Responsive Ad Slot

Dr. Chaltonlien Amo in Pherzawl Dist. Quarantine Centre a kan; bufai bag 20 a pek

Tuesday, May 26, 2020

/ Posted by Simon L Infimate
Tuithaphai, May 25, 2020, (Virthli ONP): Tipaimukh MLA Dr. Chaltonlien Amo chun May 25, 2020 khan Pherzawl Dist. Quarantine Centre, En- Gedi Camp & Retreat Centre, Gelzang a um chu hang kan nawkin an fak ding bufai bag 20 a pek a, sawl taka Quarantine Centre enkawltuhai kuomah refreshment chi tum tum an hlan bawk. A hang kan hmasak khan cheng 10000/- a lo pek ta bawk anih. Covid-19 dona kawnga ral hma tawngtu- medical le administrative staff hai chungah a thar tharin lawmthu a hril a, Quarantine Centre a ni 14 lo um tling tah Covid19 natna hri laka an him ngei a nih ti medical lekha neihai chu an khuo tieng an kir thei ding thu le abikin Tipaimukh biel mihai ta dingin an fe na ding motor khawm a tul ang anga ngaituo mek ani thu a hril.



A hril peina a chun Pherzawl Dist Quarantine Centre a um po hi a tlung hmasa le a tlung nuhnung hai an rengin mi 79 an tling ta thu a hril a. Ni 14 lo um tling tahai suok thei dinga medical lekha nei hai po chu an khuo tieng an kir huna mipuiin lo enhran lo dingin le duot taka lo lawm lut dingin a hril.


Dr. Amo chun state puotienga inthawk mi tamtak an la hung ding ani leiin thangpuina tamtak a tul a, MLA ani lei ringawtin a rengin a thawthei bik naw thu hrilin sawrkar a chau innghat loa a nuom taphawt han phutluina um chuong lovin iengtiklaikhawm thangpuina pek thei zing ani thu a hril a. A hril peina a chun Pherzawl Dist. Quarantine Centre a Management Committee le District Officer hai hrietpuiin Bank account khawm hawng ani thu a hrilin a operate tu dingin Pu Laldawnlien Varte, Gen.,President, HYA GHQ le Pu L. Thanzam Pulamte, Gen. Secy., HNU hai ruot an ni thu le thangpuina pe nuom hai chun anni kuoma hin ngaiven thei zing anih tiin a hril bawk.


Hi huna Pu Laldawnlien Varte, Gen., President, HYA GHQ khawma thuhrilna neiin Quarantine Centre a ni 14 lo um tling tah, Medical Department han tha taka an enkawl hnung le suok thei dinga an puong medical lekha nei hai po chu an khuo tieng an pan huna HYA lekha khawm inchawitir an ni ding thu le an khuo mihaiin duot taka lo lawmlut dingin a hril. Dr. Phirthanglien Buhril, Pherzawl CMO khawma thuhrilna neiin, Quarantine Centre a ni 14 enkawl an ni hnunga mani khuo tienga fe thei dinga hai po hi Covid19 natna hri anthawk an him ngei anih ti sukchiengna'n Medical Certificate pek an ni ding thu a hril a, a tul hun huna hung thangpui hlak tu Tipaimukh MLA, Dr. Chaltonlien Amo kuoma le ka sawl ka khawm ti loa Department hran hran a inthawka hung thangpuitu hai chungah khawm lawmthu a hril.
Don't Miss
© all rights reserved
made with by Simon L Infimate