Responsive Ad Slot

COVID-19 ISU LEH

Sunday, April 19, 2020

/ Published by Simon L Infimate
~ Upa John Lalhminglien

Jacob chun a sûnghai le a kuoma umhai po po kuoma chun, “Nangni laia mi dang pathien umhai chu sie hmang dai unla, insukthiengin in silfênhai inthleng ro; …ka lunginzîng laia mi dawna, ka fenaa ka kuoma um pei Pathien ta ding khan maichâm siem ka tih” a ti a nih.(Gen. 35:2,3)



Awleh, tulai khawvel suklunginzîngtu Covid-19 hun hi, khawvel mipui a tam lem ta ding chun, “Hun rinum, beidawngna hun” ni ngei a tih! Jacob chu, a u Esau lakah a lunginzîng lai hun chu Pathien a buon lai hun; a kuoma Pathien an lâr lai, a kona Pathienin a dawn lai” a ni tlat el ! Chuongang bawk chun, Kristienhai tading chun, Coronavirus leia khawvêl lunginzîng lai (Lockdown) hun hi, “Pathien thu sermon le inpâkna hla ei ngaithlâkna hun, hrilna le sakna hun, sungkuo tin-in pathien tak ni lo, ei lungrila lalna lo changtuhai ei pei hmangna hun, Pathien hmaah Maicham ei rem a ei insukthieng hun, Lalpa hmaah ei inhlân tharna hun, ei țawngțaina Pathienin a dawnna hun, Pathien chu ei insunga an lârna hun, Pathien le ei inpâwlna huna inchang sien nuom a va um ngei dê!!

A nakie chun, “Ei sukdik naw tawp el a! Vawisun hi chanchin lawmum intlun ni a nih, eini hi ei to zing el a; khawvar ei nghâk chun hrem tuok el ei tih, chuongchun, thaw ta u, lal sûnghai va hril ei tiu.” tiin an inbiek a. (2 Lalhai 7:9).
Hi thu hi, Suria lal Benhadad le a sipai haiin Samari khuo an hang inhuol laia, Elisa hrillawk anga, Israel hai sansuokna dinga Pathienin phâr pali hai hmangruoa a hmangna thu ropui tak el a nih.

Awleh, ei zalen lai hun, Biekin sunga khuongpui le inri-dup dupa zâi ei vâwrlai hun chau kha, "Hun lawmum, Sandamna ni, Lalpân a mi ngaithlâkna hun” a ni naw tawp el. Tulaia hun danglam tak el, Hripuiin khawvel an huolkhum mek hun lai (Lockdown hun) khawm hih, “Ngai ta u, tuhi hun lâwmum chu a na, Ngai ta u, tuhi sandamna ni chu a nih”.  Hieng hun a khawm ei to zing el a; khawvar ei nghak el chun, ei chunga Lalpa lungawi naw nih. Khawhêm Pathien bie-pawp dingin Pathien hmaah thupha chawiin hang inhlân thar ei tiu chuh! “Khawhêm, kei le kan insûng maichâm chim ta hi Pathien chengna tlâk ni dingin hang rem-țhar nâwk ka tih, khawhêm, khawtlângah, kohranah, sungkuo le mimal nun ah revival a tlungna dingin le khawvel sansuoka a um na dingin, chanchin lawmum hi khawvêl’in a hung hrieta, Pathien tak hi chawimawia a um theina dingin, ka theina popo hmangin Pathien buonna hun in hmang ka tih (Lal sunghai va hril ka tih)” ei ti ve na hun a ni naw dîm a nih? Ti thei seng inla nuom a va um de!

Hla phuoktû'n, “Keinîn vangduoina a kan ruot, a hmangaina inlangtirtu” a ti angin, khawvelin vângduoi huna a ruot Covid-19 leia Lockdown hun hi, Pathien hmangaina, hmelthar ei hmuna, Pathien Thlarau Thienghlim le ei inpawlna, hun rangkachaka hmang seng ei tiu.

“Hun lâwmum ah ka ngai thlâk che a. Sandamna nia ka țhangpui che” a ti si a. “Ngai ta u, tuhi hun lawmum chu a na, Ngai ta u, tuhi sandamna ni chu a nih” (2 Korinth 6:2).

Unau, khawvel an ri ret-ret, an ri rum-rum lai hun a hin, iem i chang-a? “Hun rangkachak” i ti thei ding? Lalpân a ko che, Lalpân a ngaithlâk che, A kona che dawn dingin ngaiven rawh. A biekna che dawn dingin, Ama kuom tieng nghakîr rawh. Chuongchun, ieng râl, ieng hri khawm hung hrâng sien; “Khawvelin a pek thei lo malsawmna, thlamuongna hun lawmum chu Krista zarah ka ta a nih, Haleluiah” ti thei zing dingin Lalpân a thu mal mi sawm pêk raw se.

Tiemtu dittak, Covid-19 hun Isu Krista le hmang dingin ditsakna kan chân che.
Don't Miss
© all rights reserved
made with by Simon L Infimate