Parbung, May 23, 2025, Virthli (ONP): Vawisûn May 23, 2025 khan Pherzawl District sûnga Govt. School hai a'nthawka Manipur Board hnuoia kum 2025 a Pâwl- X le XII passed hai lâwmpuina hunser Parbung Govt. Hr. Sec. School ah hmang a nih. Hi hun a hin Khuollienin Pi Mannuamching, Pherzawl DC a ṭhang a, hlawtlingna changhai kuomah lâwmpuina certificate le sumfai an hlân tâwl a, inchûklaihai kuomah infûina thucha ṭha tak tak el a hril. Hi hunser hi HSA Hmarram JHQ khawma uop ve in thuhrilna hun an hmang.
Lâwmpuina hunser hmang a ni zoin Pherzawl DC le ZEO chu a hranin HSA Hmarram JHQ chun Parbung Village Authority hai ṭhangin inhmupuina an nei a, Parbung Govt. Hr. Sec. School tuta nêka a function ṭhat lem dân ding hriltlâng a ni a, teaching staff mi 7 chauin Higher secondary le High School an enkâi chu harsatna tamtak an tuok thu le, mi aia thawk teaching staff hai hlaw sukpung pêk dân ding chungchâng Pherzawl DC kuomah intlun a ni a, Pherzawl DC chun a bawizui ding thu, ZEO le Parbung Govt. Hr. Secondary school a Headmaster i/c hai leh an la rêl tlâng ding thu a hril.
