~ Isaac Hmar
Ahmasa'n, gospel ei tî tak chu ei ṭawnga hrilfietû tamtak chun chanchin tha tîin an mi hrilfiepêk a. A ni hrima tu khawm a âwitû ta ding chun chanchin ṭha chu a nih. Sienkhawm, chanchin ṭha hin huop zo nâw sienkhawm thumal pakhat el a a hrilfie theina umsun chu a nih. Khawvêl thil chu mi pakhatin a lungawina tak kha lo hmu de sienkhawm, a ruolpa a pansak lê taksa dâna a lo khing deutu ta ding chun, chanchin ṭha tak tak nêkin, thikna amani, inhnarna amani in a'n chang hlak. Sienkhawm, Gospel ruok chu tu khawm a hmutu lê a changtu ta dinga lungawina chau nilovin, Sûng le kuo û leh nâu pansak le kohran le ram le hnam chen lâwmna intluntu an ni tei hlak a nih.
Politics ei ti tak el hi dictionary ṭhenkhat khathai ka hei râwn kuol vêl chun an suina lê ei ṭawnga an inletna tlângpuia ding chun, ram inawp dân ngâituotu tiin an mi'n letpêk chu tie. Hi thu ka hei hriet chienga ka hei sut vê tak tak chu. Ê-khai. "Gospel lê Politics" ei ti hi a lo inkal êm êmin ka lo ngâituo hlak a chu, ka lo sui dân hi a lo indik nâw zie ka hung hrietsuok pei ta chu tie. A lo ni ngêi Bible ei hei tiema ei hei sui luo chun, thiempuhai lê zawlneihai khan Full time-in sakhuona tieng lê rawngbawlna tieng sin ṭhahnemngâi êm êmin an lo bei a, Lal an lo nei vê bawka, Khanghai chanchinhai kha, Pathien thûin ṭûl lê pawimâw ti êm êmin a lo ziek rawn khawp el a. An nihai khan thukhat vuoin an hmazawna ṭûl pawimâw lê thâw ding chu an sin sengah an lo thâw a lo nih.
Lal hai khan zawlneihai thu sangtak lê Pathien thû ang taka ram an hei ṭhuoi chun, an ni chau ni lo an sûng lê kuohai bâkah, a hnam lê a ram khawma hnuoi lê Vân malsâwmna nasataka intluntu lê phurlûttu an ni a; Chu chau chu ni lovin an sir leh vêla hnam dang danghai khawm Pathienin anni fêtlengin an kutah a pêk ngêi ngêi hlak; Sienkhawm, Pathien dit naw zawnga Lal-in a mihriem ṭhat tîna lê a dit dâna ro rela an hei khawsa vei vei chun, nasatakin an thâw hla â. Ṭhenkhat sipaiin hringna tamtak an inhmanga, țhenkhat an ran chen khawm lakpêka umin, țhenkhat lem chu, lal khawm nihai sien la, an râlhai kuta chen khawm an thi'n an nî lê an nî hmelma kuta thî nêk chun tia insunhlum chenkhawm an um hiel ani kha. Pathien zângâina chau hre a a dit nâw zawnga uma nun hmangtu ta dinga a ṭitumzie hai khawm hi ei sui ngun chu a va hei ṭul de aw..!
Hei sui zawm ta pei inlâ, khawvêla hin rambung tamtak ei um ta a, Pathien thû ang taka rorelna ram iengzât chie am aw ei um ding chu mâw? Ram changkâng le khawvêl chawkhning thei khawp ram chu USA dam Israel dam an n'a; An nîhai an hrâtna thurûk ni dinga ka ring chu, Gospel ani ka ring tlat chu tie. Khawvêlin hrâttakin hma a sawna. In fepawna dâm, boruoka inlawntuona dâm, meivar dâm, in biekpawna dâm lê ralthuom tienga hai hin nitinin hma chu ei sâwn an' hi tie. Sienkhawm, ei ram ei hnam hei thlîr chun hnung ei sawn lem khawm a hawi vâng vâng el tah ie. 1910 khan ei ramah Gospel hung lûtin, hnamdang hai mi el ruol lo khawpin ei inṭhanga, mithiem tamtak ei suoka, ei sir le vêlhai entawnin ei um bawka, hun iemani chena inthawk khan, hnung ei sawnin ka ngâi a, ka lungril hi nâ tiin kan rum tlawk tlawk hun hi a tamin ka hriet ta êm êm. Aw, kei telul hin ei ram lê ei hnam hi ka siemṭha thei tlawt si nawh tî khawm ka'n hmai nawh. Sienkhawm, ka unâu dittakhai thaw ro indin thar nâwk ei tîu khai tiin ngâina takin ka hung fiel cheu a nih. Hienga ei fê pei hin chu chimpilin um hlau rawi ei tih ie. Aizawl mihâusa hai ṭawng mi hril ka hriet a, "umpui ding chu hmar lê burma nunghak an tam an nâwm" an tî dâm hi ka hei hriet a, ka hei ngâituo chun ka lung hi fêi anga sun ang elin na ngâwi ngâwiin a um el a nih.
Ei hmar biel khawsak harsat luot leia Mizoram-a inpêm hlawl el sûngkuo iengzam um tâng ei tia? Sawrkâr skul ei rama ieng zam a uma? Nitina kâia kumtin pawlsawm pass thei dinga ṭhang la ieng'am skul um a tia? Unâu ei um dân lê khawsak dân tak el tê hi nguntlûktaka sut chet chet chu a hun tah ie! Nehemia chun "Lalpa kei lê ka pa sungha'n i dân kan lo bawsieta, Sienkhawm, aw Lalpa ka ngên che ka mitthli hi theinghil nâw," a lo tî ang hin aw ei rengin hei ti thei in la chu ka va nuom de aw. țhenkhat chun kei chu a rama um khawm kan nawh ei ti thei ie, țhenkhat chun, a sûnga chenghai suolna lei ei ti thei, țhenkhat chun, an nî'n an zir nâw êma khawm ei ti thei, a'n dikna ṭhenkhat chu um vê ngêi ka ring. Sienkhawm, kawrapsawn ei tîhai khawm ku hi, mi mâwl mi narâna inṭan a nih dêr nawh. Hmar hnam sûnga kohranhai khawm hei sui inlâ, lo sin thâwa fâk zawngin an phun kohran pakhat khawm a la um dêr lê, kei ka'n khîna vê chu a suol lê a ṭha ei tîhai khawm ku hi, mithiem, mivarhai a'nthawka inṭan nî'n ka ngâi a; tling nâw inlâuin mi pasie lo sinthâw nîtin nisa suok zuia thâw khawma, fakkhawp la nei zo lo khawpa harsa hai pawisa i zu pêk chun tû inam ie an lo lâk nâw el ding? Kawrap i dit nâw leh pe naw el la mâw? A petû kha a kawrapa inngâi dêr lo a latu intum tlat ti el khawm chu a'n dik zo chie am?
Chuleiin, ei hnam ei ram siemṭhatna ding chun, ei um khawma, ei um nâw khawma, thuneitu ei ni khawma, ei ni nâw khawma "Gospel lê Politics" hi hmang kawp ei tîu.
