Responsive Ad Slot

Bollywood Actor Sushant Singh Rajput Kha ieng leia thi am ning a ta?

Monday, August 17, 2020

/ Published by Simon L Infimate

Thuhmathuoi

June 14, 2020 khan Bollywood filmstar inlar le thalai hai idol Tv Sushant Singh chu a chengna in Bandra khuo, Mumbai ah a thisa-in hmu a nih. Ama le ama inawkhlum a nih (Suicide by hanging), ti pawl an um. Chuong lai zing chun, min an that phawta, inkhaihlum angin an lo khaikang lem a nih (He was murdered and then hanged), titu an um bawk. 

Career

Tv Sushant Singh hi kum 1986 khan Maldiha khuo, Purnia district, Bihar ah a pienga. Inchukna le inzawmin kum 2002 khan Delhi tieng an pemluta. Engineering thaw malamin film acting an chuk. Drama le dance hi an hnikna zawngtak an nih. Kum 2008-2011 sung khan TV serial ah a lo chang hlak. Zee TV a Pavitra Rishta Serial ah a changtupa a nih. Star Plus a Kish Desh Mein Hai Mera Dil Serial ah a chang bawk. Kum 2013 a inthawk khan Hindi film ah an sawnlut. A film hmasatak chu Kai Po Chi (2012) a nih. Hindi film inlar hieng MS Dhoni: The Untold Story (2016), Kedarnath (2018), Chhinchhore (2019) le Dil Bechara (2020) ah a changtu in a lo thang.


Ngaizawng life

Hriet dan chun Bollywood actor Sushant Singh le Zee TV a Pavitra Rishta Serial changtunu Nk Ankita Lokande hai chu kum 2010 a inthawk khan an inngaizawnga. April 14, 2019 a inthawk khan Bengali nunghak Rhea Chakraborty an ngaizawng pui bawk. April 15, 2020 khan Sushant Singh in Rhea hi a in Bandra, Mumbai ah a thuoiluta. Live in relationship angin an um ta a nih. Chuong lai chun Sushant hi a unu Priyanka le a pasal le umhmunkhat an nih. Nk Rhea hi modern Bengali family a mi a nia. Tulai deu el a ni leiin Bihari khawtlang le a mizie hi inmil thei lo a nih. Sushant le Rhea hai hi an lan nei nawa chu hmun khata lo cheng hlak an nih. Nk Rhea Chakraborty pa Indrajit Chakraborty kha retired defence personal a nia. Thlatin Rs 1 lakh pension la a nih. A nu chu Sandhya a nih. A unaupa Showik le a ngaizawngpa Sushant hai kha inruoltha em em an lo nih. 


FIR

June 14, 2020 khan Tv Sushant Singh Rajput chu a chengna in Bandra khuo, Mumbai ah a thisa-a hmu a nih. A tir chun ama le ama inawkhlum a nih, tiin Mumbai Police chun Accidental Report an lo siema. FIR file chi khawmin an lo ngai hran nawh. Amiruokchu, Republic TV News Channel haiin Sushant Singh a thi dan le inzawmin ringhlel theina ramtin an hung phawrdawk tan khan Sushant Singh a pa chun Bihar khawpui Patna ah FIR a file ta a nih. Sushant Singh a pa chun a naupa Sushant Singh chu a ngaizawngnu Rhea Chakraborty leia thi a nih, tiin Patna Police Station ah FIR a file-a. Rhea Chakraborty chu cheating and abetment to suicide case a file khum. Sushant Singh a sum le pai a nawzawnga hmangtu le an ni sungkuo hlawkna ding chauvin Sushant Singh kha an lo control char char a nih, tiin complaint a thelut. Sushant Singh a account a mi pawisa Rs 15 crore chu a thi hma met khan Rhea le a ruolhai in bank account dang ah an lo transfer, tiin complaint lekha ah a zieklut.


Ringhlel panga hai

Sushant Singh a thina le inzawma ringhlel hai chu a hnuoia mi panga hai khu an nih. 

1. Sushant Singh a ngaizawngnu Nk Rhea Chakraborty le a sung hai

2. Sushant Singh a Roommate Siddarth Pithani

3. Sushant Singh a House Manager Samuel Miranda

4. Sushant Singh a Business Manager Shruti Modi le 

5. Sushant Singh a Chartered Accountant Sandip Sridar.


Sushant Singh a bedroom a lut hmasatak pali hai

June 14, 2020 sun lai Sushant a thi zo chara a bedroom lut hmasatak hai chu a hnuoia ei tarlang hai khu an nih

1. Siddarth Pithani, Roommate

2. Samuel Miranda, House Manager

3. Neeraj Singh, Cook

4. Meetu Singh, Sushant Singh a unu.


Investigation

Sushant Singh a thina le inzawma ringhlel hai Police in an hohlim pui ta a. Sushant Singh a hmelhriet iemanizat an hohlimpui ta bawk. Sushant Singh a bedroom a lut hmasatak hai hohlimpui an ni ta bawk. Lekha tul le sirsan thei evidence iemanizat hrutdawk an tah.


Tuchena Police haiin an suina ah an i suidawk thenkhat zuk tarlang zawk ei tih. 


Sushant Singh a manager hlui Nk Disha Salian a thina le inzawmin a hming an lamsa hlak leiin Sushant Singh kha a bei a lo dawng thei em em a nih. 


Sushant Singh hi thla thum lai damdawi le enkawl a lo nih. A ngaizawngnu Nk Rhea Chakraborty hin a lo enkawl char char a nih. Amiruokchu, Sushant a thi hma met June 8, 2020 zantieng dar 1.30 pm khan Rhea hin a ngaizawngpa Sushant Singh chu a maksan thut el a. Rhea hin Sushant hi a the a nih, titu an um. Rhea in a maksan leiin Sushant Singh chu a unu Meetu Singh chun Rhea maksan ni zantieng 5 pm vela inthawk khan a enkawl ta a nih. June 13, 2020 chen Meetu Singh hin Sushant Singh a lo umpui a nih. 


Sushant Singh a thi hma met Rhea in a maksan hnung June 9, 2020 khan Sushant a manager hlui Nk Disha Salian (28 years) chu a ruol tha paruk hai leh birthday party an hmangna ah building sawng sawmpali-na a inthawkin an chawm tlaa, a thi. Sushant Singh hin a tuorna hle. 


Sushant Singh hin June 13, 2020 khan bu a fak nawh. An bu suongtu Neeraj Singh hrildan chun a ngaizawngnu leh an insel chang Rhea hin an chengna in a maksan hlak, a tih. Sushant hi a bei a dawng thei hle. Bu chen a fak thei ngai nawh. 


A thi ni June 14 zingkar khan a thova. Bu fa lovin a bu suongtupa kuoma coconut tui, orange juice le banana a hnia. Coconut tui le orange juice chu a dawna. Banana ruok chu a fak nawh. A thaw ding a thaw pek zo chun Neeraj hin in an lawisan ta a nih. Sunbu suong hun vel chun bu suongtu Neeraj Singh hin Susant Singh chu a va biek tuma. Anachu a room a sung tienga inthawkin a lo kal. A kova. An hawi nawh. A kawtkhar a kick a. An hawi pek chuong nawh. Inring deuvin a ko nawka. An hawi pek chuong nawh. A ko rak rak hnunga an hawi pek ta naw chun Neeraj hin Sushant chu a call lut tum ta a nih. Sushant chun a phone a pick-up chuong nawh. Neeraj hi a thla a phang ta hle a. Mi dang dang a ko khawm ta a nih. 


Kawtkhar lien karhawng theitu keymaker/locksmith an kova chu Sushant Singh a bedroom kawtkhar chu an karhawng thei vat nawh. Anachu, iengtin tin am a nih Siddarth Pithani le keymaker hai chun bedroom kawtkhar chu an hawng ta tho tho. Kawtkhar an hawng thei char chun Sushant a roommate Siddarth Pithani chun keymaker inluttir lovin a hnuoitieng a tirsuka. Keymaker hin Sushant a ruong chu a hmu nawh. Sushant Singh chu a thisa a va hmu hmasataktu chu roommate Pithani a nih. Mi dang hieng Samuel Miranda (House Manager) le Neeraj Singh (Cook) hai khawm an hung pungkhawm ta nghala. An bei a dawng em em. Sushant a unu Meetu Singh khawm a hmuna ngei a tlung ve nghal a. A unu chun a sangpa ruong chu ceiling a inthawk chun la tla dingin Neeraj Singh a zuk hrila. Neeraj le Siddarth Pithani hai chun Sushant Singh a ruong chu ceiling fan a inthawk chun an pawmtum ta a nih. A awm an nam rak rak nghala chu, a damsuok zo ta nawh.


Sushant Singh a riengkhitna an zuk sut le a ring lai hliemna be an hmu ta tlat el. Police le Ambulance an ko nghala. Ambulance hmangin Sushant a ruong chu hospital tieng an thuoi phei ta a nih. Postmortem an thaw zova, ruong chu a sung hai kutah an pekdawk. 


SUICIDE THEORY


1. Bank accounts

Rhea lifestyle hi an sang em em a nih. Sengso an sang hle. Business thil, professional deal le investment link a lo siema. Rhea annual income hi Rs 18 lakhs bawr a nih. Amiruokchu, kumtina a sengso hi Rs 35 lakhs bawr a nih. Investment khawm 80 lakhs lai a nei. Property lakh tam man an chawk tah. In ropui deu el Khara khuo ah Rs 85 lakhs manhu a neia. Raigad khuo a khawm in pakhat an chawk. Bank loan Rs 60 lakhs a lak bawk. Hmun iemanizat ah investment a lo thaw vea. Amiruokchu, a savings bank account ah sum a nei rawn nawh. Income tax return en chun Rhea hin kumtin Rs 18 lakhs bak a lamdawk nawh. Sienkhawm a ngaizawngpa Sushant a bank account le credit card hai a lo hmang hlak a nih. Sushant Singh hin bank account pali a neia. HDFC ah pahni. Kotak Mahindra ah pahni a lo hawng. A thi chen khan chu taka chun bank balance Rs 4.30 crore a la nei. Kotak Mahindra Bank ah Rs 4.5 crore fixed deposit in a lo sie. Chu sum chu November 28, 2019 khan hmun hnia the a lo nih. ED haiin Rhea, Business manager Shruti le Sushant a unu Meetu Singh an indawna, a san an hril thei naw seng. Shruti Modi hril danin Rhea hin Sushant hi damdawi in fa tirin thla thum lai khawmuol hrie dudak thei lovin a lo sie a. Chu sung chun a signature a lo lak hlak. Sushant a signature angin a sign chu cheque ah a lo sign ngun. Sushant Singh a account a inthawkin sum telpui a lo pawtdawk char char hlak, a tih. 


2. Projects

Sushant a project le finance popo Rhea hin a control vawnga. Bollywood ah khawsa sien khawm business thaw le rethei hai thangpui hi an hnikna zawng a lo nih. Chuleiin Sushant hin Rhea, a unaupa Showik hai le thangkawpin company pahni a lo indin a. Company pakhat chu Vividrage RhealityX Pvt Ltd (2019), Navi Mumbai kha a nih. Hi company a hin an pathumin director an nih. Amiruokchu, hi company IP address le domain name hai chu Sushant a thi tawm ni sari hma khan an lo thlenga. Company Vividrage RhealityX Pvt Ltd a IP address hi kum khat sungin vawi sawmpasari an thleng bawk. 


Social service sin thawna dingin Front India for World Foundation (2020) an indin a. Hi taka hin Sushant le Showik hai chu director an nih.


3. Family and friends

Reports in an hril dan chun Sushant Singh a pa hi Krishna Kumar Singh a ni a. A nu chu Usha Singh. A unau hai chu Nk Priyanka, Sweta Singh Kirti, Nk Meetu Singh le Neetu hai an nih. Sushant Singh hai hi middle class Bihari family an nih. Orthodox deu an nih. Sushant Singh hin tutum a biek thei ding ti hai chen Rhea hin a lo control hlak. A sung le kuo le laina hai le taknghiel khawm an biek tir nuom nawh. Kum khat sung khan Rhea hin a pa le nu 11,000 neka tam an biek puia. A unaupa 886 an biekpui bawk. Sushant Singh a roommate Pithani le vawi 101 an inbieka. A ngaizawngpa Susant Singh leh ruok chu vawi 166 char an inbiekpaw a nih. Chu taka 31 calls chu Rhea in Sushant a call-na an nih. Sushant hin 135 times a lo call. Sushant hin a sung le kuo a biek ding hi Rhea hin a lo phal ngai der nawh. Chuong sa khawm chun Sushant hin Rhea hi a thuhne chuong nawh. A dit taluo leiin Rhea thu hi a lo awia. An in sungkuo a sukchen pek ta a nih. Sushant hi a ning an tel em em, an tih. Personal life, family le professional life hai a ngaituo chang a bei a lo dawng thei hle, an tih. December 2019 khan a mobile an switch off pek a. House Manager Samuel Miranda hmingin SIM thar an keidawk a. Chu SIM chu Sushant Singh an inhmangtir. Sushant a pa in Sushant a damnaw thu a lo hril khan chanchin indawn dingin Rhea whatsapp a hai message a lo thawna chu Rhea hin a ngaisak chuong nawh. "Sushant a pa ka nih, ti i hriet si chun, ieng leia ka phone i pick-up nuom naw am a na? A ngaizawngnu i nia, i enkawl nuom ang khan, a pa ka ni leiin, ka naupa damnawna ka hriet a thieng ve a nih". Rhea hin Sushant a unu Priyanka hi khelin a lo intum ta bawk. Rhea lei hin Sushant Singh hin a nu char hi a facebook account ah a laina bik angin a lo tarlang ta a nih. 


4. Blackmail

Reports ah thil tam tak hriet theiin a um pei. Sushant in Rhea kuoma whatsapp message a thawn pakhat zuk tarlang ei tih: "I sung hai hi an fel ie. I pa a tha hle. I unaupa Showik hin mi a hrietthiem. Ka iengkim i nih. In kawl hnaia um ka nuom. Ei vangnei tawl hle a nih". Hi message hi Sushant a mobile a inthawka Rhea bawkin a mobile ah a send a ni el dim chu? Sui mek a nih. Whatsapp message pakhat Sushant in a unu Priyanka Sweta Singh Kirti a demna Rhea in a phawrlang ve: "Khawhri nu, Ka nu thu awilo a nih. Siddarth Pithani hi a nuom ang angin sawisak a tuma. Ka bei a dawng". Sushant a mobile a inthawka Rhea bawkin a mobile-ah a thawn a ni rek el dim chu? Sui mek a nih. 


5. Google

Mumbai Police hai hrildan chun a thi tawm ruoi khan Sushant Singh hin a hming le Nk Disha Salian thina thu chanchinbu haiin ramtin an ziek chu a lo google search a. Painless death, schizophremia le bipolar disorder ti thumal hai google ah a lo zawng bawk. Amiruokchu, google search thaw lai hin Sushant a mobile hi a ma ngeiin a hmet le hmet naw chu hriet thei a la ni nawh. Sushant Singh kha a in sung buoina le mimal beidawngna leia ama le ama inawkhlum a lo ni el dim chu? Ningintel beidawng tawpkhawk leia Sushant hi ama le ama inawkhlum a ni chun Rhea hi jail ah a tlung naw ding ei ti thei nawh.


CONSPIRACY THEORY

1. Disha Salian

Hriet dan chun Sushant Singh a thi hma met tarik June 9, 2020 khan a manager hlui Nk Disha Salian (28 years) chu a ruol tha paruk hai leh birthday party an hmangna ah building sawng sawmpali-na a inthawkin an chawm tlaa, a thi. Birthday hmangna party a hin a ngaizawngpa Tv Rohan Rai khawm a thang ve. Thenkhat chun Nk Disha Salian kha inrai lai a nia. Building a inthawk an namtlak a nih, an tih. Sushant Singh hin a manager hlui nu thi dan kha a lo sui ve ngat ngat a. A ngaituo thar pha a lung a awi thei ngai nawh, an tih. A thi hma met birthday party an neina hmun a inthawk Nk Disha Salian khan Sushant Singh hi a lo phone-a, thil um dan ramtin a lo hril, ti pawl an um. Sushant Singh hin Nk Disha thil hril chu mipui hrietin puong dawk a lo tum a. A ruoltha thenkhat a lo hril. A hmelma haiin an hung hrietdawk ta leiin Sushant Singh hi an that ta a nih, titu an um. 


2. Whatsapp voice calls

Sushant Singh thidan kha ringhlel a nina san chu an khaihlum lai photo hi a nei an um nawh. Ambulance khaltu in Sushant a ruong kha fan a inthawkin a pawmtum a tih. A roommate Pithani in a ma pawmtum a nih, a tih. A rienga khit puonte khawm aman a sut, a tih. Cook Neeraj in ama pawmtum a nih, a ti ve. Copper Hospital kher kher an lo pana. Hi hospital a thawktu thenkhat hi fake medical report siem hlak anga ngai an nih. Parveen Babi le Jia Khan hai an thi zo chara an pan puina hospital kha a nih. Ambulance pahni an hmang an tih. A ruong an zawndawk ni khan Sushant Singh a ruong kawllai ringhlel pakhat lo invirkuol char char hmu a nih. Hi ni bawk hin nuhmei pakhat chu Sushant a in compound sunga tlanlut le tlan suok hmu a nih. Nk Disha Salian thi hnung khan a ti ve hle thu Sushant Singh hin a unu Meetu Singh kuomah a lo hril, an tih. Rhea hi a ring ang a lo ni naw thu Sushant hin a ruoltha pali hai kuomah a lo hril. 


Rhea le Sushant a roommate Pithani hai hin June 8, 2020 a inthawka Sushant thi ni June 14, 2020 chen kha Whatsapp voice calls chau hmangin an lo inbiek a nih. Rhea hin June thla laia a Whatsapp message thenkhat a lo delete ta bawk. Sushant a dairy a phek thenkhat pawttler an nih. Postmortem report ah time of death an zieklutsa nawh. Sushant a ngaizawngnu Rhea le Sushant a roommate Siddarth Pithani haiin dawn ngei ngei ding zawna an hau ta hle a nih.


Thukharna

Tuta Police in uluk taka an sui hai chu a hnuoia ei tarlang pakuo hai khu an nih:

1. Sushant Singh a ruoltha Choreographer Tv Ganesh Hiwalkar in Sushant a manager Sandip Singh a ruolpa hrilna a hriet sawng dan a hrilna a chun hieng hin a hril: June 13, 2020 zan khan Sushant Singh a in ah party an nei ti thu Sandip Singh in a hril. CBI hai kuoma hi thu hi a hril ngam thu Tv Ganesh Hiwalkar hin a hril bawk. June 13, 2020 zan khan Sushant Singh a in ah party an nei chi am? An lo nei chun, tutum an thang? Sushant Singh a roommate Siddarth Pithani hin ip a nei ning a ti?


2. Kawtkhar karhawng theitu keymaker an kova chu Sushant Singh a bedroom kawtkhar kha June 14, 2020 khan an zuk karhawng el nawh. Amiruokchu, iengtin tin am a nih Sushant Singh a roommate Siddarth Pithani le keymaker hai khan Sushant a bedroom kawtkhar kha an hawng ta tho tho. Siddarth Pithani hi bedroom sunga va lut hmasatak a ni am? Keymaker kha bedroom ah an luttir ve am? Bedroom kawtkhar a sung tienga inthawka hawngtu hin Sushant Singh thi dan hrieng a ti? Kawtkhar pui chu in sung tienga inthawka khar zing a nia chu Pithani hi Sushant a bedroom lutna le suokna hrietu a ni tlat el!


3. Kawtkhar an hawng thei char khan Sushant Singh chu a thisa in an hmua. Tutunam Sushant a ruong hi an hmu hmasatak? Iengtinam an hmu tawl? Sushant Singh a unu Meetu Singh khawm a hmuna a tlung ve nghal anga hril a nih. Sushant Singh a unu bedroom a tlung hma khan tutum a sangpa bedroom ah an lo lut tah?


4. Sushant Singh a roommate Siddarth Pithani hin iengleia Rhea Chakraborty kha a phone hmasatak naw am ning a ta? Ip a nei am a ni aw? Sushant Singh a unu Meetu Singh chun a sangpa ruong chu ceiling fan a inthawk la tla dingin bu suongtupa Neeraj Singh a hrila. Hriet dan chun Neeraj le Siddarth Pithani hai chun Sushant Singh ruong chu ceiling fan a inthawk chun an pawmtum. Amiruokchu, Cook Neeraj Singh le Sushant roommate Pithani hai Police statement an ang ta nawh. Ieng lei am ning a ta?


5. Sushant Singh a ringkhitna an sut khan a ring lai hliemna be an hmu ta tlat el. Sushant Singh kha tu lo sukhliem am ning a ta? Ieng tik hun vela hliem am ning a ta? Postmortem report in time of death a hril ta si nawh.


6. Ambulance kha tunam a ko? Ieng leia film star inlar suspected death a thi hai hrim hrim hi Cooper Hospital a kher kher an lo lut pui hlak am ning a ta? Parvin Bobby (2005), Divya Bharti (1993) le Jia Khan hai khawm kha Cooper Hospital a tho an lo thuoilut a nih. 


7. Ambulance hmangin Sushant Singh a ruong chu hospital tieng an thuoi pheia. Postmortem an thaw zova, ruong chu a sung hai kutah an pekdawk. Sushant ruong hospital an thuoi phei laia tlangval pakhat bag te chawia lo invirkuol rak rak kha tum ning a ta? Postmortem room ah hriet ngailo pasal pakhat lo ngir ve pa kha tum ning a ta?


8. Sushant a ngaizawngnu Nk Rhea le Sushant a roommate Tv Siddarth Pithani hai khan Sushant a thi tawm ruoi June 8, 2020 a inthawka Sushant a thi ni June 14, 2020 chen encrypted whatsapp voice call chau hmangin an lo inbiek char char a nih. A san iem ning a ta? Thup le ip an nei tum ning a ti?


9. Sushant Singh a maksan ni June 8, 2020 a inthawka Sushant Singh a thini nikhat hma June 13, 2020 chen khan Rhea Chakraborty le Hindi film director hmingthang Mahesh Bhatt hai an inbiek ngun hle. Vawi sawm le paruk lai an lo in call hman, an tih. Mahesh Bhatt hi Sushant le Rhea kara inhrietthiemnawna chawkdawktu a ni el am?


Sushant Singh a CDR, PTL le a in compound sunga CCTV footage hai study mek an nih. Ringhlel le hmelhriet hai hohlimpui zing an nih. Sushant Singh a email, facebook account le Whatsapp message hai Police in an check zing bawk. Nk Rhea Chakraborty mobile pahni le laptop, a unaupa moble le a pa mobile khawm Police in an lak tah. An sui zing. ED in sum le pai tienga Rhea Chakraborty dealing an sui zinga. CBI in Sushant Singh a thidan hi uluk takin an suisuok tum zing bawk. Supreme Court khawma Sushant Singh case hi a ngaipawimaw ta bek bek a nih. 


Police haiin a chunga zawna pakuo ei tarlang hai khi uluk taka an suia, dawnna tha tak el an hmu thei pha pha Sushant Singh Rajput a thidan le a thina san hriet thei ni chau a tih.


-Ziektu

Dada le Jojo Pa

16.8.2020

Don't Miss
© all rights reserved
made with by Simon L Infimate