Vawisun 17.11.2023 (Zirtawpni) sun dar 12:00 khan Assam Police SB Headquarters, Kahilipara, Dispur Guwahati Assam-ah Hmar Peoples’ Convention (Democratic), Assam Region le Assam sawrkar chun Suspension of Operation (SoO) thla ruk (April ni 30, 2024) chena dingin keiseina suoi an kei nawk.
Hi huna hin Pu Shiladitya Chetia, IPS, Secretary, Home and Political Department, Govt. of Assam chun sawrkar aiawin suoi a kei a, HPC(D) Assam Region aiiawin Pu David L. Hmar, Chairman le Pu Remsang Zote, Secretary haiin suoi an kei a, Pu Lawmzuol Tuolor, Vice President HPU Assam & Spokesperson HPCD Assam Region le sawrkar mi pawimaw dang haiin a uop bawk a nih.
SoO keiseina meeting zo hin Memorandum of Settlement, Proposed Draft peklut a um chu Pu Hiren Nath,IPS, (Interlocutor) thangin Dr. Ravi Kota, IAS, Additional Chief Secretary Govt. of Assam, Home and Political inrawina hnuoiah entlangna nei a nih. Sawrkar palai hai chun a ziek dan ding chipchier lem le siemthat ding chite te um hai thurawn an siem hai chu karkhat sung ngeia sukfela sawrkar kuoma hung pelut nawk nghal dinga palai hai chu inhriettir an nih.
MoS Draft siemthatna hi an hma tieng thuoitu hai inrawntlanga, a hun taka peklut nawk nghal dinga riruong ani ding thu Chairman, HPCD Assam Region chun a hril bawk a nih.
