Parbung, August 9, 2025, Virthli (ONP): Pherzawl District Football Association (PDFA) huoihawtna hnuoiah August 8, 2025, zing dâr 9:00 AM in The 1st Pherzawl District Independence Day Trophy 2025 hawngna hunser Parbung Mini Stadium ah phuisuitaka nei a nih. Hun hmangna hi Tv. Barry Bungthangkungin a keihruoia, PDFA aiawin lawmlutna thucha Tv. Simon Barjon in hrilna a nei a, Chief Guest- Pu Zothansang Pudaite, Chairman, Village Authority Parbung a'nthawkin thuhril ngaithlâk niin Pherzawl District huopa Independence Day Trophy huoihawta um chu lawmum le ropui a ti thu hrilin, state dang a'nthawk le, hmun tin le ramtin a'nthawka hi tournament a ṭhang team hai le, players hai chu mawi taka inkhêl ding le, inkhêl mi an ni ang hrima taksa ta dinga ṭha lo thil hai hrim hrim ah insûmtheina nei dingin infuina thu hai a hril a, hi tournament hin inunauna le inngainatna intlun mawl sien, fak hmu theina khawpa players ṭha hung sersuok pei raw seh tiin a ditsakna thu hai an hlân. Pastor Jehovah L. Pudaite in ṭawngṭaia tournament inhlanna a nei zoin, PDFA Anthem sakna nei a ni a, Chief Guest in tournament hi a kick off-na a nei zui nghal.
Pherzawl District Independence Day Trophy 2025 a hin Team 12 lai an ṭhang a, Pherzawl District sûnga tem 8 hai bakah Sinlung Hills Mizoram a'nthawkin Team pali: Vaitin GSA, New Vervek GSA, Khawpuar GSA le Youngstar United an ṭhang ve a nih. Hi tournament hi League system a ṭan phawt a ni a, tu chena match results hai:
(Opening Day) August 8, 2025 Match Result:
Parbung Youth Club 1-0 HSA Hmarram
Khawpuar GSA 3-0 NSCBAV
Youngster United Mizoram 0-0 Ralngam FC (Phulpui)
Damdiei HYA 1-0 New Vervek GSA
(Second Day) August 9, 2025 Match Result:
Ralngam FC (Phulpui) 4-2 Lungthulien
Parbung Youth Club 2-0 Hmarkhawpui
Rawvakawt 0-3 Khawpuar GSA
New Vervek GSA 3-0 Vaitin GSA
Final Match le Closing Ceremony chu hung tlung ding Independence Day, August 15 , 2025 hin Parbung Mini Stadium ah phuisuitaka nei ning a tih.
