Responsive Ad Slot

Saikot MDC biel ah bufai sem

Thursday, April 2, 2020

/ Posted by Simon L Infimate
Sawrkara inthawka Relief Fund hung ani leiin mi tinin a thlawnin an chang seng ding anih: Pu Lalhrillien Zote, Saikawt MDC

Saikawt, April 2, 2020, Virthli (ONP): Tulaia natna hri inleng Covid-19 leia emergency Lockdown puong le inzawmin vawituk khan Saikawt Community Hall ah Pu Lalhrillien, Saikawt MDC, Pu Alfred J. Khaute , SDO Saikot, Pu Daniel Gangte , President, Kuki Inpi Churachandpur, Hmar Inpui, HYA le Saikawt Defence hai keithuoina hnuoiah PDF bufai Bag-904 chu Saikawt MDC biel huop sunga khuotin a mawphurtu hai kuomah semdawk a nih.

Hi huna Pu Lalhrillien, MDC Saikawt in thu a hrilna a chun a semna hun chen tlung thei dinga hma nasataka latu Joint Philanthropic Organisation- Hmar Inpui, Kuki Inpi Churachandpur, HYA le  Saikawt SDO hai kuomah mipui aiawin lawmthu a hril a. A hril peina a chun hieng ang sawrkar a inthawka thangpuina hi hmatieng peia khawm la hung nawk thei a ni leiin, a tlungna ding hmun indiktaka tlung dingin le khuotin a semtu dinga ruot hai chu indiktaka sem dingin an fui a, thil indiklo le felhlel a um chun maw an phur ding thu hrilin mitinin an chang seng theina dingin fel taka sin thaw tlang dingin a fiel tawl . Hi bufai hi job card le ration card base a hung an naw zie thu hrilin, Covid-19 natna hri inleng leia sawrkar a inthawka a hran lieu lieu a thangpuina Relief Fund hung ani leiin bufai hi a thlawnin mi tinin an chang ngei ding a nih tiin a hril.

Bufai hi khuotin a mawphurtu hai kuomah semdawk a ni zoin Pu Lalhrillien, Saikawt MDC, Pu Alfred J. Khaute, Saikawt SDO le tlawmngai pawl Philanthropic Organisation a thuoituhaiin Saikawt MDC biel sunga fahra le thangpui ngai hai umna - Children's Home Saikawt, Mount Carmel, Muolvaiphei, Babies Home, Boy's Home Muolvaiphei hai kuomah bufai bag inhlanna an va nei.


Khuotin a bufai bag semsuok a um hai hi mawphurtu haiin vawisun khan an khuo chit a hai an sem a, mipui a hlimin an lawm tlang hle ti thu dawng a nih.

Don't Miss
© all rights reserved
made with by Simon L Infimate