Conference a ni tâwp ni, Rev. Lalneikhup Hmar, Secretary Ministries ICI a'nthawkin Pathien thucha ropuitak el ngaithlâk a ni a, inkhâwmpui tâwp zân Rev. Evan John, YCO a'nthawkin Pathien thucha ropuitak el ngaithlâk nawk a ni a, YCO hin sûn program hmang a ni huna KṬP Project chungchang inhrilhrietna hun a nei bawk a nih.
Hi huna hin Conference Secretary- Pu David Traite in Inkhâwmpui sûnga inruolsiekna chi tum tum a lâwmman hai result puongna le semna a nei a. Hlapawlpui Inruolsiekna "Buonglienkung Choral Award'' chu Tuiṭhaphai Presbytery in a pakhatna an lâk a, lâwmman in sumfai Rs. 30,000/- le Trophy inhlan an nih a, hi baka hin music video sponser an ni bawk ding a nih.
Solo Competition ''Rev. Thangngur Music Award 2023' chu Nk. Lily Lalparmawi, Cachar Presbytery in a lâk a, lâwmman in sumfai chêng Rs.30,000/- le Trophy inhlân a ni a, hi bâka hin music video sponser ning a ta, thla tin chêng Rs. 2500/- inhlan ni hlak a tih.
One Day for Christ (ODC) pe ṭha tak lâwmman a pakhatna hi Lamphel ICI KṬP Unit, Tuiṭhaphai Presbytery hai inhlan an ni a, a pahnina - Talan KṬP Unit, Hmarbiel North Presbytery hai khawm lâwmman inhlan an nih. Overall Activities lâwmman a pakhatna chu Delhi City Church KṬP hai inhlan an nih. Hi huna hin Ṭhalai members Tonic Solfa Exam a hlawtlingna chang hai certificate inhlan an nih.
Lâwmthu hrilna Rev. L. Ramropui Ṭhiek, Vice- Chairman, CKṬP in a nei a, hun tâwp tieng KṬP Anthem "Lal Iengkim Thawthei'' sak a ni zoin Rev. Lalhmingthang, Executive Secretary ICI in Conference khârna a nei a, malsawmna hril zoin hun suktâwp a nih.
Ngurte khuoa innghat ICI KṬP Inkhawmpui Lien a vawi 39-na hmang a ni hun sûng hin palai fê khawm han ro chi tum tum an rêl a, ICI Central Choir, NPT Central Choir le Rev. Thangngur Music Awardee han hlaa rawngbawlna an nei a, Presbytery/City Church/ Mission Field a Ṭhalai hai a'nthawkin drama/skits/choreography le special item chi hran hran hmu nuom um tak tak en le ngaithlâk a ni a. Bethesda School & College of Nursing hai khawmin Medical Booth siema um ah hnetakin rawng an lo bâwl ve a. Hla Ruoi khawm ṭhe niin dit khawp lo takin 39th General Conference chu a lo ṭumṭiek ta a nih.
