Responsive Ad Slot

MCI Expert Committee ding thlangsuok hai lai Dr. Fimate a thang

Saturday, June 13, 2020

/ Posted by Simon L Infimate
Imphal, June 13, 2020, Virthli(ONP): India rama dinga Medical College tiengpang a enkâitu lientak, Medical Council of India (MCI) hai chun doctor tha le mithiemfilawr a thlangsuok hai lâi Dr. L. Fimate a thang.

June 11, 2020 a Medical Council of India haiin thusuok an siem angin India rama Medical College tiengpanga hma ei sâwn pei na ding, inenkâwlna tha lem a um thei na ding le thangthar hung inchûk ding mêk hai chungthu rêltu ding mithiemfilawr thlangsuok in committee indin a ni a. Committee dingin mi 10 thlangsuok hai lai Dr. L. Fimate, Retired Director, Zoram Medical College, Mizoram, Director, RIMS, Manipur, Professor of Forensic Medicine, Imphal, Manipur khawm a thang.

All India level-a Medical tienga mithiemfilawr, India sawrkarin a thlangsuok hai lai Hmarnau ei hang ṭhang phâk el hi a ropui takzet. India rama Medical tienga Hmarnauhai ta dingin Mêllung pawimaw a tling takzet el. Hi sin ropuitak, Political appointment khawm nilo a, thiemna le sinthaw ṭhat leia India sawrkar i hriet a zuk ni el hi ropui ei ti zuol hle a nih.

Dr. L. Fimate hi tuta Hmarnau dama la um hai lai, sin insâng chel râwn pâwltak ni dinga ring a nih. RIMS Director sin kha, a term zo hnung khawmin vawihni lâi la keisei pêk a ni a, Manipur sawrkârin la keisei nâwk dinga a ti hnungin a nuom ta naw a nih. Mizoram sawrkâr khawmin medical college a nei thei na dinga hma latu tak a ni bâka, Zoram Medical College a Director sin chel hmasatak khawm a ni nghe nghe. Hiengang nina pawimaw tamtak a lo chel hai bâk ah International level le National level a hai chen khawm award tamtak lo dawng tah a ni bawk.(input:Joanan Lal Hmangai)

Don't Miss
© all rights reserved
made with by Simon L Infimate