Hmarveng, August 21, 2022, Virthli (ONP): Independent Church of India Tuiṭhaphai Presbytery in August 20-21, 2022 hun sûnga Hmarveng ICI Biekin a Missionary Covention a vawi 28-na an hmang chu Pathienni zân khan a lo ṭumṭiek tah. Hi hunser hmang ani sûng hin Evan. Thangneilal, North Bengal & Bhutan Mission Field le, Evan. Bijay Pusuru, Orissa Mission Field hai a'nthawkin Pathien thucha ropui tak tak el ngâithlâk a nih.
Hi huna hin Orissa rama Sombaru Memorial Chapel bâwl mêk a um ṭhangpuina dingin mani phal ang tâwk tâwk châwi khâwm hlak a nih. kum 14 mi Sombaru Madkami hi kum 2020, June ni 4 khan Kristien sakhuo dodaltu pawl ṭhenkhatin kristien sakhuo a zui leiin a chengna In a'nthawk ṭhuoi suokin nunrawng taka an sawisak hnungin an that ta a nih. Ama hrietzingna dingin Kenduguda khuo, Malkangiri District, Orissa-ah 'Sombaru Memorial Chapel' hi bâwl mêk a nih. Covention huna hin Tripura-a Surjopara Biekin bâwlna ding thawlâwm dâwl hlak a bawk.
Missionary Convention hmang ani huna hin ICI Central Choir le Tuiṭhaphai Presbytery sûnga KṬP Unit hran hran ha'n hlapâwl sakin hlaa râwngbâwlna an nei hlak. Rev. J. Thanglur, Secretary Missions, ICI in benediction hrilin hun a khâr a, thlâk hla tak pumin Missionary Convention hi a o ṭumṭiek ta a nih.
