Tuiṭhaphai, April 17,2025(HT): Hmar Writers Club chun tarik 16 Thlatûn 2025 khan Pi Lallienzawn In, Saidan-ah Pi Lallienzawn chu ‘Song Writer Award 2025’ le Dinpui Joute chu ‘Entertainer Award 2025’ an inhlân. Lallienzawn hin hla 100 chuong a phuok ta a. Hla a phuokhai laia 67 chu mi dang dangin sakin Music Video siem a ni tah. Mi dang ta dinga a phuok hi 50 a chuong ta bâkah, hla hi Hmar ṭawng le ṭawng dang dangin iemani zât a’n let ta bawk. Pi Zawni hi Hmar ṭawng thu le hla hi hla hmangin a sukburip el bâkah, thu le hla tienga sum tam tak pe dawktu mi ṭangkai êm êm a nih. Dinpui Joute hi hla sak thiem a ni bâkah, thiem elkhêna mi inâwi tleitu le mi sukhlim thiem, upa tienghai ‘star’ êm êm a nih.
Award inhlânna hun hi Lallungawi, Secretary, HWC-in a keihruoi a. Secretary, HWC-in Award dawngtuhai thlang an ni dân le an chanchin tâwi a hril. L. Kiemlo Pulamte, President, HWC-in Award hai hi a’n hlân. Award dawngtuhaiin hun an hmang bâkah, HWC member L. Kiemlo Pulamte, Dr. Lal Dena, L. Ruoivel Pangamte, Lalrothar, L. Thanzam Pulamte le Thangṭhatling haiin thu ṭha tak tak an hril. Dinpui Joute, Lily Ramthar le Paugoulien-a inthawkin hla sak ngaithlâk a nih. HWC hin Hmar thu le hla sukhausatu le thaw hlâwk tak tak mi iemani zât kuoma châwimâwina a’n hlân ta a.Chuong chu hming mawi le ropui tak tak inbûkin, tuta ṭuma Lallienzawn-in a dawng hi ‘Song Writer Award 2025’ ti a ni a, Dinpui Joute-in a dawng hi ‘Entertainer Award 2025’ ti a nih. Award hai hin Trophy le sum fai an sawm ve ve.
