Responsive Ad Slot

IRAN-US BUOINA IN INDOPUI PATHUMNA CHAWKSUOK CHUONG NAW NIH

Thursday, January 9, 2020

/ Posted by Simon L Infimate
Iran in thautui a zawrdawk thei naw ningintel-beidawng-lungsen in a inkawlpa Saudi Arabia thautui bawm iemanizat a va suksiet a. A in kawlpa thautui inchawtu America lung a suksen ta bek bek a nih. Chu hma khawm Iran in middle east a US sipai dotu phawt phawt a lo thangpui pei hlak a. Iraq le middle east a America sipai le a ruolhai thuomhnaw tamtak an lo suksiet tah. US drone vuongna chen kapthlain lulul an lo suo a. Tehran in a bomb nei a hung uongpui bek bek khan America lung a suksen hle.

Iraq maksan tumin hma an lak lai zinga insukhmingsieta intieng kir an nuom nawh. Khawvel map a inthawka Iran zuk thaibo el thei an ta naw ti an hriet leiin America haiin zaidaw tehlem an insir a. Iemani chen an mansapui an lo sukliem a nih.


Amiruokchu, nikhat khan buddi thalo phan tumin Baghdad ah Iran sipai hotulientak Pu Sulemani an i kaphlum ta pa kha a lo va lut a. US bei tum ruol le pai zawngkhawm tumin kiltin kiltang a sir kuol ti US in an hung hrietdawk a. An thilruk phan an bawpuitling hma ngeiin America haiin Iran army hotulien chu an lo hrehmang ta a nih.

Persian Gulf boruok a suksang a. Middle east a sukchiai bawk. Amiruokchu, Iran le US boruok thanaw lei hin hmun thenkhatah an lo intet met de khawma Iran le America an indo ring a um nawh. Oil market is global. ISIS an la re nawh. Thanghmunkhata thawtlang theina hmun a um, ti Tehran le Washington hin an hriet.

A. IRAN TIENGA INAWN HAI

1. Iran sipai

2. Lebanon

3. Yemen a helpawl

4. Syria a Hezzbollah

5. Iraq a Shia

B. AMERICA TIENGA INAWN HAI

1. Saudi Arabia

2. Qatar

3. Israel

C. MIDDLE EAST LE GULF A AN CHANTHATNA HAI SIET DING INLAU LEIA IRAN-AMERICA BUOI DING LO INLAU TALUO HAI

1. Russia

2. China

3. Turkey

4. Europe

5. Egypt

6. UK

D. America hmabula savdhaan bishram hlak hai

-United Nations

E. Sakhuo khat nisia politically a inthuruol theilo

-Islamic world

F. A tul huna America tienga kawpthap hlak

-NATO

G. Iran le US an buoi vei chun a hlawkpuitu ding chu ISIS hai an nih. Khawvel oil market le energy security chain suksie theitu an ni bawk. America in a tel bawm a hmang hek hmasa nuom nawh.

Inthuruoltaka ISIS remnants le affiliates rehmang zo pha, West inawn sawrkar det Iraq ah indin an tum seng. Syria ah ISIS inawn militias do hnelo an la um. Chuleiin democracy det chu Islamic Iran hnengtu dingin an siem tum. Persian gulf a Europe hai energy security le Middle East a America hai market le political diplomacy hring zing chu khawvel duthusam a nih. Chu thilah an hlawtling hmapo chu indo tak tak tukhawma an nuom nawh. Hmun thenkhata lo intet met met khawma a telpui a nawrsiet chuong nawh. Indo a suok chun Iran chunga economic sanctions a tangkai nawh ti khawvelin hung sopui tang an ta. Chu pha chun America demin la um a tih. Chu chu US in a zuk hmu phak. Chuleiin Iran le indo a nuom nawh. Islamic Nuclear Bomb Programme khawm Iran sawrkar gopsop le public consumption a ding chiin a tha.

Empire of Military Bases

Persian Gulf le Arabian Sea area huomsunga American national interests, thautui le Israel ram hum zing dingin America chun Iran ram sir le velah America military indo rawmrawk le hmangruo tha tamtak a siekhawl a. Chuong hai chu a hnuoia hin ei hung tarlang

1. Early warning aircrafts

2. Maritime patrol planes

3. Patriot missile defence batteries

4. B-52 bombers

5. Aircraft carrier strike groups

6. Maritime expeditionary units

7. Reaper Drones.

8. F-22 Raftors

9. B-2 Stealth Bombers

A chunga America indo hmangruo ei tarlang hai siethatna hmun chu hieng hai hi an nih

1. Qatar

2. Bahrain

3. UAE

4. Afghanistan

5. Kuwait

6. Jordan

7. Saudi Arabia

8. Oman

9. Israel

10. Iraq

11. Mediterranean sea

12. Arabian Sea (USS Enterprise)

13. Arabian Gulf (USS Abraham Lincoln)

Nuom hun huna zuk hire vat thei military installations pawimaw hmun sari ah an nei bawk. Chuong hai chu

1. Diego Garcia

2. Djibouti

3. Turkey

4. Turkmenistan

5. Kyrgysthan

6. Ukbekistan

7. Tajikistan

Khi a chunga military base le installations hai khi mainland America ta ding chun "Central nervous system" ang a nih. Arabian Sea, Arabian Gulf le a sevel khawmuolpuia American security le energy threat popo enkaitu America hai central nervous system an nih.

Islamic Iran in hnuoia hai le khun inthukawpin kum tam, vawitam Middle East le Gulf ramah America an lo chawkbuoi a, a ruolhai an lo vau a. Mi tamtak an lo that tah. US thilnei le sin thawpui le an hmangruo man tamtak an lo suksiet zing zing.

1. Lebanon (Hizbollah)

2. Syria (Quwat al Ridha)

3. Iraq (Kataib Hizbollah)

4. Israel (Hamas)

5. Yemen (Houthis)

Chun Islamic Iran hin kum 1979 khan ni 444 zet America mi sawmnga pahni an rama an lo hrengtang a. America khawma kum 1988 khan Iran vuongna a lo kapthlak. Kha tum khan thupha a chawia chu boruok dang dang hung inlumlet velin Iran chu Khakhmul hai football striker dingin a hung vawrdawk a. US mawng sukzatu le American policy sukhliemtu ding misuol ramtin hmuntinah a tir dawk ta a nih. Chuong chun Islam khawvel tawtawrawt le nuclear bomb nei thei anga insal Tehran hi America chun khingpui khawp angin a hung ngai ta pei a nih. North Korea le inthukawp thei khawpa suolin America chun a hung sopui ta a nih.

An ramlienna ding chau ngaituona leiin nikhat khan America chun Iran Army hotulientak Sulemani chu Iraq ah a kaphlum a. Iran in beilet ngei a tih, ti Washington in a hriet. Tehran in a thunglet dan ding awm khawm nguktakin President Trump le a rawihai chun an lo hrietlawk der tah.

Ram le ram kara indona suksuokpal an inlau leiin Iran General Sulemani kha America ta dinga HIT LIST chu Iran ramah ngei kaphlum an lo tum nawh. Boruok sosang ding ner an ngam nawh. Iraq hai Deputy PM ang hiela inlal an kaphlum ve pa kha an tin ve hrim a nih. Mu khat hmanga mi pahni kaphlum an lo tum a. An hlawtling bawk. Pahni kaphlum kakhawk ding khawm an hrietsa a nih. Chu taka inhlieukai tumtu America President a nih, ti an hriet a. Pupu Trump huoisen zie an sopui zing.

An ring ang char chun Iraq a an military base an suoksan mek pahni chu ni thum zo chiin Iran in missile sawmpanga hmangin a zu kap. Iran public lungsen iemanichen a tuoidam tah. Hi taka hin Tehran chun mi sawmriet lai thatin an sal. America tienga inthawkin thi le hliemzat hriet a ni nawh.

Tuhin chu Iran chu defensive tienga thang an tah. Iran chun phuba lakna ah Gulf rama US military base dang hai a sawisak chuong nawh. Israel a va kap nawh. A long range ICBM missile hmangin mainland America a kap bawk nawh. An general hotulien kaphlumtu hai kul early warning system a venghim zing chu a va nawr a. Bunker sunga an lo lut hman a hawi. Vuongna iemanizat a suksiet ring a um.

Tehran hin restrained action lak dan a hriet ve tah. Calculated risk lak nachang a hriet bawk. "Legitimate targets", "international law" le "war crimes" ti thumal chen a hmang ve thei ta hi discipline inchuk thei ding student a nih, ti West in an hung hrietthiem lem ta pei a nih. Tehran ta dingin tuorna chu hrietthiemna in a lan chang pei lem hmel. Economic sanctions le nuclear programme chungthua ruol le pai millo an i ti vet pa hi chuonga invetsi an nawa, buoina tawpkhawk tlung hnung khawma irresponsible rogue state an nawh, ti khawvel hrilna hunin a hun tawng chu a hmang ta lem a nih. Being on the defensive a thang an ni ta a. America hai phuba lak ding an nghak ta lem hi boruok sukzangkhaitu a ni lem tah. US President thusuok ei nghak zing.

Rikinrapa che hlak Iran vaihring helpawl Lebanon, Syria, Yemen, Israel le hmun dang danga haiin America chunga phuba lak tumin kilkhata lo che veng an tih. Intet met met khawm hilai khalai hmu theiin um a tih. Amiruokchu, a ram phekin America le Iran chun indo an nuom chu ring a um nawh. An constituency suklawmna ding ramtin public hriet dinga an hril nuom hai chu a bangkawr, marumara le lengmaser ang chau ni zing an tih.

Phuba lakdan chi sawmpathum an tekhina laia a zangkhaitak tiin Iraq a military base pahni hai hi Iran haiin an zu bei a ni chun puitling lungril putin America in zaidaw dan a thiem ve bawk chun WIN-WIN situation a ni hmel Iran le America ta dingin. US chun Iran General huoisen a hang kaphlum ta a. Iran khawma huoisen takin phuba a zu lak ve tiin a mipui lai uongpui khawp a nei ve tah.

Hieng hai hi zuk beizau sin ka ta. Iengtinam an mi dawn reng ti ang deuva Iran hin US a sai a ni ruok chun America in boruok sosang mek hi suksang lem inlauvin missile chu missile in dawng ding ti vein Iran chunga phuba a lak nuom ring a um nawh.

America hai thunglet tum dan nghaka, phuba lakdan a lienlema revenge lak, mainland US hit nuom ngawi ngawi, awna zawng zing Iran a nih. America in chu chu hriezingin Iran General kha risk insangtak lain a lo kaphlum a nih. Amiruokchu, an chunga phuba chunga phuba America in a lakdan enin, Iran hin chang pei a tum hmel a. A Plan B sukflop ding chun America hin missile attack hi missile attack bawkin a thung ka ring nawh. America in ar that dan a hriet rawn lem.

An in tieng uongpui thei khawp iemani an hawn thei ve ve ta leiin boruok an sukzangkhai tah. Pu Trump a thusuok innem ei hriet tah. In mi kap ve ta a. Ei in thung char. Hun ta raw se aw, a ti lem tah Pupu Trump in. Chuleiin Iran-US buoina leiin indopui suok naw nih.

Indo tak tak ni manglo inve malama hmun thenkhata intet deu sawk hnungin Diplomacy bawkah an lut veve ring a um.

-Ziektu

Dada le Jojo Pa,

Hmarkhawlien, Cachar, Assam

8.1.2020
Don't Miss
© all rights reserved
made with by Simon L Infimate