ITAC Pherzawl & Jiribam huoihawtnain inkhâwm pawimaw nei

Parbung, May 20, 2025, Virthli (ONP): Indigenous Tribal Advocay Committee (ITAC) huoihawinain Pherzawl le Jiribam district sûnga hnam le khawtlâng ṭhuoitu palai mi 150 hai chun May 20, 2025 khan Parbung Collection Centre, Hmarram, Pherzawl District hmunah fê khâwmin hma lâk pei dan ding ngaituotlângna inkhâwm pawimaw tak el nei a nih. Hi hunah hin political thilah Hmarram mipui ditdan hai chipchier le ngun taka hril tlâng le ngaituo tlâng a ni a, buoina kârah Hmarram mipuiin ieng ang policy am ngirpui a ta? ti hai le, hmatieng peia political roadmap chungchâng ngaituo tlâng niin resolution pawimaw tak tak passed a nih.

Hi huna hin Upa Hranglienkhum, Chairman, ITAC in Pherzawl le Jiribam district a'nthawka hnam le khawtlâng ṭhuoitu hung khâwm hai chungah lâwmthu hrilin lâwmlûtna hun a hmang a, Rev. Jacob L. Hmar in Pathien thu suklangna le ṭawngṭaia hun hawngna a nei a, Tv. Hrilhmingthang Buhril, Secretary ITAC in kum hni sûnga ITAC hmalakna hai report pêkna le, Pherzawl district le Jiribam district a tlângmi hai ta dinga political roadmap, draft siema um hai suklangna a nei.

Hi huna hin Upa Ramdinglien, President, Hmar Inpui Hmarram Region, Pu Lalenglien, President, Hmar Inpui,  Vangai Region le, Tv. Vanlalhriet, President, Hmar Inpui Jiribam Region haiin thuhrilna hun an hmang a, palai fêk khawm hai khawmin hma dawm pei dan ding chungchang thuah thuhrilna hun an hmang.  

Rev. Lalchanglienin resolution hai Pathien kuomah inhlanna neiin ṭawngṭainain inkhâwm  a suktâwp a. Hun kar lakah hin Nk. Vasty Hrangchal a'nthawk hla ngaithlâk a nih.