Lungthulien, April 6, 2025, Virthli (ONP): Ngurdinglien Sanate Meritorious Board huoihawtna hnuoia kum 2021 a'nthawka Pherzawl District sûnga pawl sawm (Cl-X) exam naa a thawṭha bîkhai kuoma Award a lo inhlân hlak, Manipur buoina leia hun iemanichen sunzawm thei ta loa um chu April 5, 2025 sûn dâr 11:00 AM khan Lungthulien PMS High School Complex ah Ngurdinglien Meritorious Award 2023 le 2024 semna hunser hmang a nih. Hun hmangna hi Nk. Lalremsiem Sungte le Peaceful Hmar han hnêtakin an keihruoia. Hun hmasa tieng Ngurdinglien Meritorious Board a'nthawk Laltinkim Sanate in Ngurdinglien Meritorious Award chungchang hrilna an nei a, Pu Elmounvel Buongpuiin Pu Ngurdinglien chanchin hrilna a nei a, Hmar Inpui Hmarram Region, HSA Hmarram Joint Headquarters han thuhrilna an nei a, Pu Zosanglur Joute, MCS, Additional Deputy Commissioner, Pherzawl District a'nthawkin inchuklaihai ta dinga infuina thucha ṭha tak tak ngaithlâk a nih.
Hi huna Chief Guest- Pu Ngursanglur Sanate, MLA, 55-Tipaimukh A/C in thu a hrilna a chun inchuklai naupang hai chu an thil tum ah an chieng a ṭûl thu a hril a, ama ngei khawm college a kai lai a tum ah a chieng thu, a pa (Pu Ngurdinglien Sanate) anga ram le hnam ta dinga rawng bâwl chu a thil tum a ni thu le, a thil tum ah a chieng leia hieng ang ngirhmun a phâk thu hai a hril. Inchuklaihai chu a thiem tak pa ninaw hai sien khawm teireipeina, tumruna, takinningna le taimâkna neia lekha an inchûka an thil tum ah an chieng phawt chun, ni khat chu hlawtlingna an la chang ding thu a hril a. A hril peina a chun ram sukchangna dingin lekha thiem le pawisa ringawtin ram a sukchangkang naw a, ram le hnam a parvul ding chun indikna, titakna, hmangaina le indikna ei kengkaw a ṭul thu a hril a, inchuklaihai chu ram le hnam hmangaina lungril neia lekha inchuk dingin an fui tâwl.
Ngurdinglien Sanate Meritorious Award 2023, HSLC exam a Award dawngtuhai chu:
1st -Emmanuel Lalsandam s/o Malsawmlien & Ngaithianhoih, Lungthulien Village, Pherzawl District
2nd- Esther Lalchawimawi d/o Lalneihlun & Parzikpui, Senvon Village, Pherzawl District
3rd-Josia Buongpui s/o Lalroman & Roneikim, Lungthulien Village, Pherzawl District
Kum 2024 a Ngurdinglien Meritorious Award dawngtuhai chu:
1st- Jeffry Ngurnunsang Ngurte s/o John Lungthulien PMS High School
2nd-Anderson Lalruotlien d/o Laltlansang Lungthulien PMS High School
3rd-Elohim Lalṭhuoisang s/o Lalhrietthang Lungthulien PMS High School le, Believer Ramṭhazuol s/o Rohluosang, Lungthulien PMS High School.
Ngurdinglien Meritorious Award 2023 le 2024 a an an sângtak hai hi Memento le sumfai cheng Rs.20,000/- (Sîng hnih) inhlan an ni a, a pahnina latu hai hi memento le sumfai cheng Rs. 15,000/- (Sîng le sang nga) inhlan an ni a , a pathumna latu hai hi memento le sumfai cheng Rs. 10,000/- (Sîng khat) inhlân an nih. Best Government High School Award chu Pherzawl Govt. High School in a dawng a, memento le sumfai inhlan a nih. Best School Award chu Lungthulien PMS inhlan niin memento le sumfai inhlan a ni a. Special Achievement Award chu Kapkhanlian Shoute, Headmaster, Jubilee Standard School Parbung inhlan niin memento le sumfai inhlan a ni bawk.
Hunser hmang a ni sûng PMS High School Lungthulien le NSCBAV Hostel Parbung han special item lâm hmu nuomum tak tak el an pholang a, Artiste- Young Fella, B. Lalasanglien Inbuon, Johan H. Lalmalsawma le Jedidia Joute han hla in mipui fêkhawm hai an inawi. Lawmthu hrilna Ngurdinglien Meritorious Board a'nthawk James Pusing in hrilna a nei zoin Rev. Roparlienin ṭawngṭaia hun kharna a nei a, refreshment tuihnai tak el fâk le dâwn tlâng a nih.
