Responsive Ad Slot

HSA in infepawna le Tuivai leilâk chungchang ah Mizoram CM Zoramthanga inhmupui

Monday, December 7, 2020

/ Published by Simon L Infimate

Aizawl, December 7, 2020, Virthli (ONP): Hmar Students' Association (HSA), Joint Headquarters, Aizawl ṭhuoituhai chun President Pu Henry L. Khojol inrawina hnuoiah vawisun chawhma dar 10:30 khan Mizoram Chief Minister le PWD changtu ni bawk Pu Zoramthanga chu a office chamber, MC Donald Hills, Aizawl ah an inhmupuia, SHC huomsunga infepawna lampui, Tuivai leilâk, Hmar House nei dan ding le development project dang danghai an hrilpui.



HSA ṭhuoituhai chun kum 20 chuong daw lova um tah Mizoram le Tipaimuk, Manipur infepawna National Highway-02 (A hmain NH-150) a Tuivai leilâk chu Mizoram le Manipur infepawna lampui pawimaw a ni thu dam, Mizoram ta dinga chakkhai (khawrsaw) lâkna a ṭangkai ding, Manipur tienga cheng Zohnathlak a bîkin Hmar nauhai ta dinga economic road pawimaw a ni zie le Zohnathlak inpumkhatna dinga sirbi pawimawtak a ni thu hai an hrila,  Mizo National Front (MNF) sawrkar chu "Zohnathlak impumkhatna" ti election manifesto a neitu a ni leiin thlamuong um an ti thu le leilâk daw vat a ni theina di'n hrat taka hma la dingin Pu Zoramthanga hi an ngen a nih.


Hi baka hin Aizawl-a Hmar house nei a ṭhat thu le New Vervek le Vairengte via Mauchar inkara rel ding National- Highway-306A le SHC huomsunga infepawna dang dang hai chu PWD minister a nina anga hratnawk zuola hma la pek dingin an ngen bawk a nih.


Pu Zoramthanga chun Tuivai leilak chu a ngai pawimaw thu hrilin vawithum lai vel tender insuo a ni hnungin contractor pakhatin a dawna, sienkhawm a dawnna hi leilak dawna dinga Minstry of Road Transport & Highways in total estimate a siem nekin a tam leiin, ministry chun clarification hung thaw dingin a ti a, clarification hi thawnfel a ni tah a, ministry in a hung pawm (approve) chun sin ṭan el thei a ni  thu HSA thuoituhai hi a lo hril a.


Leilak daw thei vat a ninaw ding chun sawrkar chun lampui dang dap an tum thu hrilin,  ferry system (lawnga inthak kai) annaw leh ṭhal sung bika hmang dingin a va dung lai tak chu lung deng pâwnga, motor hraw theia siem a ṭha a ring thu a hril bawk a nih.


Chief Minister chun MoRTH chu approval pe ngei dinga ziekin a lo bawzui nghal ding thu a hrila, NH-306A khawm National Highway standard siem thei tak tak a ni hma in lampui lo um ta sa hi improvement thaw a, blacktop lo thaw thei a ni a, chu chu sanction ah dan naranin a ṭhangsa hlak leiin National Highway a siem thei tak tak a ni hma in lampui um ta sa chu siemṭha a Hmar tlangdung infepaw theia siem chu ngaituona an nei thu a hril.

New Vervek le Tuivai  leilâk inkâr lampui (road component) -10km khawm work order sukfel a ni tâk thu le Nidhi Company in an siem mek thu a hril.


Aizawl ah Hmar House bawl ding chungchangah Pu Zoramthanga chun SHC area mipuiin an sawr ṭangkai thei ding house nei chu ṭha a ti thu le a lo bawzui ding thu a hrila, a building bawl chau chu thil harsa a ni naw a, amiruokchu, a hnunga enkawlzui hi a hau intakna lai chu a ni a, a tia,  Hmar House chu lo bawl ni inla khawm Mara House, Lai House hai an council sawrkar (ADC) in an enkawl angin Hmar House chu a enkawltu ding Sinlung Hills Council (SHC) an um leiin thil harsa a ringnaw thu a hrila, HSA ṭhuoituhai chu anni khawma hmun lo dap ruka, ram hmu phaleh inhmu tlanga bawzui dan ngaituo dingin thu a lo inba a nih.


National Highway le PMGSY road in a huom lo Ṭinghmun le Zokhawthiang inkar lampui khawm Hnam project a neia bieltu MLA Pu Lalchhandama Ralte leh hma an lâk mêk thu a lo hril bawk a nih. 


Pu Zoramthanga chun Hmar tlangdung leh inzawmna inthûktak an nei thu le ama ngei khawm Hmar Association hai lai a thlathlum thu bakah neitu chan a chang thu a hrila, SHC area hmasawnna a ngai pawimaw thu dam, HSA khawm a ngai pawimaw thu le inthlahrung lova iengtik lai khawma a office ah hung leng lût hlak dingin a fiel nghal bawk a nih.


HSA ṭhuoituhai chun Christmas present in Pu Zoramthanga hi Hmar Thangsuopuon an insil tir a nih.


HSA ṭhuoituhai hi President Pu Henry L. Khojol bakah Tv Jonathan Lalremsiama, General Secretary; Tv Ngurrivung, Assistant General Secretary le Nk Zinnia Lalsiemfel, Treasurer hai an ni a.


Pu Lalkhumsang,  Advocate, Legal Adviser le Pu Samuel Zoramthanpuia, HSA, Jt. Hqrs, Aizawl Vice President hlui le tuta Mizo Students' Union (MSU) General Secretary nilai mêk ha'n an ṭawiawm a nih.

Don't Miss
© all rights reserved
made with by Simon L Infimate