Parbung, August 21, 2021, Virthli (ONP): Parbung CHIC a um mek hai fak le dawn rawngbawl dinga in volunteer mek Youth Congress chun vawizan CHIC a um hai lai Pathien Thu le Hla a rawngbawlna an nei.
Hunser hmangna hi Pu Ramnghawrlien, Secretary, Parbung YC in a keithuoi a, Nk. Lalthahnieng, Treasurer Tipaimukh AYC in tan na hun neiin Tv. Hrilhmingthang, General Secretary, Tipaimukh AYC in Youth Congress rawngbawlna hai tha taka an thlawp leiin CHIC a um hai kuomah lawmthu hrilin Politics ah hin Isu Krista hmel suklang a pawimaw zie hai a hril.
CHIC a um mek hai ta dingin tawngtairuolna nei a ani a, Speaker -Rev. Joe Sanghmingthang, PS, ICI Hmarbiel North Presbytery a'nthawkin "SUK DAM I NUOM AM'' ti thupui hmangin Pathien thucha ropui tak el ngai thlak a ni a, ngaithlatu haiin an hlawk pui hle. Thuhril zoin Pu Lalchunghnung Songate in Pathien thu le lawmthu hrilna hun a hmang a, Speaker Rev. Joe Sanghmingthangin tawngtaina'n hun a khar. Hun karlak ah inpakna hlaa rawngbawlna nei ani a, Nk. Vasty Malsawmkim, Nk. Judy Lalnghakzing le Nk. Fiemlalhriet hai a'n thawk inpakna hla ngai thlak anih.
