCC) in hun hmangna hi keihruoiin Upa Hrangkhumluoi, Local Chairman-in ṭawngṭaia hun hawngna a nei a, ''Aw Pathien Nangma Chanchinṭha zâra'' ti hla mipuiin an sak zovin Rev. S.K. Songate, Chairman, ICI Tuiṭhaphai Presbytery in TIN JUBILEE lungdaw hawngna le Pathien kuoma inhlanna a nei a, Jubilee Dâr vuokna hunser hmang a ni a, lâwmthu hril ṭawngṭaina le light refreshment inhlânna Upa L. Rochang-in a nei zoin hun khatna hi hmang zo a nih.
Tin Jubilee lâwmna hunser hun hnina hi dâr 12:00 Noon in Biek In ah hmang nawk niin Pu Lalhmaṭhuoi Songate, Local Secretary in hun hmangna hih a keihruoia, Upa Romell Wilson Varte, Chairman, TJCC in lâwmlûtna thucha hrilna a nei a, Tin Jubilee le inzawma SOUVENIR buotsaia um chu Rev. Lalneikhup Hmar, Executive Secretary, ICI in a tlângzar a, TJCC Secretary in recognition & presentation hunser a hmang zoin ICI Secretariat, ICI Tuiṭhaphai Presbytery le Rengkai ICI Kohran han thuhrilna an nei a. Hunser hmang a ni sûng hun kâr lakah Gilgal Female Voice le, Nuhmei Pawl ha'n inpâkna hai thiem le mâwitakin an sak.
TIN JUBILEE lâwmna hunser a hin Rev. Lalramlawm Inbuon a'nthawkin Jubilee Thucha ropuitak el ngaithlâk a ni a, Tin Jubilee Choir a'nthawkin inpâkna hla hai ngaithlâk a nih. Rev. H.L. Laltholien-in 'Jubilee Ruoi' inhlanna neiin Bawng 2, Vawk 1 le sa dang dang that meua 'Tin Jubilee Ruoi' buotsaia um chu Kohran mipuihaiin khawp le tlei takin an kîltlâng.
Tin Jubilee lâwmna zân program chu dâr 6:30 PM in ṭan nawk niin Tv. Hrilchunghnung, Chairman, Gilgal KṬP chu hun vawngtu niin Worship Team ha'n mipui hlasak ṭhuoiin Pathien inpâk le châwimawiin hun hlimum tak el hmang a ni a, Rev. Alan L. Thiek, Awptu Pastor a'nthawkin Pathien Thucha ngaithlak a ni a, Nk. Juanita Zoparmawi, The 1st Gilgal KṬP Idol a'nthawk khawmin inpâkna ngaithlak niin Gilgal Kristien Ṭhalai Pawl han special item hmu nuomum tak tak el inentirna an nei. Hun tâwp tieng Upa Hmangthangvungin benediction hrilna le Jubilee Thingpui inhlanna a nei a, Jubilee Thingpui dâwn tlâng niin thlâkhla tak pumin ICI Rengkai Gilgal Kohran chun an tûng êm êm el, TIN JUBILEE lâwmna chu an lo hmangzo ta a nih.
