Tuiṭhaphai, June 19, 2025, Virthli: Vawisun khan Hmar Art and Culture Society (HACS) Manipur huoihawtna hnuoia Hmar puon chungchâng a inrâwntlângna hun RWUS, Building, Top Floor, Sielmat, Tuiṭhaphai ah nei a nih. Hi hun a hin Rev. Ros Infimate, Vice-Chairman, HACS le President, Hmar Inpui, GHQ ni bawk chu Moderator in a ṭhanga, Resource persons in Pi Fimneizo, former Treasurer, HACS le Nk. May Rose, Executive Member, HACS hai hmang an nih.
Pi Fimneizo in Hmarpuon a lo riruong/design dân hai, Hmarpuon design siem dinga hma an lo lâk dân hai le an lo pawm dân hai chipchier takin hrilna a nei a, Nk. May Rose in hnam puon dang dang hai a puon le ngêi suklangin hnesaw takin hrilfiena hai a nei. Fekhâwm haiin hriltlângna hun hmangin hi hun a hin Thupuong an siem bawk a nih.
An thupuong a chun resource person haiin paper an present hai bâk ah hriltlânga umhai chu Hmar Art and Culture Society-in hma hung la zawm pei ding thu, HWA in Thla tin kâr hmasatakah Hmar Hnampuon pholangna dinga Cultural Sunday dinga an lo puong chu lawmum an ti thu, Hmar Puonhai an nina ang taka hmang uor nâwk zuol nisien ti hai a nih. Chun, Hmar hnam puonhai chanchin zieka lekhabua siem nisien, Hmar Hnam Puon chungchâng le a hmang dân ding chungchângah inrâwntlângna nei nawk vat dingin thuthlûkna an siem.
