Parbung, May 5, 2025, Virthli (ONP): Jubilee Standard School Parbung, Pherzawl District chun May 5, 2025 sûn dâr 11:00 AM khan Parbung RPC NEI Biekin ah, tu kum 2025 a Mizoram Board of School Education in HSLC exam a huoihawt naa an sikul naupang hlawtlingna chang hai lâwmpuina hunser an hmang. Mizoram Board hnuoiah tukum 2025 hin Jubilee Standard School, Parbung a'nthawkin inchuklai mi 16 in exam an pêk a, mi 14 in hlawtlingna changin pass percentage chu 87.5 a nih. First divisioner pathum, Second divisioner pangâ le, Third divisioner paruk.
Pâwl sâwm pasi hai lâwmpuina hunser a hin Sir Kapkhanlian Shoute, Headmaster, Jubilee Standard School chun thuhrilna neiin pawl sawm result lawmum tak nei theia an um chu Pathien zâr a ni thu, a staff hai le kohran mipuihai ṭawngṭaina zâr a ni thu hrilin Mizoram Board hnuoia a student haiin pawl sawm an in exam theina dinga hma lo latu- Baptist Christian English High School, Sakawrdai hai chungah khawm lâwm thu a hril a. A hmathlîr hai hrilin Jubilee standard school chu higher secondary chen inchuk theina dinga hmâ lâk pei an tum thu a hril. Hi huna hin Rev. Jacob L. Hmar, PS, Tlangram Presbytery RPCNEI, Pu Lalṭhathang Keivawm, Program Co-Oridinator, Development Department, RPC NEI, Parbung Area, HSA General Headquarters le HSA Hmarram Joint Headquarters hai khawma inchuklaihai ta dinga thu ṭha tak tak an hril.
Hunser hmangna a hin pâwl sâwm pasi hai kuomah mimal lâwmman sem a ni a, Tv. Calvin Lalrochan s/o Rev. Jacob L Hmar kuomah Best Performance Award (Memento le Sumfai chêng 5000/- ) inhlan a ni a, hi award hi (L) Thangthozakâp le a sunghaiin an tum a nih. Bu hnia letter mark hmutu, Caleb Lalthilthawthei Infimate s/o Chalpiengsûng chu Social Science ah letter mark a hmu leiin ''HK Thanga & Thangṭhuomkim Award'' (sumfai chêng 5000/- le memento) inhlan a ni a, Science a khawm letter mark a hmu bawk leiin sumfai chêng 5000/- le memento, Pu L. Tlanthang le a sunghaiin an inhlan a, hi bak hin Pu Thangṭhasiem khawma sumfai chêng 1000/- an hlan ve. Hi huna hin Upa Laltluonglien le a sunghaiin Pawl sawm pass hai an rengin sumfai an inhlan bâkah, Headmaster Sir Kapkhanlian Shoute chu thangsuopuon an insiltir.
Jubilee Standard School hin a hma chun Board of Secondary Education Manipur hnuoiah HSLC exam an lo pêk hlak a, hun iemani chen kum 9 hnungin, kum 2025 hin HSLC exam an pêk nawk thei ta a nih. Hi school hung indin thar nawktu, Sir Kapkhanlian Shoute, Headmaster, Jubilee Standard School chu tu kum 2025 a Lungthuliena Ngurdinglien Sanate Meritorious Award 2023 & 2024 inhlânna hunser a khan 'Special Achievement Award' inhlân a lo ta ni bawk a nih.
Lawmpuina hunser a hin inchuklaihai a'nthawkin inpâkna hla hai ngaithlak a ni a, vawk le siel sa in ropui takin lâwmpuina ruoi kîltlâng a nih. Jubilee Standard School Parbung hi RPCNEI Kohran hmalakna hnuoia kum 1986 khan indin a ni a, hi school a'nthawkin officer ṭhahnem tawk tak, state le central service a haia inziekkai an um nuol ta bawk a nih.
