Responsive Ad Slot

CHÂWIMÂWINA RÂWL DANGLAM (Palm Sunday Thucha)

Saturday, April 4, 2020

/ Published by Simon L Infimate
~ John L Pulamte

"Hosanna!
Lalpa hminga hung chu a ham a ṭha!
Lalpa hminga hung ei Pa David lalram chu a ham a ṭha!
Chunghnung taka khin hosanna!" ti'n an khêk a.
~ MARKA 11 : 9&10

Tû kuma ei PALM SUNDAY hmang chu kum dang naw ang takin a dân a dang ta ngêi el. "Thû chu tîsain a hung inchang a..." tî ni hlak sien khawm, tîsaa zuk inchangtir ding a thû ringawt khawmin ei hmang/thaw thei tâk naw leiin, thlarâu tieng khawmin a lo tuor pha deu ding chu a ni âwm hi. A pawi tak zet.

Kum dang chu hieng ang huna hin khawlai dung fangin, sâwl hnâ châwiin HOSANNA ti'n Pathien châwimâwiin a ruolin ei khêk ṭhup ṭhup hlak a. A neitupa (Isu) ngêi khawmin ngaithlâk inhawi tiin a lo hlimpui thei hle ei zuk ring a, chung tienga inthawkin sûmpui anga nasain Vân mipuihai khawmin an mi lo thlîr ve ei zuk ring bawk a nih. Vawisûn huna ruok chu natna hrî ṭium takin ei bâuhai mi huppêkin ei kêhai a mi khuop khawngpêk a; ṭawng thei lo angin ei dei chip a, tuol suok thei lovin jail-a khum ang elin manî in senga inkhum ṭawk ṭawk chu sinpui takah a mi'n neitir pha ta a nih.
Kum danga hieng huna HOSANNA tia Isu ei châwimâwina rîhai kha lusûn ṭap inrûm khêk rîin a lân zo ta a, PALM SUNDAY dâr rî chu mîthi dârin a lo inrîk khal lem ta a nih.

Vawisûn huna ei Palm Sunday hmang dân hin, a neitupa (Isu) chu sukmangang ngawt a tih. Kum dang khan chu hieng ang huna hin Ama châwimâwia HOSANNA tia khawlâi dunga le Biek In tuola hai hla sakin ei khêk indur el hlak kha a n'a. Vawisûn huna ruok chu khawvêl chau khawm ni lovin Vân khuo khawm ngûi dup dingin ka zuk ring chu tie. Ni ê, kum khat sûnga châwimâwina a dawng ve sun sun hlak khawm dawng phâk ta lova lusûn beidawng khêk rî le inpâwngnêkna rîhaiin a hei lân zo el ta chu thil beidawngthlâk tak chu a ni hrim a nih.

Isu bei fatuhaiin HOSANNA râwl danglam HEM DE RAWH tia an khêk nâwk ang khan vawisûn nî hin einîhai khawmin HOSANNA râwl danglam hmangin nasa takin Vân Lalṭhungpha nghawrhnîng rak khawpin ei khêk khum a, Vân khi ei suklungngai a, chûleiin hun lo em ema ṭhâl rum lai taka Vân ruo tui dâm ei hei dawng ta ṭuk ṭuk el hai dâm hi Vân mipuihai lungngai mittui inentirna khawm ni sien a hawi ka zuk ti hiel el.

Ei HOSANNA rîhai a danglam zo tâwl ta a, châwimâwina rî ni ta lovin, chêksawlna, hmusitna le inpâwngnêkna rîhaiin Vân khi ei ur dum zo ta a, ei sukhmêlhem zo ta a nih.

Ei Bible-in Pathien In sukkhawhlotu chu ama khawm sukkhawhloin a um ve ding a nîzie thû chieng takin a mi hril a. Chûleiin vawisûn huna ei hripui tuor mêk hi Pathien In ei sukkhawhlo man ei intêlna ni naw nih hi tu am ti thei? Bêla tui chau hi tawng buok thei a lo ni nawh; Pathien lungsenna tak tak khawm hi tawng buok thei a lo ni nalâwm el.

Ei lungril khawtkhâr, var (thlarâu thienghlim) khawm lût thei ta loa ei lo inkhârkhipna leia, suol thim pik takin a lo bâwm ta chu, ei hawng var nâwk theina dinga hi natna hrî (Coronavirus) hmang hin Pathienin ei lungril kawtkhâr a mi kik hawngpêk tumna khawm a lo ni thei. Ṭhang har ei tîu khâi! Ei taksa himna dinga ei in-LOCKDOWN po hman hi dit tâwk a um tâk vei tliet leh, a thlarâu chena ei lo in-LOCKDOWN tum el ta hi chu, a pawi satlie el chau khawm ni lovin a zie naw hle a nih.
Hieng ang sietna râpthlâk hmanga nawt har zo ei la ni naw rawp chun, ieng ang thilin am a mi la hung nawt nâwk sa ding tî hi ngaituo tham a tling. Ei chan ding chu suongtuo ngam khawm ni ta naw ni a, manga mang chî khawm ni ta bawk naw nih.

Chûleiin hun ṭha ei la nei sûng hin ṭhang har zâi rêl ei tîu. Nakie phât chu ṭhang har thei ta lo khawpin ieng natnain am a mi la tlâkbuok ding, annâwleh hieng nêka nasa lem khawm ieng thil am ei la tuok nâwk pei ding tî ei hriet sî nawh. Thî tâwm ruoia insiem ṭhat kher kher hi tum nâwm ei nîu. Natna le mangang hun hi insiem ṭhatna huna hmang tum kher kher ding an' nawh. Pathien hi chawplechila zuk hmû thut thei a ni sî naw a. Chûleiin tûhi hun lâwmum chu a nih. Nakie i tî sûng hin inhnu pal râwi a tih. Ieng chena tâwi am hun ṭha pêkin ei um tî ei hriet sî naw a.

"HUN LÂWMUMAH KA NGAITHLÂK CHE A,
SANDAMNA NIA KA ṬHANGPUI CHE," A TI SI A.
NGAI TA U, TUHI HUN LÂWMUM CHU A N'A,
NGAI TA U, TUHI SANDAMNA NÎ CHU A NIH.
2Korinth 6 : 2

Lalpa'n a thû mâwl tea ei suklanghai chu thar takin mal mi sâwmpêk raw se.
Don't Miss
© all rights reserved
made with by Simon L Infimate