Ruonglevaisuo, February 23, 2025, Virthli (ONP): Manipur le Mizoram inrina hmun, Hmarram Pherzawl District le Mizoram infepawna dinga pawimaw em em el, Tuivai vadung chunga Bailey Bridge dawa um chu February 22, 2025 khan Mizoram CM, Pu Lalduhoma chun a lo hawng tah. Hi huna thu a hrilna a chun Tuivai Leilak dâwna ding hin tender chu kha ti um lovin a sawrkawr chun Nuoi 500 a sanction thu a hril a, mipuiin an sawr vat theina dinga daw zo vat chu an thil tum lientak a ni thu hrilin hi leilak hi Pherzawl District le Mizoram mipuihai thlungzawmtu, inpumkhatna le inunauna intluntu ni mawl sien tiin a hril a, Tuivai vadung chunga leilak dawa um chu 'Unity Bridge' tia ko a ni ding thu a hril. Tuivai leilak hi mipuihai sawr dinga dâw a ni ang hrimin tax dâwl khap tlat a ni ding thu a hril a, sawrkar le khawtlang thil khap, thil ṭhalo mihriem nun le thlarau nun suksietheitu thil hai hrim hrim chu phur lawn naw hram ei tiu tiin mitin a fiel.
Tuivai leilak chungchang a hril zoin Mauchar Road khawm hrilsa in, Mauchar Road siemṭhatna dingin Rs. 3.76 Cr pêk dawk a ni ding thu a hril a. Department tienga mawphurtu han sin chu an ṭan vat ta ding thu a hril. Mauchar lampui bâka hin Vairengte le New Vervek inkâr lampui tak tak khawm siem a ni ding thu, survey thaw mêk a ni thu, hi lampui enkaina sin thawtu dingin Bhavya Construction Pvt. Ltd. chu thlang fel an ni ta thu le, hi lampui siemna dingin Rs. 13.68 Cr induong fel sa vawng a ni thu a hril.
Tuivai Leilak hawngna hunser hi Mizoram a Minister mi pawimaw tak tak hai le, Mizoram PWD tienga mi pawimawi tak tak han an uop a, an ni baka hin Mizoram le Manipur tienga hnam organisation hrang hranga ṭhuoituhai le, Mizoram Sinlung Hills mipui le Pherzawl District mipui sângtêl in an uop a, Leilak hawng ni hin lâwmna ruoi khawm kîl tlâng a nih.
