Responsive Ad Slot

LEKHA INCHÛK ZOVA LEKHA TIEM ṬAN

Wednesday, May 27, 2020

/ Posted by Simon L Infimate
~ V.K.Pangamte

‘Lekha inchûk zo ti a um thei hrim hrim naw a, hriet sêng ding khawm a ni bawk nawh’ ti hi hril le hriet dân chu a ni tlângpui a. Amiruokchu, hi taka ‘lekha inchûk zo’ ei ti ruok hi chu ‘pâwl tlung tum chen tlunga inchûk zo’ ti a nih. Mi pakhatin pâwl sâwm chen inchûk a tum a, a tum ang ngêia pâwl sâwm a hlawtling hnunga inchûk sunzawm naw chu ama ta ding chun inchûk zo tinâ a nih. Pâwl sâwm pahni chen inchûk tuma a hlawtling hnunga a chungtieng inchûk sunzawm ta naw chu ama ta dingin inchûk zo ti thei nîng a tih.. Chuong ang bawkin, pâwl sâwm pahni chungtieng khawm a nih. Pâwl sawn tum ringawta lekha lo inchûk kha chu a lo phâk hla rak naw khawp el. Anachu, lekha tiem ruok hi chu a dân a dang ve tlat el! Ziek le tiem thei lo chu thu khat a nih. Mihriem hi chi dang dang, ngai dân, hril dân, hriet dân, nuom dân le thu fepui dân khawm inang lo a nih. A thu keunaa ei hmang nuom chu, ‘ziek le tiem thei taphawtin a let tamin hmâ sâwn tum ei tiu’ ti a nih.

Khaw khata um seng seng khawm lekha tiem inhnik le inhnik naw chu an kâr a um a, lekha tiem naw le lekha tiem kâr lem chu a hla zuol. Sawrkâr sin hmu le hmu naw tieng kher ni lovin, a ni têlin inhlatna a um tiel tiel hlak. Chun, school kai châwlsan hai lai khawm lekha tiem ngaisak lo le um pângngâi ringawta umhai kâr a um. A san chu, lekha tiem ngun chu a bengvâr a, biek le titi khawm a sukzâng hlak. ‘Lekha’ tia hin Sâp ṭawng le ṭawng dang tinâ kher a’n naw a, mâni piengpui ṭawnga inziek lekhabu tam tak tiem ding a um. Nu le pa hai ta dingin Bible le lekhabu dang dang tiem ding a um a, umze nei le ṭha taka an tiem a ni chun, tuta ei ngîrhmun nêkin kohran le khawtlâng lai khawm thu thar le hla thar a tlung rawp ring a um. Nu le pa le mi ṭhenkhat ta dingin sin thaw leiin hun hmang indik chu a harsa el thei, anachu, Pathienni bîk le hun âwl nei chângin lekhabu tiemna hun ṭha tak a um. Hieng anga lekhabu tiem ṭangkaizie hrea ei tiem sau sau a ni chun, kum tam ngai lovin insûng changkâng, khaw changkâng le ram changkâng ni thei ei tih ti chu inphatruol hrim a’n nawh.

Lekha tiem taima ram chu ram changkâng le mi changkâng ram a nih. Ram changkâng le mi changkâng tia hrietlâr an nina san chu mi thiem an tam lei a nih. Chu chauh chu ni lovin, ram inhawi le ram hrisêl tia hriet an nih. Officer le ram ṭhuoitu lien ni vawng thei naw manih, thiem thil le hrietna khawm inchen seng bawk naw nih. Inrem le inhmangai diel diela um dingin Pathienin a mi dit a, indo le insukbuoi chu a ṭha nawh ti ei pawm. Sin inhnuoi le sin insâng tiin mihriem lungvar hmangin ei ṭhe rawp hlak a, mi ṭhenkhat lem chun hmusitna ṭawngbau chen an sâk suok hiel hlak, thil pawi tak a nih. Hieng anga lungril chapo neitu chu mî ngaisâng nêkin mî hlutsak an hlaw ngai nawh. Khawvêla hin mâni mihriem chanpuihai hmusit khawpa rohlu le uongpui tham ding ie’m a um hrim a? Hlun lo ding seng senga khawm, lekhabu tiem taima hin hlutna a nei si a. Chuleiin, lekhabu tiema taimâk insuo tharin, ṭhang la thar pei ei tiu.

Lekhabu tiem ding ruok chu thlang uluk a ṭha, lekhabu taphawt tiem a ṭha tinâ a’n nawh; a san chu, lekhabu ṭangkai rak lo a tam si a. Țhalai lekha inchûk seng seng khawm a kâr a la hung um pei ding a nih. Sawrkâr sin hmu hmaa lekha tiem nasa ding, hmu hnung khawma la tiem pei ding tinâ a nih. Vawisûna district, state le central-a ṭhuoitu hai hin an lekha tiem tâwpsan el hai sien chu, mipui hmabâk ṭhuoi dân ding buoi map an tih. Second tinin chanchin thar a tlung a, thu thar tlung ang peia inhem dân le mipui ṭhuoi dân hre lo hotu chu mi ṭhing a hlaw thei a nih. School-a khawm kum nga le kum sâwm liem hnunga ‘notes’ inpêk chu indik sien la khawm a fe ta naw a, a hlui ti a ni hlak. Hun thar a tlung ang peia inhêmmil thiem a pawimaw a nih.

Mihriem chu a thi tâwm chenin inchûk ding a nei ti ei hriet a. Chun, ‘upatna hi kum tam el ni lovin, mî chu thil a’n chûk tâwp le inruolin a upatna a’n ṭan chauh lem’ ti khawm ei hriet bawk. Lekha hi tiem tam ding chu a lo va ni ngêi de aw! Degree lâk zova inthawk dâmin lekha hi tiem ta naw el inla chu, ieng chen am hrietna ei intling khâwm ding chu aw ti dâm ka ngaituo neu neu hlak. Chuleiin, tuta inthawka pût thar khawmin a la’n hnu se naw a, intâwl det deta hrietna thar nei pei dinga inbuotsai a ṭûl a nih. Lunghnuol lovin hmatieng pan pei ei tiu. Tum neia lekha la tiem taphawtin kampet meuva ṭhang lain, a hrana tum nei ta naw khawmin lekha tiem zing chu a pawi dêr nawh; hmangna hun a la um tho hlak. Lekhabu ṭha lo tiem la, i nuna chun hlimna danglam tlung ngêi a tih. Lekhabu ṭha le lekha thiem hlutzie chu, sum le pai, hnuoi hausakna kei khâwmna ding nêk hman hmanin, hringnun hmang dân le khawsak dân chen a mîn chûktir thei a nih. Hausakna le hmêlṭhatna thurûk inthup i nei nuom a ni chun, lekha tiem inthlada lovin lo be fan fan rawh. Harsatna le rinumna chi dang dang a um thei a, hlawsamna hmaa ruok chu inpe phal lul naw rawh. Kei chu ‘Lekha ka’n chûk zo hnungin lekha tiem ka ṭan tak tak tum chauh a nih.’

Bethel, Tuiṭhaphai
Thlaphur 26, 2020
Don't Miss
© all rights reserved
made with by Simon L Infimate