Parbung, July 19, 2021, Virthli (ONP): Dr. Chaltonlien Amo, Tipaimukh MLA kuoma Parbung khuoa Sengvai Youth Organisation-in Youth Congress fe thlenga Sengvai vêngbuk nawr lienna dinga ngênna an siem chu MLA chun hung ngai pawimaw pêkin, vawisûn JCB hai tirin nawr lienna sin thaw nghâl a nih. Tuolsûng Upa Chalrosung-in ṭawngṭaina a nei zoin Parbung khuo hluo ṭan a ni hlima an hluo hmasa takna hmun, Sengvai vêngbuk hi mihriem chêng theina ding, In 100 bâwr vêl bâwl theina dinga sukzauna sin hi ṭan nghâl a nih. Parbung hi khuo inṭhang hrât tak el a ni a, a khuoa hin in bâwlna ding an intar ta hle a, Sengvai hi vêngbuk dang dang hai laia sukzau thei um sun ang a hung ni ta a, nawr zo a ni hun ding hi mipuiin an nghâkhla hle thu dawng a nih.
Hi huna hin Sengvai Youth Organisation President, Pu Bungthanglien chun Sengvai vêngbuk bâkah Parbung khuo zau lienna ding khawm ni bawk, JCB hmanga lam le hmun ding nawrna dinga MLA kuoma a ṭûl ang ang intlun dinga Youth Congress hai hma lapui dinga ngênna an siem chu Youth Congress chun bawzuiin Tipaimukh MLA Dr. Chaltonlien Amo kuomah a ṭûl ang ang intlun a ni a, JCB hmanga sin ṭan a ni nghâl theina le hieng anga mipui rawng bâwl inhâwk le khawtlâng hmangaitu MLA an nei chu vângnei an ti hle thu a hril a. Pu Dr. Chaltonlien Amo le Youth Congress hai chungah Sengvai vêngbuk mipui aiawin lâwm thu a hril.
