Lamka/Tuiṭhaphai/Songpi, April 17, 2025: National Highway 02, Tipaimukh Road siet ngunna le mimkei tlung ngunna Chiangpi le D. Khawzim inkar lai chu April 16, 2025 khan inlirthei tlan dan ding um lo khawpin a sie a. Tuiṭhaphai a inthawka hi lawmpui hraw inlirthei ṭhenkhat an kir nawk hlawl a nih. Mi tam tak a sukbuoi hman hle.
Hi le inzawm hin hi line a service ve tho, Tipaimukh Road Transport Cooperative Society (TRTCS) a Chairman Mr. Ramhuollien-in hi lai lampui enkaitu company NHIDCL hotu hai inrang taka bie nghalin anni le inhrepaw'n Bhartia Infra Projects Limited (BIPL) haiin lampui sietna hi siemṭhaṭna sin an thaw a, chanchin ei lakkhawm lai April 17, 2025 3:50 PM chen a khan inlirthei hai tlan theina ding tawk siem a nih.
Lampui siet le inzawm hin Hmar Inpui General Headquarters ṭhuoitu le mi ṭhahnemngai dang khawmin an theina ki seng ah theitawpin hma an lo lak ve a, hi chungthu a hin TRTCS chun lungriltakin lawmthu a hril a nih.
Lampui sietna lai hi duthusam ang taka vawi le khata zuk siem zo vawng el thei ni naw sien khawm inlirthei hai tlan suokna ding tawk chu siem zo a ni tah thu le inlirthei hai ṭha takin an tlan nawk thei tah tho thu hmalatu a inthawk chanchin hriet a nih.
Lampui sietna san hi Henglep lampui siemna pil vung chim thla khawm a ni hlak leiin Henglep lampui siemtu BIPL in lampui sietna hrila um hi siemṭhaṭna sin an thaw el tah a ni a, lampui siemṭha dinga an hungna lampui khawm a lo sie ve leiin an hungna ding lampui an siem sung hun a lak nawk pei leiin 6 AM vela siem ṭan dinga an ti chu an inhnu pha deu thu hriet ding a um bawk. An siem ṭha hrim hrim leiin inlirthei tam tak lam laka an tangkhang theina ding a um ta naw pha leiin lawm a um hrim hrim a nih. Duthusam a nina ding ruok chun hun a la lak met el thei.
Tuta hma khawm khan hrila um lai tho hi lo sie tah-in Tipaimukh Road Transport Cooperative Society (TRTCS) le Tipaimukh Road Area Transport Development Association (TRATDA) ha'n May 29, 2024 in Henglep bieltu MLA, Pu Letzamang Haokip inhmupuina an nei a, ama khawmin a lo lungkham ve leiin JCB tir pek nghal ka cheu a, seng ṭul po po keiin tum pek ka cheu a lo ti a, sin khawm ṭan nghal a nih.
National Highway 02, Tipaimukh Road a Chiangpi le D. Khawzim inkar lai hi a sie ngun leiin mi tlawmngai hai khawmin vawi tam an lo siem tah hlak bawk.
-LRS Puruolte
.webp)
