Muolvaiphei-ah Bethesda Hospital & Research Centre hawng

Tuiṭhaphai, Sept. 27, 2025 (Virthli): Muolvaiphei Rural Health & Research Centre (MRH&RC) chun vawisûn khan Muolvaiphei-a Bethesda Hospital & Research Centre hawngna hun a hmang. Hi hun hi Bethesda Chapel-ah sûn dar 12:30 PM khan nei a ni a, hi hun a hin kohran ṭhruoitu, healthcare professional, khawtlâng le hnam ṭhuoitu ṭhahnem tâwk takin an uop.

Hi hun hi Upa David Lungtau, Board Member in a keiṭhruoi a, hun hawng ṭawngṭâina Rev. J. Thanglur, Secretary, Missions, ICI in a hmang a, Rev. Dr. V. Lalnghakthang, Chiairman, Board of Governors chun lâwmlûtna thu hrilin, ICI Central Choir a'nthawkin hla ngâithlâk a nih.

Hospital hi Chief Guest Dr. Chambo Gonmei, Director of Health Services, Govt. of Manipur chun a hawng a, tlângram biel hai-a damdawiin ei pawimaw zie, hi hopsital hi alwsam tak a pan thei le healthcare services sukhrâtna kawnga hmalâkna pawimaw tak a ni thu hrilin, Bethesda Hospital hi sumdâwngna anga hmang ni lova, hmangâina neia damnaw hai enkawlna hmun ni lem ngêi sien ti thu hai a hril.

Hospital thar inhlânna ṭawngṭâina Rev. Lalneikhup Hmar, Executive Secretary, ICI in a nei a, Bethesda Choir-in hla mâwi tak el an sak a, Upa Dr. C. Lalbieksang, Vice Chairman, Board of Governors in lâwmthu hrilna a nei zovin Rev. Dr. James R. Ruolngul, Secretary, Finance & Education, ICI in hun khâr ṭawngṭâina le ruoi inhlânna hmangin hun suktâwp a nih.

Bethesda Hospital & Research Center hi 18th September 2025 khan Manipur sawrkâr chun khum 100 umna hospital anga fepui theina dingin official takin phalna a lo pêk a nih.

Chun, a khâitu tak Muolvaiphei Rural Health & Research Centre hi June 22, 2018 kum khan Manipur Governor Dr. Najma Heptulla in a lo hawng a ni a, tuhin School of Nursing, College of Nursing hai a enkawl mêk a nih.

MRH&RC hnuoia mi tho Bethesda School of Nursing (BSN) hi kum 1995-a indin lo ni tah in sawrkâr i pawm institution a ni a, GNM a'nthâwk a Bachelor-level course chen inchûk theina a nih. Hi Nursing School a inthawk hin inchûk zo tam tak um tah in India ram hmun dang dang le ramdang a chen sin hmu tam tak an lo um ta bawk a nih.

Independent Church of India (ICI) hmalâkna MRH&RC chun tuhin academic le welfare institution tienga dinga Churachandpur chau ni lo a sevêl a district dang hai tading khawma healthcare provider puitling tak chanvo sukzau pei dingin ngîrhmun a siem mêk a nih.