Responsive Ad Slot

Thiemnaw Ka'n Chang Naw Cheu (Theihai lohai Thla Huolna)

Tuesday, May 26, 2020

/ Posted by Simon L Infimate
~ Pastor Alan L Thiek

Hripui leia rêla ei unauhai mani in lum hung pan, phingtam leia rêl lam sira theihai thenkhatin an lo lai video Facebook le WhatsApp a hai a viral nasa hle el a. Tam tak tawngbau ei tiem chun, thei va lohai hi mi suol tawp khawk, hnam sukmuolphotu, lunga denghlum phu hiela  misuol ni awma imtumna tawngbau  a tam hle. Hi chungchang hin ka lung khei deu rieu el a, hrilfie tul uma ka hriet leiin, hi thu tawite hi ka ziek a nih.

Ahmasa takin, unauhai hin a neituhai phalna la hmasa loa  thei hi an va lo a ni ring a umin thudik ni ngei a tih. Hi kawnga hin dan an bawsiet  a nih. Amiruokchu, thei neihai hi rêl lam sirah  lo umin, theihai hi lo zawr hai sien, lawm takin inchawng an tih ti khawm hi ring a umin thudik ni ngei a tih. Ei unauhai hi an ngirhmun hi ei hriet ve a tul. Anni hi rukru reng, khawpuia rukrua fakzawnga fe an ni nawh ti hi ring a umin, thudik ni ngei a tih. Hripui buoina leia mani in lum pan, ni hni lai rêl a fak ding um mumal ta lo, phingtam beidawng an nih ti ei hriet a tul. Lam palai lakah rêl hi sawt fût a chawl taha, vangnei thlak takin  rel lamsir ela theihai bil a lo um a, an tuma, an va lo el a nih. Ni dang, dân pangai anga rêl a inlawn, bu le fak ding  tam tak um zing ni sien, tukhawmin rêla inthawka tumin, hmun hla fea theihai kunga va kaiin,  thei hi an va lo ka ring der nawh. Lo naw bawk an tih. Amiruokchu, an ngirhmun in a zir ta ngang naw leiin, phingtam leiin hi thil hi cham loa an thaw el ring a um. Ei Bible khawmin  " . . .a phîngtam laiin an sukkhawpna dinga a'n rûk  chun mihaiin an hmusit ngai nawh a" (Thuvarhai 6:30) tiin mi hril a. Hieng ang deu hin, Thuoihruoihai khawm Chawlni vawi khat bubil an hraw thlenga, buvui an thliek thu ei tiem kha tie! (Marks 2:23-28). Chuleiin ka unauhai, ei Lalpa Isu Khrista tawngbau hawin , "Kei khawmin thiemnaw ka'n changtir naw cheu; fe la, tuta hnung chu suksuol nawk ta naw" (Johan 8:11), tiin in thla vâng huolin ka'n thla cheu. Dam takin in ngai em em ei ram him takin hung tlung seng ro!

Shalom!

(Thubel: Theihai lohai hi ka hmelhriet, thisen inzawmpui ka nei nawh. Anachu ka unauhai an nih)

26.05.2020
Don't Miss
© all rights reserved
made with by Simon L Infimate