Guwahati, August 23, 2022, Virthli(ONP): September 9, 2021 khan Cachar a Hmar khuo pathum hieng K. Bethel Forest Tangia Village, Muoldam le Loṭhazawl haiin Hmar Lower Primary School an nei naw thu le hieng khuo pathum haiah hin sawrkâr school a um naw thu, kohran ṭhenkhatin harsa sa sain naupang school kaina ding neinaw hai kaina dingin school an enkawl thu Dr. Vanlallien Pulamte, President, HNU, Assam in Dr. Ranoj Pegu, Hon'ble Education Minister, Assam chu ṭawngbauin a hrilpuia, Minister hin a lo ngaipawimaw hle.
Hi le inzawm hin hieng khuo pathum haia naupang lschool kai thei ding um zât, mihriem um zât le in um zât felfaitaka lakhawm dingin Minister hin Dr. Vanlallien Pulamte a hrila, Ministerin a hril angin a hmun ngeiah fein study a thaw a. Statistics le data felfaitakin Education Minister kuomah inentir a ni zovin Minister hin hieng khuo pathum haiah hin Hmar Lower Primary School phun dingin lekha a ziek fel tah a nih. A puitlingna dingin hun la la deu met sien khawm sawrkâr school an nei thei ta ding hi lawm a um takzet a nih.
Cachar, Assam ramah hin Hmar LP School 36 le Hmar MV School 3 a um a, khuo pathuma phunsa an ni ta ding leiin 39 a um ta ding a nih. An reng hin Hmar ṭawnga inchûkna school Hmar LP le Hmar MV School nisien Assam sawrkâr ta a nih, inchûktirtuhai hlaw le school building hai po po Assam sawrkarin a pêk vawng an nih.
Ṭawng a dam chun hnam a dam. Hmar ṭawng dam zing raw seh.
