Responsive Ad Slot

HUN AWL HMANGTHAT

Wednesday, April 1, 2020

/ Posted by Simon L Infimate
~ Evan Lalhmingthang Thiek, Jamtuli,Tripura.

Ei khawvel boruok tawng mek hi a khirin a harsa ve ang reng khawp ela.Tarik 24th March zanrila inthawk April 14th chen aw dingin, ei ram india pumpui chu, LOCKDOWN ani ding thu ṭhuoitu hai chun an puong tarup ela. Mitamtak chu hi Covid-19 a buoi lovin, ei fak ding le ei sil ding thua hin ei buoi nasa lem ka ring. Abikin takin ka lungrila hunglut hmasa tak chu, ka sungkuo hai iem chang an ta aw tile ka hnam chanpui hai iem chang tang an ta, ti hin ngaituona amin neitir veng veng el a. Ei hnam hi mi hnam hai anga khawsakna insang tak tak hi eila tam rak naw a, nitina inhlaw le nitina sinthaw hi ei la tam lem sih a. Nitinin sinthawtuhai sin an thaw thei ta sin naw chun, sungkuo tlaksietna, khawtlang tlaksietna le kohran tlaksietna an chang pha el dim ti hi ilo ngaituo hlak dim chu maw ? Nitina sinthaw zing zing tadingin hi LOCKDOWN hin nundan pangai a suksiet nasat dingzie hi ilo sungtuo hlak am ?.Virus a laka himna ani zing laiin ei ta dingin, ṭampui keitlakna dam an chang el dim an taw aw !.

Iengpokhawm nisienla khawvela la um ei na, khawvel dan le dun chu, inza tak le uluk takin eila zawm chu a la ngai phawt ding ani, a palzut tu nilova a zawm tu le inza taka enkawltu ni seng lem ding eini aw. Ei Biekin inkhawmna hai tak ngiel khawm ei taksa himna dingin ei la sukchawl hri phawt tawla. Social media tieng ei ring ei hang suksei hlak chun, ei hmu le ei hriet hai hlak, thu tha le thu hlimpui ding tak tak um ta lo, tina ding, thlapangna ding, lungngainna ding le ṭapna ding vawng ani ta si. Ei hriet zing dinga dit um em em chu, khawvela thilhaia hin chu, lawmna kumhlun le hlimna kumhlun a um naw zie, tuta ei khawvel tawng mek a hin ami sukchieng pek zie hi hrie thar inla ka nuom takzet.

Tuta ei hun tawng meka, ringtu haiin ei thaw ngei chi tamtak a uma, sienkhawm arengin chu hril seng nawng ei ta. A pawimaw ei ti zuol hai tlawmte hei tarlang veng ei  tih. Bible chun, ‘’Nihai hi a that naw leiin remchangnahai inchaw pei ro’’ (Eph 5:16) tiin ami hril, chuongangtakin eini hai khawmin ei hun awl nei hi hmangtangkai tum ei tieu.

1. ṬAWNGṬAINA INDINTHAR NAWK
Ringtu hai hi Daniel anga, Pathien nitina buona, Pathien le hun hmang hlak ding ei ni ti hi ei hrieta, sienkhawm a hmang thei hi ei tam rak hmel naw ngei el a. Ei khawsakna na ngaituo na haia ei buoi zo am tangka sum le fak ding zawngin ei buoi zova, malsawmna mi petu, ami siemtu le Chatuona hringa mi petu tading khawmin hun hmang thei ta lo ei na, chuleiin hi LOCKDOWN hun hi LALPA le ei inlaichinna siemthat nawkna ding le ei ṬAWNGṬAINA maicham sieta indinthar nawkna dingin hunṭha tawpkhawk ani ti hrezing ei tih. Daniel chu a pindana a tukverhai chu Jerusalem khuo tienga hawng zing ana, chun, nikhata vawithum dingṭhathuonin Pathien kouma ṭawngṭaina le lawmthu hrilna a nei hlak. Josua chun, kei le ka sunghai ruok hin chu Lalpa rawng ani kan bawl ding, tiin a hril. Roman hai Father PATRICK PEYTON (1909-1922) chun hienghin a hril a, A RUOLA ṬAWNGṬAI HLAK INSUNG CHU AN CHENG HMUNKHAT HLAK’’ (The family that prays together stays together ) Suongkuo hi ei ṭawngṭai hmunkhat ngai naw leiin ei lungril le ei thaw nuom hai khawm hi a danglam zo ta ani ie. Suongkuo a ruola Lalpa bietuhai le Lalpa tienga ngha hlaktu hai chu, inremtak le lungril hmunkhatin an um thei a nih. Vawisun hin unauahai ei sungkuo maicham lo chim zo ta le a ruola ei um thei ta nawna hai hi, thaw ro tuhi ani in siem tharna hun ṭha. Ringtuhai hi tawngtai zing ding le ma lova tawngtai ding ei ni ti hi ei hriet zing ding a
nih.


2. BIBLE TIEMA HUN HMANG

Eini rawi hi, TV, WhatsApp, Facebook, Instagram, Twitter, Games inhnelna hai le a dang danga haia ei update tawl khawp el a, sienkhawm Bible tiemna ruok a hin chun regular taka tiem hi chu ei vang vieu nuom khawp el. Hi LOCKDOWN sunga bek hin chu Bible ei hringna tak bu hi, Bung KAR SAWMNGA OR ZAKHAT bek tiem tum dingin ṭhang la thar inla nuom ava um lawm lawm de aw. Naupang Mary Jone in Bible a ngaina em em thu kha ei hriet fur chu ringa a uma, eini hai khawmin Bible hi ei ngaina tawk am aw. Bible hi Pathieni zingkara, zakhnuoia kepde ding chauin dit nawng ei tieu a, chu nek hmanin nitina tiem ding le ngaituo rawp lem ding ei nih.

U S Secretary (1841-1843) DANIEL WEBSTER chun hieng hin a lo hril a, ‘’IENGTHIL KHAWM KA THAW TAK TAK DING ANI CHUN KA NU LE KA PAHA, N NAUPANG CHITE KANI LAIA BIBLE THU NGAISANG TAK DINGA AN MI HRIL KHA KA HRIETZINGIN, CHU CHU KA NUN THUOITU THATAK ANIH’’ tiin a hril a nih. Mihaiin Pathien thu hi an lo va hmang ṭangkai lawm lawm de, an nun ṭhuoitu ani el chau nilovin sungtlak takzet ani zie an man fu takzet a nih. Ṭhenkhat chun indik lo takin, BIBLE hi hlui taluo ta, tulaia mihai a chawm ta naw. Tulai chu SCIENCE thiemna, varna an ṭhang hrat taluo leiin, chuleiin hi BIBLE hin tulai hun a phak ta naw an tih. An hri ang ngeiin Bible chu a upa hle ta. Sienkhawm lungrila Bible tiem tlat tuhai chun a ropuizie, a hlutna an hmu a, an hun pal meka dingin a pawimawzie an hmu hlie hlie hlak. AN TIEM RAWN PO LEH AN TADINGIN THUTHAR ANI PEK PEI LEM SI, AN HRINGNUN LAMPUI THUOITU ROPUI THATAK ANI PEK HLAK. Mi tamtak chun hi khawvela hin hlimna, innghatna zawngin an tlan vela, an hmu zo si nawh. Unauhai Pathien thu chau hi suongtlak, hlimna tlak le hringnun ṭhuoi theitu chu a nih. Bible thu chun mihriemhai buoina, khawvel buoina po po le natna chitin reng hai sukdanglam theitu le sukdam theitu a nih. Ei hringnuna indawnna tamtak hai khawm hi, Bible chun dawna ami pek thei a nih.
I THU HI KA KÊHAI TA DINGIN KHÂWNVAR A NA,KA L;AMPUIA DINGIN VAR A NIH.(Sam 119:105).

3. SUONGKUO LE HUN HMANG TLANGNA  HUN THA

Ei sungkuo or family chem kalna zawng an ang vawng naw a, a ṭhen nitina office kai, a ṭhen nitina sinthaw, a ṭhen teacher sinthaw khawm ei lo ni el thei a. Ei sinthawna hai leiin ei sungkuo hai le hun ei hmang tlawm em em a, sin buoiin ei buoi zo a, ei insung mi iengza’m ana ti vel khawm ei in thei nghil zo tum el an ta a. Sienkhawm sawrkarpa’n ei sungkuo mi iengza’m anna ti ei hriet thei nawkna dingin hun ami siem pek hi, indawi der lovin ei sunghai le hun hmang tak tak dingin ka ditsak che. Suongkuo hi ei ngaitha leiin miṭha le hmangtlak hi nitin el hin ei vang tul tul niin an lang a nih.
Evangelist ropui BILLY GRAHAM chun hieng hin a hril a, ‘’HUN LIEM TA HAI KHA HMANGṬHAṬ NAWK THEI NISIEN,KA SUNGKUO OR KA INSUNGAH HUN  HMANG TAM LEM TANG KA TIH’’tiin a hril. Hitak inthawk khawm hin, sungkuoa hun hmang tam a pawimaw zie chieng takin ami hril vet thung a nih.

Hi article tiemtu hai po povin, ei LOCKDOWN sung hin um mei mei lova hlawk tak le tangkai taka ei hun awl hai hmangthat dingin ei inditsakin ei in ngen tak meu a nih.


Lalpa’n a tiemtu hai po po malsawm mawl raw se ti hi ka tawngtaina a nih.






Don't Miss
© all rights reserved
made with by Simon L Infimate