1. THUHMATHUOI
Manipur Hill Districts ah Village Authority (VA) 725 neka tam ei nei a. VA Chairman 725 neka tam an um. Chutaka 300 vel chu Thadou-Kuki lal an nih. VA member 2,640 an um bawk.
Tipaimukh biel ah VA 58 ei nei a. Chuong hai hnuoia chun VA member 406 an um. VA member pakhat VA Chairman dingin an thlang hlak.
Lal la umna khuoah VA a ngir chun lal chu Ex officio VA Chairperson a nih. Amiruokchu, VA member resolution chu an sangtak. Sawrkar thangpuina le mimal le company donation popo VA in huoilut a tih.
Thanlon biel ah VA 62 ei nei a. Chu sunga chun VA member 434 an um. Hmar khuo paruk a um.
2. MIZO UNION
Mizo Union zarin Mizo le Manipur a Paite khuo tamtakah lal thuneina suktawp a lo ni a. 1954 khan Lushai Hills ah 259 Mizo lal le 50 Pawi Lakher lal hai thuneina suktawp a nih.
Amiruokchu, Thadou Kuki delna khuo a tamlem kha Mizo Union thlipui khan a lo nuoivir hne nawh.
Tuhin chu Hmar khuo a tamlem ah VA a ngir tah.
3. MANIPUR VILLAGE AUTHORITIES ACT 1956
Ei hriet seng angin, Manipur a VA nei thei dan, inthlang dan le thuneina hai Manipur VA Act lekhabu ah an zepsa.
1). Khuo pakhat ah leiman pek hlak in sawmhni an tling phawt chun Village Authority (VA) indin thei an tih.
-Sec 3(4) of Manipur Village Authorities Act in Hill Areas 1956
2). Mipui demand leiin DC in khuo ah VA an din thei bawk.
-Sec 3(2) of Manipur Village Authorities Act in Hill Areas 1956
3). DC in tul le tha a ti chun khuo ah VA an din thei.
-Sec 3(3) of Manipur Village Authorities Act in Hill Areas 1956
4). Amiruokchu, lal la umna ah VA indin a lo ni chun an lalpa chu ex officio VA Chairman ni nghal a tih.
Lal um nawna ah VA indin a ni ruok chun VA member haiin an ni laia pakhat chu VA Chairman sin chel dingin thlang an tih
-Sec 3(4) of Manipur Village Authorities Act in Hill Areas 1956
A chunga information le facts a inthawk khin hriet thei iemanizat ei nei:
Hill district huomsunga khuo popo hi chi hniin ei the thei a. Chuong hai chu hill tax pe hlak khuo le hill tax pe ngai lo khuo an nih.
A. Hill tax pe hlak
(i). In sawmhni neka thlawm umna khuo hill tax pe an um thei. Lal nei an um thei. Lal neilo an um thei. Amiruokchu, VA indin theina an ni ve ve. Customary law sirsanin khuo an enkawl thei veve.
(ii). In sawmhni le chungtieng umna khuo an um. Lal nei an um thei. Lal neilo an um thei bawk. VA indin theina an ni veve. Customary law sirsana khuo enkawl theitu an ni veve.
B. Hill tax pelo
Hill tax pe nuomlo khuo ah VA indin thei an nawh.
4. VILLAGE AUTHORITY
VA hi legislative, executive le judicial power nei a nih. Chu chu customary law sirsanin khawtlang thuoitu haiin an hmang hlak. Police power khawm pek belsa a nih.
Amiruokchu, Village Authority indin nawna khuo ah
A. Sawrkar thangpuina le donation a lut thei nawh.
B. Sawrkar scheme dawng ding beneficiary list siemtu ding an um nawh.
C. BDO/SDO le thangtlanga khuo development thil planning tu ding an nei nawh.
D. NOC lekha ziek theitu an um bawk nawh.
E. SDO in VA election a nei pui thei nawh.
5. VA ELECTION
Khuo pakhat ah in sawmhni tling lo Sadar Hills ah khuo pahni hieng Ekvan khuo le Siloi khuo hai hin an khuo ah Manipur Village Authorities Act 1956 kha an lo zam ve. An lal chu VA chairman in an thlangtling a nih.
1958 le 1961 khan Manipur ah VA election nei a nih. Kum 1971 khan Manipur ah VA election nei nawk a nih. Hi kum bawk hin lal chungthua thuneina insangtak chu HAC pek a nih.
1981 khan HAC in lalna a suktawp tum a. A hlawtling nawh. Kum 2011 khan sawrkarin lalna system hi thaibo tawp a tum nawk a. A hlawtling chuong nawh.
Lal hai thuneina popo VA a pek ta leiin a hminga inlal tir zing sawrkarin pawi a ti chuong nawh. Ha neilo hai armal pek chu a pawi nawh.
6. LAL DIT LO PAWL
Amiruokchu, kum 1967 a Acquisition of Chieftainship Rights Act kha Thadou Kuki lal 300 haiin an lo sawisel nasa. Imphal ah meeting an nei a. Sawrkar an hneng char char a nih. An hlawtling.
Lal umna khuo ah VA a ngir chun, lal chu ex officio VA Chairman ni nghal a tih. Amiruokchu, lal um nawna khuo a ni chun VA member haiin an ni laia pakhat tak VA Chairman dingin thlang an tih. VA Chairman chu khuo lal a ni sung chu DC in VA Chairman a inthawkin a ban thei nawh. Khuo lal chu VA Chairman a nina a inthawkin an resign thei bawk nawh.
Amiruokchu, khuo lalin a lal nina a peksawng thei a. Lalna hi civil right a nih. Chuleiin VA Chairman hi khuo lal a ni nawh ti zawngin civil suit file thei a ni ve. Chu umzie chu court in VA Chairman chu khuo lal an nawh tiin thu an suo hma po chu lal le ex officio VA chairman ni zing a tih.
Khuo lal nina neitu chu:
A. Khuo lal inthlasawng dan zawmtu
B. Naupasal upa tak a pawimawtak
C. Thisen inzawmpuina hnaitak nei hai chau lal nina pek thei an nih.
Lal la umna khuo ah lal chu VA ah ex-officio chairman mei mei a ni tah. A lal nina an dik naw lem chun VA-a a nina khawm DC kuoma ei complain thei a. A ex officio nina chu Court ah khing thei a nih.
7. THUKHARNA
Kum sawmhni panga tling, khuo voter ID nei le khuo danga VA member nilo chu VA member a ni thei a. VA election-na le inzawm thubuoi chu DC in a chiengfel hlak. DC in VA member hai a ban thei bawk.
VA huom sungah sum huoilut a tum leiin sawrkar chun VA hai hi municipality le panchayat a siem a tum zing. A san chu khuo inthanglien theina sum telpui popo hi Panchayat le Municipality Bank Account a chau lut thei dingin kum 1993 khan sawrkarin a lo sietha lei a nih.
Amiruokchu, tlangram a ram nei tum ve phairam mi haiin MLR and LR Act le lal thuneina suktawpa, Panchayat le Municipality indin tum haiin thawk le khatin tlangram ah MLRLR le Panchayat thatzie an sopui leiin tlangram mipui lu an sukhai zing.
MLRLR hi tlangram mipui ta dingin fak harsa ei tih. Lal system chu hmun lien lem ah a bo tah. A um sun khawm a hming mei mei an ni tah.
Panchayat system hi tlangrampa fak thei dinga tuoinam a tul. Panchayat Bank Account a sum ei hmang ve a tul.
Chun Airtel company haiin lal nina nekin ex-officio VA Chairman nina lalin a hmang chu an ngaipawimaw lem ding a nih. Ex-officio VA Chairman nina hmangna ah vantlang an lien lem zing.
VA Joint Bank Account um zing lai dan lovin lal in bank account dangah sawrkar le mimal thangpuina a lo thun thei nawh. Khuo lal a nina sirsanin sum a laklut thei bawk nawh. Ex Officio a nina in VA Chairman a ni thei a. Chu lai zing chun VA Secy thlangtling a um le chau naw chun VA bank account a sum an lakdawk thei ta nawh. Account dangah lalin a thu thuin VA sum a lo chingpen thei bawk nawh.
Sawrkar thangpuina le mimal le organisation donation le thangpuina popo VA hmingin khuo ah lut a tih. Lal hmingin a lut thei nawh. Lal umna VA a ni chun Joint Account a Chairman chu lal ning a tih. Khawm chu khuo lo satdawktu a ni leiin Ex officio mei mei a nih. Elected Secy le VA member dangin an control ding a nih.
Amiruokchu, lal le indiklo taka inthukawp VA Secy an um chun Secy khawm an lo nal met tina a nih. Hi huna hin VA resolution a pawimaw ta hlak. Mimal nekin lal a lien a. Lal nekin VA a lien lem. Amiruokchu, VA chu mipuiin ei thlangtling a nih.
Lal chu inza derna in VA ah ex officio chairman a ni tah. A lal nina hmangin khawlai hmuna khawm sum a lakdawk thei ta nawh. Sawrkar thangpuina le sawrkarlo donation khawm VA sirsan lovin khawtlangin a hmu thei ta nawh.
Sawrkar thangpuina hmu thei ding beneficiary list siem hun le development thil popova signature lo thaw hlak tu chu Village Authority hi a nih. Sawrkar thangpuina popo VA kutah annawle a bank account ah sawrkarin a thun hlak.
Pasie, fahra, hmeithai, tar le piengsuol haiin sawrkara inthawka ei chanpuol ding hai ei dawng chi am? Sawrkar in development le infrastructure bawlna dinga sum a seng hai hi mipui lai VA in a hril hlak am?
PMGSY/NHIDCL hnuoia Contractors le local area a Bieltu haiin ei VA signature la in an hmur hai an lo hip pek vawng el am an ta ding?
-Ziektu
Dada le Jojo-Pa
6.5.2020
