~ Lalhmuok Famhoite
Tarik 29/06/2025: Hmar Inpui thusuoka chun, “Hmar Inpui 10th Executive Council-in a rel, 14th General Assembly-in a lo namdet angin a hnuoia point pahni hai hi Hmar mipuihaiin inzataka an zawm theina dingin thusuok siem a nih” tiin a ziek a. Chun, Resolution No-4: Hmar Inpuiin “Hmar Hnam Dan” Enlarged and Revised Edition, 2024 thua thulut hrillang a nih. “Hlamzuia thi” thua hin nu sunga inthawka a thisaa pieng hi hlamzuia thi ti a nih a, chun Nu-in a hringa nau a neihai ruok chu hlamzuia thi ni naw sien ti hi Hmar Inpui ditdan a nih. Tuta inthawk chu khawlai hmuna khawm Nu-in a hring le a dama nau a nei ta hrim hrimin thina a tuok chun hlamzui thia bawisawm ni ta naw ni a, puitling thi anga bawisawm ni tang a tih ti hi Hmar mipuihai hriet dingin kan puong tiin ziek a nih a.
Hmar Hnam Dan 3rd Edition 2024 Published by Hmar Inpui (Hmar Supreme House) Bung 6 phek 19-na chun Hlamzuia Thi: “Naute a pienga inthawka thla thum (ni 90) chen dam zo lohai chu ‘hlamzuia thi’ an nih” tiin a ziek a. Chun, Mizo Hnam Dan 1st Edition, 2006 chang 31 a chun, HLAMZUIH: Nausen thla thum (ni sawmkua) hnuai lam thi chu “Hlamzuih” a ni. Hlamzuih thi chu mitthi pangngai anga khawtlang buaipui a ni lo tiin a ziek bawk.
The 10th Hmar Inpui Executive Council, 2025 thurel, 14th Hmar Inpui General Assembly-in a pawmpui ngei Resolution No. 5: Hmar Inpuiin a sut “Hmar Hnam Dan” Enlarged and Revised Edition, 2024 a man le muol thu le thu dang dang siem that ding le sut hmai palhai a ṭul ṭul ennawn nisien ti thulut hriltlang a nih. Hmar Hnam Dan sut nawk huna sukdik le siemṭhat ṭulhai hung bawzui dingin Hmar Inpui Court kutah kan pek ti a nih a. Chuong a ni lai zinga hlamzuia thi chungchanga mi ṭhenkhat ngaidan Hmar mipuihai hriet dinga puongsuok el hi a mak hlein ka hriet. Kei khawm leilung danah kum 74 ka lo chuongkai ve tah a, Nu sunga inthawka a thisaa pieng hi hlamzuia thi anga hril le ziek hi ka lo la hriet ngai der nawh a. Chun, Nu-in a hringa nau a nei suok reng reng puitling thi anga bawisawm vawng hlak ka la hriet ngai bawk nawh.
A hrim hrim thuah Hmar Inpui hmalakna hnuoiah HSA, HYA, Hmar Customary Law Review Committee, Hmar Inpui Court le Special invitees ṭha ti anga Enlarged and Revised Copies 5000 sut zo chau le English Version chena sut suok tah awlsam taka thleng danglama mipui hriet le zawm dinga puongsuok el hi Hmar Inpui General Assembly thurel Resolution No-5 sirdena le iengmalova ngaina a ni lem naw maw?
