Tuithaphai, August 20, 2020, Virthli (ONP): Rev. H.P. Runremthang, P/S, Tuithaphai Presbytery inrawinain unau Rengkai Gilgal ICI Kohran a thuoituhai chun August 20, 2020 zingkar khan kohran member sunga lo neihai po po chu an lo hmun ngeiah va kanin tawngtaipekna an va nei.
Zing dar 7:10 AM-a Biekin compound-a P/S in tawngtaina a nei zoin Pu Lalhmingmak Joute-in tlawmngaia a hung tuok Pick-up motor hmangin kohran member sunga lo sin thawtu mi 13 hai bu bil, centre pathum hieng- Ngurte, Thenmuol le Rengkai zaua um hai an va kan a. Hi huna hin kum tawpa an bu le bal hai tha taka an sik theina ding le siet theina laka inthawka an lo hai a him theina dingin tawngtaina hi va nei a ni a, an lo hai ta dinga tha em em el van ruotui malsawmna Pathiena inthawka an la dawng pei lei khawmin lawmthu an va hril.
Hieng ang hmathlir tha tak neia hunser huoihawttu an hotuhai chungah kohran member lo sin thawtuhai chu an lawm hle a, bu le bal, boruok tha, ruotui, thlaihna le mihriem mamawhai iengkim mi petu Pathien chun an tawngtaina hai dawnin an lo sinthawna a hai mal a sawm nawk ngei an ring ngam bawk a nih.
